ഹാനോയ്: ഫിലിപ്പീൻസിൽ 114 പേരുടെ മരണത്തിനും കനത്ത നാശനഷ്ടങ്ങൾക്കും ഇടയാക്കിയതിന് പിന്നാലെ കൽമേഗി ചുഴലിക്കാറ്റ് വിയറ്റ്നാമിന്റെ തീരങ്ങളിലും ആഞ്ഞടിച്ചു. മണിക്കൂറിൽ 149 കിലോമീറ്റർ വേഗതയിലാണ് കാറ്റ് വീശുന്നത്. ഈ വർഷം വിയറ്റ്നാമിൽ വീശിയ ഏറ്റവും ശക്തമായ ചുഴലിക്കാറ്റുകളിൽ ഒന്നാണ് കൽമേഗി. സാഹചര്യം നേരിടാൻ അധികൃതർ പൂർണ്ണ സജ്ജീകരണങ്ങൾ ഒരുക്കിയിട്ടുണ്ട്.(Typhoon Kalmaegi wreaks havoc in the Philippines, 114 people die tragically)
2,60,000-ത്തിലധികം ആളുകളെ സർക്കാർ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ആറ് വിമാനത്താവളങ്ങൾ അടക്കുകയും നൂറുകണക്കിന് വിമാന സർവീസുകൾ റദ്ദാക്കുകയും ചെയ്തു. മണിക്കൂറിൽ 149 കിലോമീറ്റർ വേഗതയുള്ള കാറ്റ് വീടുകളുടെ മേൽക്കൂരകൾ പറത്തിക്കളയാനും മരങ്ങളും വൈദ്യുത പോസ്റ്റുകളും കടപുഴകി വീഴാനും സാധ്യതയുണ്ട്. 30 അടി വരെ ഉയരത്തിൽ തിരമാലകൾ ഉയർന്നു.
രക്ഷാപ്രവർത്തനങ്ങൾക്കായി 2,68,000-ത്തിലധികം സൈനികരെ സജ്ജരാക്കിയിട്ടുണ്ടെന്ന് സർക്കാർ അറിയിച്ചു. താഴ്ന്ന പ്രദേശങ്ങളിൽ വെള്ളപ്പൊക്കത്തിനും കാർഷിക മേഖലകളിൽ കനത്ത നാശനഷ്ടങ്ങൾക്കും സാധ്യതയുണ്ടെന്ന് മുന്നറിയിപ്പ് നൽകിയിട്ടുണ്ട്. ഹുയേ നഗരത്തിന് സമീപം ഈ ആഴ്ചയുണ്ടായ വെള്ളപ്പൊക്കത്തിൽ 47 പേർ മരിച്ചതിന് തൊട്ടുപിന്നാലെയാണ് ചുഴലിക്കാറ്റ് ഭീതി വിതയ്ക്കുന്നത്.
ജനങ്ങളോട് വീടിനുള്ളിൽത്തന്നെ കഴിയാൻ അധികൃതർ നിർദേശിച്ചു. ഫിലിപ്പീൻസിൽ വീശി രണ്ട് ദിവസത്തിന് ശേഷമാണ് കൽമേഗി വിയറ്റ്നാമിൽ പ്രവേശിച്ചത്. ഈ വർഷം ഫിലിപ്പീൻസിൽ വീശിയ 20-ാമത്തെ കൊടുങ്കാറ്റാണ് കൽമേഗി. ഇവിടെ ചുഴലിക്കാറ്റ് കനത്ത നാശനഷ്ടമാണ് വിതച്ചത്. 114 പേർ മരിച്ചതായി സ്ഥിരീകരിച്ചു. കൂടാതെ 127 പേരെ കാണാതായി എന്നും റിപ്പോർട്ടുണ്ട്.
ദുരന്തമേഖലയിൽ അവശിഷ്ടങ്ങൾ നീക്കം ചെയ്യുക എന്നതാണ് നിലവിലെ പ്രധാന വെല്ലുവിളിയെന്ന് രക്ഷാപ്രവർത്തകർ അറിയിച്ചു. അതിനിടെ, ഫിലിപ്പീൻസിലെ മിൻഡാനാവോ ദ്വീപിന് കിഴക്ക് ഒരു പുതിയ കൊടുങ്കാറ്റ് രൂപപ്പെടുന്നതായി കാലാവസ്ഥാ നിരീക്ഷകർ മുന്നറിയിപ്പ് നൽകി. ഇത് അടുത്ത ആഴ്ചയുടെ തുടക്കത്തിൽ ചുഴലിക്കാറ്റായി ശക്തിപ്പെട്ട് രാജ്യത്ത് വീണ്ടും ആഞ്ഞുവീശാൻ സാധ്യതയുണ്ട്.