വാഷിങ്ടൺ: 2026 നവംബറിൽ നടക്കാനിരിക്കുന്ന ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് ഭൂരിപക്ഷം നഷ്ടപ്പെട്ടാൽ ഡെമോക്രാറ്റുകൾ തന്നെ ഇംപീച്ച് ചെയ്യുമെന്ന് യുഎസ് പ്രസിഡന്റ് ഡൊണാൾഡ് ട്രംപ്. ചൊവ്വാഴ്ച വാഷിങ്ടണിൽ നടന്ന റിപ്പബ്ലിക്കൻ എംപിമാരുടെ യോഗത്തിലാണ് ട്രംപിന്റെ ഈ നിർണ്ണായക പ്രസ്താവന. "നിങ്ങൾ ഇടക്കാല തിരഞ്ഞെടുപ്പിൽ വിജയിക്കണം, ഇല്ലെങ്കിൽ എന്നെ ഇംപീച്ച് ചെയ്യാൻ അവർ ഒരു കാരണം കണ്ടെത്തും," എന്ന് ട്രംപ് എംപിമാരോട് പറഞ്ഞു.(They will impeach me if you don't win the midterm elections, warns Trump)
വെനസ്വേലൻ പ്രസിഡന്റ് നിക്കോളാസ് മഡുറോയെ സൈനിക നടപടിയിലൂടെ പിടികൂടിയത് ഉൾപ്പെടെയുള്ള ട്രംപിന്റെ സമീപകാല നീക്കങ്ങൾ ഭരണഘടനാ വിരുദ്ധമാണെന്ന് ആരോപിച്ച് ഡെമോക്രാറ്റിക് പാർട്ടി രംഗത്തെത്തിയിട്ടുണ്ട്. മേരിലാൻഡിൽ നിന്നുള്ള ഡെമോക്രാറ്റിക് പ്രതിനിധി ഏപ്രിൽ മക്ലൈൻ ഡെലാനി ട്രംപിനെതിരെ ഇംപീച്ച്മെന്റ് നടപടികൾ ഉടൻ ആരംഭിക്കണമെന്ന് പാർട്ടി കോക്കസിനോട് ആവശ്യപ്പെട്ടു കഴിഞ്ഞു.
കോൺഗ്രസിന്റെ അനുമതിയില്ലാതെ വിദേശ രാജ്യത്ത് സൈനിക ഇടപെടൽ നടത്തിയത് അധികാര ദുർവിനിയോഗമാണെന്നാണ് പ്രതിപക്ഷത്തിന്റെ ആരോപണം. യുഎസ് കോൺഗ്രസിലെ നിലവിലെ നേരിയ ഭൂരിപക്ഷം നഷ്ടപ്പെട്ടാൽ ട്രംപിന്റെ ഭരണപരമായ പരിഷ്കാരങ്ങൾ തടസ്സപ്പെടും.
ജനപ്രതിനിധിസഭയിലെ എല്ലാ 435 സീറ്റുകളിലേക്കും സെനറ്റിലെ 100-ൽ 35 സീറ്റുകളിലേക്കുമാണ് നവംബറിൽ തിരഞ്ഞെടുപ്പ് നടക്കുന്നത്. നിലവിൽ ഹൗസിൽ റിപ്പബ്ലിക്കൻ പാർട്ടിക്ക് വളരെ കുറഞ്ഞ ഭൂരിപക്ഷം (മൂന്ന് സീറ്റുകൾ മാത്രം) മാത്രമാണുള്ളത്. ഇത് നഷ്ടപ്പെട്ടാൽ ഇംപീച്ച്മെന്റ് പ്രമേയം പാസാക്കാൻ ഡെമോക്രാറ്റുകൾക്ക് എളുപ്പമാകും.