ധാക്ക: ബംഗ്ലാദേശിലെ മുൻ പ്രധാനമന്ത്രി ഖാലിദ സിയയുടെ മകനും ബിഎൻപി ആക്ടിംഗ് ചെയർമാനുമായ താരീഖ് റഹ്മാൻ (Tarique Rahman) ഡിസംബർ 25-ന് ലണ്ടനിൽ നിന്ന് ധാക്കയിലെത്തും. ഫെബ്രുവരി 12-ന് നടക്കാനിരിക്കുന്ന പൊതുതിരഞ്ഞെടുപ്പിൽ ബിഎൻപിക്ക് ഭൂരിപക്ഷം ലഭിക്കുമെന്നും താരീഖ് റഹ്മാൻ അടുത്ത പ്രധാനമന്ത്രിയാകുമെന്നും റിപ്പോർട്ടുകൾ സൂചിപ്പിക്കുന്നു. വിമാനത്താവളം മുതൽ സ്വീകരണ വേദി വരെ ഏകദേശം 50 ലക്ഷം അണികളെ അണിനിരത്താനാണ് ബിഎൻപി ലക്ഷ്യമിടുന്നത്.
ഷെയ്ഖ് ഹസീന സർക്കാരിന്റെ കാലത്ത് കള്ളപ്പണം വെളുപ്പിക്കൽ, വധശ്രമം തുടങ്ങിയ കേസുകളിൽ താരീഖ് റഹ്മാൻ ശിക്ഷിക്കപ്പെട്ടിരുന്നു. എന്നാൽ ഹസീനയുടെ പുറത്താകലിന് ശേഷം ഈ കേസുകളിൽ നിന്ന് കോടതി ഇയാളെ കുറ്റവിമുക്തനാക്കി. ഇതോടെയാണ് മടക്കത്തിനുള്ള നിയമതടസ്സങ്ങൾ നീങ്ങിയത്.
കഴിഞ്ഞ വർഷം നടന്ന വിദ്യാർത്ഥി പ്രക്ഷോഭത്തെത്തുടർന്ന് ഷെയ്ഖ് ഹസീന ഇന്ത്യയിലേക്ക് പാലായനം ചെയ്തിരുന്നു. നിലവിൽ നോബൽ സമ്മാന ജേതാവ് മുഹമ്മദ് യൂനസിന്റെ നേതൃത്വത്തിലുള്ള ഇടക്കാല സർക്കാരാണ് രാജ്യം ഭരിക്കുന്നത്. ഗുരുതരാവസ്ഥയിൽ ചികിത്സയിൽ കഴിയുന്ന തന്റെ അമ്മ ഖാലിദ സിയയെ കാണുക എന്നതും താരീഖ് റഹ്മാന്റെ പെട്ടെന്നുള്ള മടക്കത്തിന് കാരണമായിട്ടുണ്ട്. ഭാര്യ ഡോ. സുബൈദ റഹ്മാൻ, മകൾ ബീരിസ്റ്റർ സൈമ റഹ്മാൻ എന്നിവരും അദ്ദേഹത്തിനൊപ്പമുണ്ടാകും.
താരീഖ് റഹ്മാന്റെ വരവ് പ്രമാണിച്ച് ധാക്ക വിമാനത്താവളത്തിൽ സന്ദർശകർക്ക് 24 മണിക്കൂർ നിയന്ത്രണം ഏർപ്പെടുത്തിയിട്ടുണ്ട്. അദ്ദേഹത്തിന് വിഐപി സുരക്ഷ നൽകാൻ ഇടക്കാല സർക്കാർ തീരുമാനിച്ചു. ബിഎൻപിയും ജമാഅത്തെ ഇസ്ലാമിയും തമ്മിലുള്ള മത്സരമാണ് വരാനിരിക്കുന്ന തിരഞ്ഞെടുപ്പിലെ പ്രധാന ആകർഷണം.
Tarique Rahman, the acting chairman of the BNP and son of former PM Khaleda Zia, is set to return to Bangladesh on December 25 after 17 years in exile. His return precedes the February general elections, where he is considered a top contender for the Prime Minister post following his acquittal in several high-profile criminal cases. The BNP is organizing a massive homecoming reception, expecting millions of supporters to gather in Dhaka to mark this significant political shift.