വാഷിംഗ്ടൺ ഡിസി: അമേരിക്കയിൽ (United States) പ്രായപൂർത്തിയാകാത്തവർക്ക് നൽകി വരുന്ന ലിംഗമാറ്റ ചികിത്സകളും അനുബന്ധ ആരോഗ്യ സേവനങ്ങളും നിർത്തലാക്കാൻ ലക്ഷ്യമിട്ട് പ്രസിഡന്റ് ഡൊണാൾഡ് ട്രംപ് ഭരണകൂടം പുതിയ നിയമങ്ങൾ നിർദ്ദേശിച്ചു. ഈ നിയമങ്ങൾ ലംഘിക്കുന്ന ആശുപത്രികൾക്ക് നൽകുന്ന ഫെഡറൽ ഫണ്ടിംഗ് പൂർണ്ണമായും നിർത്തലാക്കുമെന്നാണ് ഔദ്യോഗിക മുന്നറിയിപ്പ്.
മെഡികെയർ, മെഡികെയ്ഡ് എന്നിവ വഴിയുള്ള സാമ്പത്തിക സഹായം തടയുമെന്നതാണ് പ്രധാന ഭീഷണി. ഭൂരിഭാഗം അമേരിക്കൻ ആശുപത്രികളും പ്രവർത്തനത്തിന് ഈ ഫണ്ടുകളെ ആശ്രയിക്കുന്നതിനാൽ, ഇത് അവരുടെ നിലനിൽപ്പിനെത്തന്നെ ബാധിച്ചേക്കാം. "കുട്ടികളെ ഭേദമാക്കാനാണ് ആശുപത്രികൾ ശ്രമിക്കേണ്ടത്, അല്ലാതെ ഉപദ്രവിക്കാനല്ല" എന്ന് യുഎസ് ആരോഗ്യ സെക്രട്ടറി റോബർട്ട് എഫ്. കെന്നഡി ജൂനിയർ വാർത്താസമ്മേളനത്തിൽ പറഞ്ഞു. ലിംഗമാറ്റ ചികിത്സകളെ 'ദുരുപയോഗം' എന്നാണ് അദ്ദേഹം വിശേഷിപ്പിച്ചത്
ലിംഗമാറ്റ ചികിത്സ നൽകുന്ന ഡോക്ടർമാർക്ക് 10 വർഷം വരെ തടവ് ശിക്ഷ നൽകുന്ന ബില്ലും, മെഡികെയ്ഡ് വഴി ഇത്തരം ചികിത്സകൾക്ക് പണം നൽകുന്നത് തടയുന്ന മറ്റൊരു ബില്ലും കഴിഞ്ഞ ദിവസങ്ങളിൽ യുഎസ് ജനപ്രതിനിധി സഭ പാസാക്കിയിരുന്നു. ഈ നീക്കങ്ങൾക്കെതിരെ ശക്തമായ നിയമപോരാട്ടം നടത്തുമെന്ന് മനുഷ്യാവകാശ സംഘടനകളും ട്രാൻസ്ജെൻഡർ വിഭാഗത്തിന് വേണ്ടി പ്രവർത്തിക്കുന്നവരും അറിയിച്ചു. പുതിയ നിയമങ്ങൾ പ്രാബല്യത്തിൽ വരുന്നതിന് മുൻപ് 60 ദിവസത്തെ പൊതുജനാഭിപ്രായ രൂപീകരണ സമയം നൽകിയിട്ടുണ്ട്.
അമേരിക്കയിലെ ഭൂരിഭാഗം മെഡിക്കൽ സംഘടനകളും ഇത്തരം ചികിത്സകളെ അനുകൂലിക്കുമ്പോൾ, ട്രംപ് ഭരണകൂടത്തിന്റെ ഈ കടുത്ത നീക്കം വലിയ രാഷ്ട്രീയ-സാമൂഹിക ചർച്ചകൾക്ക് വഴിമരുന്നിട്ടിരിക്കുകയാണ്.
The Trump administration, led by Health Secretary Robert F. Kennedy Jr., has proposed sweeping new rules to end gender-related medical care for minors across the United States. The proposal threatens to withdraw all federal funding, including Medicare and Medicaid, from hospitals that continue to offer puberty blockers, hormone therapies, or surgeries to minors. While the administration views these treatments as harmful, medical associations and advocates warn that this move—coupled with potential criminalization by Congress—will trigger massive legal battles and jeopardize the financial stability of healthcare institutions.