അന്താരാഷ്ട്ര സമാധാന പ്രവർത്തനങ്ങൾക്കായി ഐക്യരാഷ്ട്രസഭയെ ആശ്രയിക്കുന്ന പാരമ്പര്യ രീതിക്ക് പകരമായി 'ബോർഡ് ഓഫ് പീസ്' (Board of Peace) എന്ന പേരിൽ പുതിയ ആഗോള സമിതി രൂപീകരിക്കാനുള്ള നീക്കത്തിലാണ് അമേരിക്കൻ പ്രസിഡന്റ് ഡൊണാൾഡ് ട്രംപ്. ഈ സമിതിയിൽ സ്ഥിരം അംഗത്വം നേടാൻ താൽപ്പര്യമുള്ള രാജ്യങ്ങൾ 100 കോടി ഡോളർ (ഏകദേശം 8,300 കോടി രൂപ) നൽകണമെന്ന് ട്രംപ് ഭരണകൂടം വ്യക്തമാക്കി. പണം നൽകാൻ കഴിയാത്ത രാജ്യങ്ങൾക്ക് മൂന്ന് വർഷത്തെ താൽക്കാലിക അംഗത്വം മാത്രമായിരിക്കും നൽകുക. ഇന്ത്യയുൾപ്പെടെയുള്ള പ്രമുഖ രാജ്യങ്ങളിലെ ഭരണാധികാരികൾക്ക് ട്രംപ് ഇതിനോടകം ക്ഷണക്കത്തുകൾ അയച്ചിട്ടുണ്ട്.
യുദ്ധം തകർത്ത ഗാസയുടെ പുനർനിർമ്മാണത്തിന് മേൽനോട്ടം വഹിക്കുക എന്നതാണ് ഈ സമിതിയുടെ പ്രാഥമിക ലക്ഷ്യമായി പ്രഖ്യാപിച്ചിരിക്കുന്നത്. എന്നാൽ സമിതിയുടെ കരട് രേഖയിൽ ഗാസയെക്കുറിച്ച് നേരിട്ട് പരാമർശമില്ലാത്തത്, ഇത് യു.എന്നിന് ബദലായി ട്രംപ് കെട്ടിപ്പടുക്കുന്ന ഒരു അന്താരാഷ്ട്ര സംവിധാനമാണെന്ന സംശയം വർദ്ധിപ്പിക്കുന്നു. മറ്റ് അന്താരാഷ്ട്ര സംഘടനകളെ ബാധിച്ചിരിക്കുന്ന ഭരണപരമായ മെല്ലെപ്പോക്കും ധൂർത്തും ഒഴിവാക്കി, സമാധാന പ്രവർത്തനങ്ങൾ കൂടുതൽ വേഗത്തിലും കൃത്യതയോടെയും നടപ്പിലാക്കാനാണ് ഈ സമിതി ലക്ഷ്യമിടുന്നതെന്ന് വൈറ്റ് ഹൗസ് വൃത്തങ്ങൾ അറിയിച്ചു.
ട്രംപിന്റെ മരുമകൻ ജാറെഡ് കുഷ്നർ, വിദേശകാര്യ സെക്രട്ടറി മാർക്കോ റൂബിയോ, വേൾഡ് ബാങ്ക് പ്രസിഡന്റ് അജയ് ബംഗ തുടങ്ങിയ ഏഴ് പ്രമുഖരെയാണ് സമിതിയുടെ എക്സിക്യൂട്ടീവ് ബോർഡിൽ ട്രംപ് ഉൾപ്പെടുത്തിയിരിക്കുന്നത്. സമിതിയുടെ തീരുമാനങ്ങൾ ഭൂരിപക്ഷ വോട്ടിലൂടെ എടുക്കാമെങ്കിലും, അധ്യക്ഷൻ എന്ന നിലയിൽ ട്രംപിന് ഏത് തീരുമാനവും 'വീറ്റോ' ചെയ്യാനും സ്വന്തം നിലയിൽ വ്യാഖ്യാനിക്കാനുമുള്ള അമിതാധികാരം ചാർട്ടർ നൽകുന്നുണ്ട്. ഇത് സമിതിയെ ട്രംപിന്റെ വ്യക്തിപരമായ താത്പര്യങ്ങൾക്കനുസരിച്ച് നിയന്ത്രിക്കാൻ സഹായിക്കുമെന്നാണ് വിലയിരുത്തപ്പെടുന്നത്.
ഈ നീക്കത്തിനെതിരെ ഇസ്രായേൽ ഉൾപ്പെടെയുള്ള രാജ്യങ്ങൾ രംഗത്തെത്തിയിട്ടുണ്ട്. തുർക്കിയെയും ഖത്തറിനെയും സമിതിയിൽ ഉൾപ്പെടുത്തിയതിനെ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു വിമർശിച്ചു. പലസ്തീൻ ജനതയുടെ അവകാശങ്ങളെക്കുറിച്ചോ അവരുടെ ഭാവിയെക്കുറിച്ചോ സമിതിയുടെ ലക്ഷ്യങ്ങളിൽ ഒരിടത്തും പരാമർശിക്കുന്നില്ലെന്ന് പലസ്തീൻ അനുകൂല പണ്ഡിതന്മാരും ചൂണ്ടിക്കാട്ടുന്നു. യൂറോപ്യൻ രാജ്യങ്ങൾ ട്രംപിന്റെ ഈ പുതിയ നീക്കത്തെ കരുതലോടെയാണ് വീക്ഷിക്കുന്നത്.
President Donald Trump has introduced the "Board of Peace," a U.S.-led international organization aimed at overseeing the reconstruction of Gaza, with a permanent seat costing nations $1 billion. While marketed as an alternative to the United Nations, the board grants Trump final veto authority over all decisions, raising concerns among European and Middle Eastern leaders. Despite the inclusion of high-profile figures like Jared Kushner and Ajay Banga, the proposal faces backlash from Israel and human rights scholars for its structure and lack of focus on Palestinian rights.