മനില: ഫിഫിലിപ്പീൻസിൽ കനത്ത നാശനഷ്ടം വിതച്ച് കൽമാഗി ചുഴലിക്കാറ്റിൽ 114 പേർ മരണപ്പെട്ടു. ഏറ്റവും കൂടുതൽ നാശനഷ്ടമുണ്ടായ സെബു മേഖലയിൽ 71 പേർ മരണപ്പെട്ടതായാണ് റിപ്പോർട്ട്. ദുരന്തത്തെത്തുടർന്ന്, പ്രസിഡന്റ് ഫെർഡിനാൻഡ് മാർക്കോസ് ജൂനിയർ രാജ്യത്ത് അടിയന്തരാവസ്ഥ പ്രഖ്യാപിച്ചിരിക്കുകയാണ്. അവശ്യവസ്തുക്കളുടെ വില നിയന്ത്രിക്കാനും ദുരിതാശ്വാസ ഫണ്ടുകളിലേക്കുള്ള പ്രവേശനം വേഗത്തിലാക്കാനും ദുരിതാശ്വാസ പ്രവർത്തനങ്ങൾ കാര്യക്ഷമമാക്കാനും ഈ നടപടി സഹായകമാകുമെന്നാണ് പ്രതീക്ഷിക്കുന്നത്. സെപ്റ്റംബർ 30-ന് ഉണ്ടായ ഭൂകമ്പത്തിൽ നിന്ന് ഫിലിപ്പീൻസ് ഇപ്പോഴും കരകയറാൻ ശ്രമിക്കുന്നതിനിടെയാണ് ചുഴലിക്കാറ്റ് ആഞ്ഞടിച്ചത്.
കൽമാഗി ചുഴലിക്കാറ്റിന്റെ ഭീഷണി കടന്നുപോയെങ്കിലും, മറ്റൊരു ഭീഷണിയായ ട്രോപ്പിക്കൽ സ്റ്റോം ഫങ്-വോങ് (പ്രാദേശികമായി 'യുവൻ' എന്നറിയപ്പെടുന്നു) ഫിലിപ്പീൻസിൽ എത്താൻ സാധ്യതയുണ്ട്. കൊടുങ്കാറ്റ് ഒരു സൂപ്പർ ടൈഫൂണായി ശക്തി പ്രാപിച്ച് നവംബർ 10 ന് വടക്കൻ അല്ലെങ്കിൽ മധ്യ ലുസോണിൽ കരയിൽ പതിക്കാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. അതേസമയം, ഫിലിപ്പീൻസിൽ നിന്ന് പുറപ്പെട്ട കൽമാഗി ചുഴലിക്കാറ്റ് ഇപ്പോൾ പടിഞ്ഞാറ്-വടക്കുപടിഞ്ഞാറൻ ദിശയിലേക്ക് നീങ്ങുകയും വിയറ്റ്നാമിന് ഭീഷണിയാകുകയും ചെയ്യുന്നു.
വിയറ്റ്നാമിൽ, ഇന്ന് രാത്രിയോടെ ചുഴലിക്കാറ്റ് മധ്യ തീരത്ത് കരതൊടുമെന്ന് പ്രതീക്ഷിക്കുന്നു. തീരപ്രദേശങ്ങളിലെ ജലനിരപ്പ് 0.3 മുതൽ 0.6 മീറ്റർ വരെ ഉയരുമെന്ന് പ്രതീക്ഷിക്കുന്നു. കനത്ത മഴ, വെള്ളപ്പൊക്കം, മണ്ണിടിച്ചിൽ എന്നിവ ഉണ്ടാകുമെന്ന് രാജ്യത്തെ കാലാവസ്ഥാ കേന്ദ്രം മുന്നറിയിപ്പ് നൽകിയിട്ടുണ്ട്. ദുരന്തത്തിൽ ജീവൻ നഷ്ടപ്പെട്ട ഫിലിപ്പീൻസിലെ ജനങ്ങൾക്ക് അയൽരാജ്യമായ മലേഷ്യ പ്രധാനമന്ത്രി മുഖേന അനുശോചനം അറിയിച്ചു.
Summary: Philippine President Ferdinand Marcos Jr declared a state of emergency after Typhoon Kalmaegi (local name Tino) caused the death of at least 114 people and widespread damage.