കീവ്: റഷ്യയുമായുള്ള യുദ്ധം അഞ്ചാം വർഷത്തിലേക്ക് കടക്കുമ്പോൾ, ആയുധക്ഷാമം മറികടക്കാൻ വിസ്മയിപ്പിക്കുന്ന പരീക്ഷണങ്ങളുമായി യുക്രൈൻ സൈന്യം. ലോകപ്രശസ്ത ആഡംബര കാറായ ബി.എം.ഡബ്ല്യു 7-സീരീസിനെ റോക്കറ്റ് ലോഞ്ചറാക്കി മാറ്റിയാണ് യുക്രൈൻ യുദ്ധക്കളത്തിൽ വിന്യസിച്ചിരിക്കുന്നത്. യുദ്ധോപകരണ വിതരണ ശൃംഖലയിലുണ്ടായ വിള്ളലുകളെ തുടർന്നാണ് ഇത്തരം താത്കാലിക സംവിധാനങ്ങൾ ഒരുക്കാൻ സൈന്യം നിർബന്ധിതരായത്.(Ukraine Equips BMW 7-Series With Rocket Launcher in order To Fight Russia)
ആഡംബര കാറിന്റെ തിളക്കം മാറ്റി റഷ്യൻ നിരീക്ഷണത്തിൽ നിന്ന് രക്ഷപ്പെടാനായി ഗ്രേ-ഗ്രീൻ പെയിന്റാണ് വാഹനത്തിന് നൽകിയിരിക്കുന്നത്. കാറിന്റെ മുകൾ ഭാഗത്തോട് ചേർന്ന് പിൻഭാഗത്താണ് റോക്കറ്റ് ലോഞ്ചർ ഘടിപ്പിച്ചിരിക്കുന്നത്. ഹ്രസ്വദൂര ആക്രമണങ്ങൾക്കായി ഇൻഫൻട്രി യൂണിറ്റുകളെ സഹായിക്കുകയാണ് ഇതിന്റെ ലക്ഷ്യം.
ഭാരമേറിയ ലോഞ്ചർ പ്രവർത്തിക്കുമ്പോൾ കാറിന്റെ ബാലൻസ് നഷ്ടപ്പെടാതിരിക്കാൻ കാറിന്റെ ഫ്രെയിമിൽ പ്രത്യേകം സപ്പോർട്ടിങ് കാലുകൾ ഘടിപ്പിച്ചിട്ടുണ്ട്. ലോഞ്ചർ ഉയർത്തുമ്പോൾ ഇവ ഭൂമിയിൽ ഉറച്ചുനിൽക്കും. കനത്ത പീരങ്കികൾ ഉപയോഗിക്കുമ്പോൾ റഷ്യൻ ഡ്രോണുകൾ അവ വേഗത്തിൽ കണ്ടെത്താൻ സാധ്യതയുണ്ട്. എന്നാൽ ബി.എം.ഡബ്ല്യു പോലുള്ള സിവിൽ വാഹനങ്ങൾ ഉപയോഗിക്കുമ്പോൾ വേഗത്തിൽ ആക്രമണം നടത്തി അവിടെനിന്ന് മാറാൻ സാധിക്കുന്നു. സാധാരണയായി പിക്കപ്പ് ട്രക്കുകളാണ് ഇത്തരം ആവശ്യങ്ങൾക്ക് ഉപയോഗിക്കാറുള്ളത്. എന്നാൽ ഉപകരണങ്ങളുടെ കടുത്ത ക്ഷാമം കാരണം ആഡംബര കാറുകളെയും യുദ്ധമുഖത്തേക്ക് എത്തിക്കാൻ യുക്രൈനിലെ 114-ാമത് ടെറിട്ടോറിയൽ ഡിഫൻസ് ബ്രിഗേഡ് തീരുമാനിക്കുകയായിരുന്നു.