ഖാർതൂം: സുഡാനീസ് സായുധ സേനയുമായി (SAF) രണ്ട് വർഷത്തിലേറെയായി നടത്തിയ പോരാട്ടത്തിന് ശേഷം, സുഡാനിൽ വെടിനിർത്തൽ എന്ന അമേരിക്കയുടെ നിർദ്ദേശം അംഗീകരിച്ചതായി സുഡാനിലെ റാപ്പിഡ് സപ്പോർട്ട് ഫോഴ്‌സ് (RSF) അറിയിച്ചതായി അൽ ജസീറ റിപ്പോർട്ട് ചെയ്തു. യുദ്ധത്തിന്റെ വിനാശകരമായ മാനുഷിക പ്രത്യാഘാതങ്ങൾ പരിഹരിക്കുന്നതിനും ജനങ്ങളുടെ സംരക്ഷണം വർദ്ധിപ്പിക്കുന്നതിനുമായി സൗദി അറേബ്യ, ഈജിപ്ത്, യുണൈറ്റഡ് അറബ് എമിറേറ്റ്സ് എന്നിവ ഉൾപ്പെടുന്ന യുഎസ് നേതൃത്വത്തിലുള്ള "ക്വാഡ്" മധ്യസ്ഥ സംഘം നിർദ്ദേശിച്ച "മാനുഷിക വെടിനിർത്തൽ" അംഗീകരിക്കുമെന്ന് അർദ്ധസൈനിക സംഘം വ്യാഴാഴ്ച ഒരു പ്രസ്താവനയിൽ അറിയിച്ചിരുന്നു.
എന്നാൽ, സുഡാനീസ് സൈന്യത്തിൽ നിന്ന് (SAF) ഔദ്യോഗിക പ്രതികരണം ഉടനടി ലഭ്യമായിട്ടില്ല. സന്ധിയിലെത്താനുള്ള ശ്രമങ്ങൾ നടന്നു കൊണ്ടിരിക്കുകയാണെന്നും യുദ്ധം ചെയ്യുന്ന കക്ഷികൾ "തത്വത്തിൽ സമ്മതിച്ചു" എന്നും അൽ ജസീറയുടെ റിപ്പോർട്ട് പ്രകാരം, യുഎസ് മുതിർന്ന ഉപദേഷ്ടാവ് മസാദ് ബൗലോസ് ഏതാനം ദിവസങ്ങൾക്ക് മുൻപ് പറഞ്ഞിരുന്നു.
ഇരുപക്ഷത്തു നിന്നും എതിർപ്പുകൾ രേഖപ്പെടുത്തിയിട്ടില്ലെന്നും സൂക്ഷ്മമായ കാര്യങ്ങളിലാണ് ഇപ്പോൾ ശ്രദ്ധ കേന്ദ്രീകരിക്കുന്നതെന്നും അദ്ദേഹം പറഞ്ഞു. അതേസമയം, ആർഎസ്എഫ് പ്രഖ്യാപനം വരുന്നതിന് തൊട്ടുമുമ്പ് സൈനിക മേധാവി അബ്ദുൽ ഫത്താ അൽ-ബുർഹാൻ ടെലിവിഷൻ പ്രസംഗത്തിൽ തന്റെ സേന "ശത്രുക്കളെ പരാജയപ്പെടുത്താൻ ശ്രമിക്കുകയാണെന്നും" കൊല്ലപ്പെട്ടവർക്ക് വേണ്ടി ഉടൻ പ്രതികാരം ചെയ്യുമെന്നും പ്രഖ്യാപിച്ചിരുന്നു.
വടക്കൻ ഡാർഫർ സംസ്ഥാനത്തെ സുഡാനീസ് സൈന്യത്തിന്റെ അവസാന ശക്തികേന്ദ്രമായ എൽ ഫാഷർ നഗരം ആർഎസ്എഫ് പിടിച്ചെടുത്തതിനെത്തുടർന്ന് വംശഹത്യ ആരോപണങ്ങൾ നേരിടുന്ന സാഹചര്യത്തിലാണ് വെടിനിർത്തലിനുള്ള നീക്കം. എൽ ഫാഷർ പിടിച്ചെടുത്തതിനുശേഷം 70,000-ത്തിലധികം ആളുകൾ പലായനം ചെയ്തതായി യുഎൻ പറയുന്നു. ലൈംഗിക അതിക്രമങ്ങൾ, കൂട്ടക്കൊലകൾ, രോഗികളും ആശുപത്രി ജീവനക്കാരും ഉൾപ്പെടെ 460-ലധികം പേർ കൊല്ലപ്പെട്ടു തുടങ്ങിയ ഞെട്ടിക്കുന്ന റിപ്പോർട്ടുകളും പുറത്തുവന്നിട്ടുണ്ട്. യുദ്ധക്കുറ്റങ്ങൾ ചുമത്തി ഇരുപക്ഷവും കുറ്റാരോപിതരായിരിക്കുന്ന സമയത്ത്, മാനുഷിക സഹായം എത്തിക്കുന്നതിന് വെടിനിർത്തൽ നിർണായകമാകും.
Summary: The paramilitary Rapid Support Forces (RSF) in Sudan have agreed to a humanitarian ceasefire proposed by a US-led "quad" mediator group, potentially halting the two-year-long conflict with the Sudanese Armed Forces (SAF).