ഖാലിദ സിയയുടെ നിര്യാണം: രാജ്യത്ത് മൂന്ന് ദിവസത്തെ ദുഃഖാചരണം; ഐക്യത്തിന് ആഹ്വാനം ചെയ്ത് മുഹമ്മദ് യൂനസ് | Begum Khaleda Zia

ധാക്ക: ബംഗ്ലാദേശ് മുൻ പ്രധാനമന്ത്രിയും ബി.എൻ.പി അധ്യക്ഷയുമായ ബീഗം ഖാലിദ സിയയുടെ (Begum Khaleda Zia) വിയോഗത്തെത്തുടർന്ന് രാജ്യത്ത് മൂന്ന് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. ചൊവ്വാഴ്ച രാജ്യത്തെ അഭിസംബോധന ചെയ്ത ഇടക്കാല സർക്കാർ മുഖ്യ ഉപദേഷ്ടാവ് മുഹമ്മദ് യൂനസ്, ഖാലിദ സിയയുടെ നിര്യാണം രാജ്യത്തിന് നികത്താനാവാത്ത നഷ്ടമാണെന്ന് വിശേഷിപ്പിച്ചു. ബുധനാഴ്ച ഖാലിദ സിയയുടെ സംസ്‌കാര ചടങ്ങുകൾ നടക്കുമ്പോൾ രാജ്യത്ത് പൊതുഅവധി ആയിരിക്കുമെന്നും അദ്ദേഹം അറിയിച്ചു.

രാജ്യം ഇപ്പോൾ കടന്നുപോകുന്നത് അത്യന്തം പ്രയാസകരമായ ഘട്ടത്തിലൂടെയാണെന്ന് മുഹമ്മദ് യൂനസ് തന്റെ പ്രസംഗത്തിൽ ഓർമ്മിപ്പിച്ചു. ഈ ദുഃഖസമയത്ത് ഭിന്നതകൾ മറന്ന് എല്ലാവരും ഒറ്റക്കെട്ടായി നിൽക്കണമെന്ന് അദ്ദേഹം ജനങ്ങളോട് ആഭ്യർത്ഥിച്ചു. ഖാലിദ സിയയുടെ വിയോഗം സൃഷ്ടിച്ച വൈകാരികമായ അന്തരീക്ഷം മുതലെടുത്ത് ആരും രാജ്യത്ത് അസ്ഥിരതയുണ്ടാക്കാനോ അക്രമങ്ങൾ അഴിച്ചുവിടാനോ ശ്രമിക്കരുതെന്ന് അദ്ദേഹം കർശന മുന്നറിയിപ്പ് നൽകി. ഇത്തരം നീക്കങ്ങളെ തടയാൻ ജനങ്ങൾ ജാഗ്രത പാലിക്കണമെന്നും അദ്ദേഹം കൂട്ടിച്ചേർത്തു.

ഖാലിദ സിയയെ ബംഗ്ലാദേശിന്റെ രാഷ്ട്രീയ ചരിത്രത്തിലെ ഉജ്ജ്വല നക്ഷത്രമെന്നാണ് യൂനസ് വിശേഷിപ്പിച്ചത്. രാജ്യത്ത് ജനാധിപത്യം പുനഃസ്ഥാപിക്കുന്നതിനും ബഹുകക്ഷി രാഷ്ട്രീയ സംസ്‌കാരം വളർത്തുന്നതിനും അവർ നടത്തിയ പോരാട്ടങ്ങൾ ചരിത്രത്തിൽ എന്നും സ്മരിക്കപ്പെടും. ഏകാധിപത്യത്തിനും ഫാസിസത്തിനുമെതിരെയുള്ള പോരാട്ടത്തിൽ വിട്ടുവീഴ്ചയില്ലാത്ത നിലപാടുകളിലൂടെ അവർ രാജ്യത്തെ പലതവണ സ്വാതന്ത്ര്യത്തിന്റെ പാതയിലേക്ക് നയിച്ചതായും യൂനസ് അനുസ്മരിച്ചു.

ചൊവ്വാഴ്ച പുലർച്ചെ ആറ് മണിയോടെയാണ് വാർദ്ധക്യസഹജമായ അസുഖങ്ങളെത്തുടർന്ന് ഖാലിദ സിയ അന്തരിച്ചത്. ദീർഘകാലമായി ഹൃദ്രോഗം, പ്രമേഹം, കരൾ സംബന്ധമായ അസുഖങ്ങൾ എന്നിവയാൽ അവർ ചികിത്സയിലായിരുന്നു. ഖാലിദ സിയയുടെ നിര്യാണത്തിൽ ബി.എൻ.പി പാർട്ടി ഏഴ് ദിവസത്തെ ദുഃഖാചരണം പ്രഖ്യാപിച്ചിട്ടുണ്ട്. ഈ കാലയളവിൽ പാർട്ടി ഓഫീസുകളിൽ കരിങ്കൊടി ഉയർത്തുകയും പ്രവർത്തകർ കറുത്ത ബാഡ്ജ് ധരിക്കുകയും ചെയ്യും.