വാഷിംഗ്ടൺ: ബി.ബി.സിക്കെതിരെ നിയമനടപടിക്കൊരുങ്ങുകയാണെന്ന് അമേരിക്കൻ പ്രസിഡന്റ് ഡോണൾഡ് ട്രംപ്. ബി.ബി.സിക്കെതിരെ ഉടൻ തന്നെ കേസ് ഫയൽ ചെയ്യുമെന്നും അദ്ദേഹം വ്യക്തമാക്കി. ഇന്ന് വൈകുന്നേരം അല്ലെങ്കിൽ നാളെ രാവിലെ തന്നെ കേസ് നൽകുമെന്നാണ് ട്രംപ് കൂട്ടിച്ചേർത്തത്.(Trump prepares to take legal action against BBC, allegation of using AI)
തെറ്റിദ്ധാരണയുണ്ടാക്കുന്ന രീതിയിൽ എഡിറ്റ് ചെയ്ത പ്രസംഗഭാഗം സംപ്രേക്ഷണം ചെയ്തതിനാണ് നിയമനടപടി സ്വീകരിക്കുന്നത്. ബി.ബി.സിയിൽ നിന്ന് ഒരു ബില്യൺ ഡോളർ നഷ്ടപരിഹാരം ആവശ്യപ്പെട്ട് കേസ് നൽകുമെന്ന് ട്രംപ് ഒരു മാസം മുമ്പ് ഭീഷണി മുഴക്കിയിരുന്നു. ഈ ഭീഷണിക്കു പിന്നാലെയാണ് അദ്ദേഹം നിലപാട് കടുപ്പിക്കുന്നത്. "അവർ വാക്കുകൾ എന്റെ വായിൽ കുത്തിവെച്ചു. ആർട്ടിഫിഷ്യൽ ഇന്റലിജൻസ് (എ.ഐ.) പോലുള്ള എന്തെങ്കിലും സാങ്കേതികവിദ്യ ഉപയോഗിച്ചാണ് അവർ അത് ചെയ്തതെന്ന് തോന്നുന്നു," ട്രംപ് ആരോപിച്ചു.
തെറ്റിദ്ധാരണ പരത്തുന്ന തരത്തിൽ തന്റെ പ്രസംഗം എഡിറ്റ് ചെയ്ത് ഉപയോഗിച്ചതാണ് നിയമനടപടിക്ക് കാരണമെന്നും അദ്ദേഹം കൂട്ടിച്ചേർത്തു. അന്താരാഷ്ട്ര മാധ്യമസ്ഥാപനത്തിനെതിരെ പ്രസിഡന്റ് നിയമനടപടിക്ക് ഒരുങ്ങുന്നത് രാഷ്ട്രീയ, മാധ്യമ ലോകത്ത് വലിയ ചർച്ചാവിഷയമായിരിക്കുകയാണ്.