വാഷിങ്ടൺ / കീവ്: യുക്രെയ്ൻ-റഷ്യ യുദ്ധം അഞ്ചാം വർഷത്തിലേക്ക് കടക്കുന്നതിനിടെ, യുദ്ധം അവസാനിപ്പിക്കുന്നതുമായി ബന്ധപ്പെട്ട് നിർണ്ണായക പ്രസ്താവനയുമായി യു.എസ്. പ്രസിഡൻ്റ് ഡോണൾഡ് ട്രംപ്. യുക്രെയ്നിൽ ഒരു കരാറിൽ എത്തുന്നതിന് മുമ്പ് റഷ്യൻ പ്രസിഡൻ്റ് വ്‌ളാഡിമിർ പുടിനുമായി ചർച്ചയ്ക്കില്ലെന്ന് ട്രംപ് വ്യക്തമാക്കി.
ട്രംപിൻ്റെ നിലപാട്
"നമ്മൾ ഒരു കരാറിൽ ഏർപ്പെടാൻ പോവുകയാണോയെന്ന കാര്യത്തിൽ ആദ്യം തീരുമാനമുണ്ടാകട്ടെ. അതിന് ശേഷം മതി ചർച്ച. ഞാൻ എൻ്റെ സമയം പാഴാക്കാനില്ല," ട്രംപ് പറഞ്ഞു. സമാധാന ചർച്ചകളുടെ സാധ്യതകൾക്ക് പ്രാധാന്യം നൽകുന്നതിനിടയിലാണ് ട്രംപിൻ്റെ ഈ കടുപ്പമേറിയ പ്രഖ്യാപനം.
യുക്രെയ്നിലെ റഷ്യൻ ആക്രമണം
ട്രംപിൻ്റെ പ്രസ്താവനകൾക്ക് പിന്നാലെ, യുക്രെയ്നിൽ റഷ്യയുടെ ആക്രമണം ശക്തമായി.ശനിയാഴ്ച അർദ്ധരാത്രി മിസൈലുകളും ഡ്രോണുകളും ഉപയോഗിച്ചാണ് റഷ്യ ആക്രമണം നടത്തിയത്.ആക്രമണത്തിൽ നാലുപേർ മരിക്കുകയും 16 പേർക്ക് പരിക്കേൽക്കുകയും ചെയ്തു. നിരവധി കെട്ടിടങ്ങളും വാഹനങ്ങളും തകർന്നു.റഷ്യ തൊടുത്ത ഒമ്പത് മിസൈലുകളിൽ നാലെണ്ണവും 62 ഡ്രോണുകളിൽ 50 എണ്ണവും തകർത്തതായി യുക്രെയ്ൻ വ്യോമസേന അറിയിച്ചു.അതേസമയം, 121 യുക്രെയ്ൻ ഡ്രോണുകൾ വെടിവെച്ചിട്ടതായി റഷ്യൻ പ്രതിരോധ മന്ത്രാലയം അവകാശപ്പെട്ടു.
സെലെൻസ്കിയുടെ ആവശ്യം
യൂറോപ്യൻ നേതാക്കളുമായി നടത്തിയ കൂടിക്കാഴ്ചയ്ക്ക് പിന്നാലെയാണ് റഷ്യ ആക്രമണം ശക്തമാക്കിയത്. റഷ്യൻ ആക്രമണം വർദ്ധിക്കുന്ന സാഹചര്യത്തിൽ കൂടുതൽ പ്രതിരോധ സംവിധാനങ്ങൾ യുക്രെയ്ന് നൽകണമെന്ന് പ്രസിഡൻ്റ് വ്ലാദിമിർ സെലെൻസ്കി ആവശ്യപ്പെട്ടു. അമേരിക്കയും യൂറോപ്പും ജി-സെവൻ രാജ്യങ്ങളും ഇത് പരിഗണിക്കണമെന്ന് അദ്ദേഹം കൂട്ടിച്ചേർത്തു.