ലണ്ടൻ: കുട്ടികൾക്കിടയിലെ സോഷ്യൽ മീഡിയ ഉപയോഗം നിയന്ത്രിക്കുന്നതിന്റെ ഭാഗമായി കർശനമായ നിയമങ്ങൾ കൊണ്ടുവരാൻ ബ്രിട്ടീഷ് സർക്കാർ ഒരുങ്ങുന്നു (UK Social Media Ban). 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ പൂർണ്ണമായും നിരോധിക്കുന്നതടക്കമുള്ള കാര്യങ്ങൾ പരിഗണനയിലാണെന്നും ഒരു ഓപ്ഷനും തള്ളിക്കളയാനാവില്ലെന്നും പ്രധാനമന്ത്രി കിയർ സ്റ്റാർമർ വ്യക്തമാക്കി. കുട്ടികൾ അനന്തമായ സ്ക്രോളിംഗിനും (Infinite Scrolling) അതുവഴിയുണ്ടാകുന്ന മാനസിക സമ്മർദ്ദങ്ങൾക്കും അടിമപ്പെടുന്നത് തടയുകയാണ് ലക്ഷ്യമെന്ന് അദ്ദേഹം പറഞ്ഞു.
സോഷ്യൽ മീഡിയാ പ്ലാറ്റ്ഫോമുകളിലെ അമിതമായ ഇടപെടൽ കുട്ടികളിൽ ഉത്കണ്ഠയും ആത്മവിശ്വാസക്കുറവും ഉണ്ടാക്കുന്നുണ്ടെന്ന് പ്രധാനമന്ത്രി ചൂണ്ടിക്കാട്ടി. ഇതിന്റെ ഭാഗമായി ഓസ്ട്രേലിയ നടപ്പിലാക്കിയ മാതൃകാപരമായ നിയമങ്ങൾ പഠിക്കാൻ ബ്രിട്ടീഷ് മന്ത്രിമാർ ഓസ്ട്രേലിയ സന്ദർശിക്കും. കഴിഞ്ഞ മാസമാണ് 16 വയസ്സിൽ താഴെയുള്ളവർക്ക് സോഷ്യൽ മീഡിയ നിരോധിക്കുന്ന ലോകത്തെ ആദ്യത്തെ നിയമം ഓസ്ട്രേലിയ കൊണ്ടുവന്നത്. ബ്രിട്ടനിലും സമാനമായ രീതിയിൽ പ്രായപരിധി നിശ്ചയിക്കുന്നതിനെക്കുറിച്ചും കർശനമായ പ്രായപരിശോധനാ സംവിധാനങ്ങൾ ഏർപ്പെടുത്തുന്നതിനെക്കുറിച്ചും സർക്കാർ പൊതുജനങ്ങളുടെ അഭിപ്രായം തേടും.
സ്കൂളുകൾ ഫോൺ രഹിത മേഖലകളാക്കി മാറ്റാനും സർക്കാർ തീരുമാനിച്ചിട്ടുണ്ട്. ക്ലാസ് മുറികളിൽ മൊബൈൽ ഫോണുകൾക്ക് സ്ഥാനമില്ലെന്നും ഇത് കൃത്യമായി നടപ്പിലാക്കുന്നുണ്ടെന്ന് വിദ്യാഭ്യാസ ഗുണനിലവാര പരിശോധനാ ഏജൻസിയായ 'ഓഫ്സ്റ്റഡ്' (Ofsted) ഉറപ്പുവരുത്തുമെന്നും സ്റ്റാർമർ പറഞ്ഞു. ആർട്ടിഫിഷ്യൽ ഇന്റലിജൻസ് ഉപയോഗിച്ച് കുട്ടികളുടെ നഗ്നചിത്രങ്ങൾ നിർമ്മിക്കുന്നതും പ്രചരിപ്പിക്കുന്നതും തടയാൻ നേരത്തെ തന്നെ നടപടികൾ തുടങ്ങിയിരുന്നു. ഏപ്രിൽ മാസത്തോടു കൂടി അഞ്ച് വയസ്സിൽ താഴെയുള്ള കുട്ടികളുടെ ഡിജിറ്റൽ ഉപയോഗത്തെക്കുറിച്ച് പ്രത്യേക മാർഗ്ഗനിർദ്ദേശങ്ങൾ സർക്കാർ പുറത്തിറക്കും.
The UK government is considering a complete ban on social media for children under the age of 16, with Prime Minister Keir Starmer stating that "no option is off the table." The government launched a nationwide consultation to gather views on enforcing age limits and restricting addictive features like infinite scrolling to protect young people from anxiety and digital harm. Ministers are also set to visit Australia to study its world-first under-16 social media ban, while new guidelines aim to make British schools "phone-free by default."