സ്വിറ്റ്സർലൻഡിലെ പ്രശസ്തമായ ക്രാൻസ്–മൊണ്ടാന സ്കൈ റിസോർട്ടിലുണ്ടായ സ്ഫോടനത്തിൽ കൊല്ലപ്പെട്ടവരുടെ എണ്ണം 40 ആയി. പുതുവത്സരാഘോഷങ്ങൾക്കിടെ പ്രാദേശിക സമയം പുലർച്ചെ 1.30-ഓടെയാണ് ദുരന്തമുണ്ടായത്. നൂറോളം പേർക്ക് പരിക്കേറ്റതായും ഇതിൽ പലരുടെയും നില ഗുരുതരമാണെന്നും ഇറ്റാലിയൻ വിദേശകാര്യ മന്ത്രാലയം സ്ഥിരീകരിച്ചു.
വാലിസ് കന്റോണിലെ ലെ കോൺസ്റ്റലേഷൻ ബാർ ആൻഡ് ലോഞ്ചിന്റെ ബേസ്മെന്റിലാണ് സ്ഫോടനമുണ്ടായത്. സ്ഫോടനം നടക്കുമ്പോൾ ബാറിൽ 150-ലധികം വിനോദസഞ്ചാരികൾ ഉണ്ടായിരുന്നു. സ്ഫോടനത്തിന് പിന്നാലെ ബാറിൽ ശക്തമായ തീപിടുത്തവുമുണ്ടായി.
സ്ഫോടനത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. പ്രാഥമിക നിഗമന പ്രകാരം ഇതൊരു ഭീകരാക്രമണമല്ലെന്നാണ് പോലീസ് കരുതുന്നത്. ഗ്യാസ് ചോർച്ചയോ മറ്റോ ആണോ അപകടത്തിന് പിന്നിലെന്ന് അന്വേഷിച്ചുവരികയാണ്.
ദുരന്തസ്ഥലത്ത് 10 ഹെലികോപ്റ്ററുകൾ, 40 ആംബുലൻസുകൾ, 150 സന്നദ്ധപ്രവർത്തകർ എന്നിവരുടെ നേതൃത്വത്തിൽ വൻതോതിലുള്ള രക്ഷാപ്രവർത്തനമാണ് നടക്കുന്നത്. പരിക്കേറ്റവരിൽ വിവിധ രാജ്യങ്ങളിൽ നിന്നുള്ള വിനോദസഞ്ചാരികളുണ്ട്. മേഖലയിലെ ആശുപത്രികൾ പരിക്കേറ്റവരെക്കൊണ്ട് നിറഞ്ഞ അവസ്ഥയിലാണെന്ന് ഡോക്ടർമാർ അറിയിച്ചു.
അതേസമയം, രാജ്യത്തിന്റെ വിവിധ ഭാഗങ്ങളിൽ പടരുന്ന കാട്ടുതീയും കടുത്ത വരൾച്ചയും രക്ഷാപ്രവർത്തനത്തിന് വെല്ലുവിളി ഉയർത്തുന്നുണ്ട്. വിദേശകാര്യ മന്ത്രാലയങ്ങൾ വഴി മരിച്ചവരുടെ വിവരങ്ങൾ ശേഖരിച്ചുവരികയാണ്.