ടെഹ്റാൻ: ഇറാനിൽ ഭരണകൂട വിരുദ്ധ പ്രക്ഷോഭത്തിനിടെ കൊല്ലപ്പെട്ട 23-കാരിയായ റോബിന അമീനിയൻ (Robina Aminian) എന്ന വിദ്യാർത്ഥിനിയുടെ കുടുംബം നേരിട്ട ദുരനുഭവങ്ങൾ ലോകത്തെ നടുക്കുന്നതാണ്. ടെഹ്റാനിൽ ഫാഷൻ ഡിസൈനിംഗ് പഠിച്ചിരുന്ന റോബിനയെ സുരക്ഷാസേന തലയ്ക്ക് പിന്നിൽ വെടിവെച്ചു കൊലപ്പെടുത്തിയെന്നാണ് കുടുംബം ആരോപിക്കുന്നത്. എന്നാൽ മകളുടെ മൃതദേഹം കണ്ടെത്താനും സംസ്കരിക്കാനും ആ അമ്മയ്ക്ക് നേരിടേണ്ടി വന്നത് സമാനതകളില്ലാത്ത ക്രൂരതകളാണ്.
മകൾ കൊല്ലപ്പെട്ട വിവരം അറിഞ്ഞെത്തിയ റോബിനയുടെ അമ്മ അമീന നോറെയിക്ക്, ടെഹ്റാനിലെ മോർച്ചറികളിൽ കുന്നുകൂടിക്കിടന്ന നൂറുകണക്കിന് ശവങ്ങൾക്കിടയിൽ ഓരോ ബാഗും തുറന്ന് പരിശോധിക്കേണ്ടി വന്നു. അനേകം സുന്ദരമായ മുഖങ്ങൾക്കിടയിൽ നിന്നാണ് തന്റെ മകളെ അവർ തിരിച്ചറിഞ്ഞതെന്ന് ബന്ധുക്കൾ പറയുന്നു. മൃതദേഹം വിട്ടുകിട്ടാൻ ഇറാൻ അധികൃതർ വൻതുക ആവശ്യപ്പെടുമെന്നും പൊതു ചടങ്ങുകൾ വിലക്കുമെന്നും ഭയന്ന കുടുംബം, രഹസ്യമായി മൃതദേഹവുമായി കടന്നുകളയുകയായിരുന്നു. മകളുടെ രക്തം പുരണ്ട വസ്ത്രങ്ങളുമായി ഏഴു മണിക്കൂർ യാത്ര ചെയ്താണ് അവർ ജന്മനാടായ കെർമാൻഷായിൽ എത്തിയത്.
വീട്ടിലെത്തിയപ്പോൾ സുരക്ഷാസേന വീട് വളഞ്ഞതോടെ, മൃതദേഹം അന്തസ്സായി അടക്കം ചെയ്യാൻ പോലും അവർക്ക് കഴിഞ്ഞില്ല. ഒടുവിൽ നഗരത്തിന് പുറത്തുള്ള വിജനമായ ഒരിടത്ത് റോഡരികിൽ കുഴിയെടുത്ത് മകളെ അവർക്ക് അടക്കം ചെയ്യേണ്ടി വന്നു. തിരിച്ചറിയാൻ അടയാളങ്ങൾ പോലുമില്ലാത്ത ഒരു കുഴിമാടത്തിൽ റോബിന ഇന്നും അന്ത്യവിശ്രമം കൊള്ളുന്നു.
ഹ്യൂമൻ റൈറ്റ്സ് ആക്ടിവിസ്റ്റ്സ് ന്യൂസ് ഏജൻസിയുടെ (HRANA) ഏറ്റവും പുതിയ കണക്കുകൾ പ്രകാരം ഇറാനിലെ പ്രതിഷേധങ്ങളിൽ ഇതുവരെ 3,090 പേർ കൊല്ലപ്പെട്ടിട്ടുണ്ട്. വധശിക്ഷകൾക്ക് പുറമെ, പ്രക്ഷോഭകാരികളെ ക്രൂരമായി മർദ്ദിക്കുന്നതിന്റെയും കുറ്റസമ്മതം നടത്തിക്കുന്നതിന്റെയും നിരവധി വിവരങ്ങൾ പുറത്തുവരുന്നുണ്ട്. റോബിന ഒരു രാഷ്ട്രീയ പ്രവർത്തകയല്ലായിരുന്നുവെന്നും, പഠനത്തിന് ശേഷം നല്ലൊരു ഭാവി സ്വപ്നം കണ്ടിരുന്ന പെൺകുട്ടിയായിരുന്നുവെന്നും ഓസ്ലോയിലുള്ള അവളുടെ അമ്മാവൻ നെസാർ മിനോയി പറഞ്ഞു. ഇറാനിൽ ഇന്റർനെറ്റ് ഉൾപ്പെടെയുള്ള വാർത്താവിനിമയ ഉപാധികൾ തടസ്സപ്പെട്ടതോടെ റോബിനയുടെ മാതാപിതാക്കളെക്കുറിച്ച് കഴിഞ്ഞ ഏതാനും ദിവസങ്ങളായി വിവരമൊന്നുമില്ലെന്നും അദ്ദേഹം ആശങ്ക പ്രകടിപ്പിച്ചു.
The tragic story of Robina Aminian, a 23-year-old fashion student killed in Iran's protests, highlights the harrowing reality faced by grieving families in the country. Her mother had to search through piles of corpses in overflowing morgues to find her daughter’s body and was forced to "steal" the remains to avoid government fees and restrictions. Ultimately, the family had to bury Robina in an unmarked roadside pit as security forces surrounded their home. Human rights groups report that over 3,000 people have been killed so far in this nationwide unrest.