ടോക്കിയോ: പശ്ചിമേഷ്യയിലെ യുദ്ധത്തെത്തുടർന്ന് ഭാഗികമായി അടച്ചിട്ടിരിക്കുന്ന ഹോർമുസ് കടലിടുക്കിലൂടെ ജാപ്പനീസ് കപ്പലുകൾക്ക് സുരക്ഷിതമായി കടന്നുപോകാൻ അനുമതി നൽകുമെന്ന് ഇറാൻ വ്യക്തമാക്കി (Strait of Hormuz Iran Japan). തങ്ങളുടെ ശത്രുരാജ്യങ്ങൾക്കും തങ്ങളെ ആക്രമിക്കുന്നവർക്കും മാത്രമേ കടലിടുക്ക് അടച്ചിട്ടുള്ളൂവെന്നും മറ്റ് രാജ്യങ്ങൾക്ക് നിയന്ത്രണങ്ങളോടെ യാത്ര ചെയ്യാമെന്നും ഇറാൻ വിദേശകാര്യ മന്ത്രി അബ്ബാസ് അരാഗ്ചി അറിയിച്ചു. ജപ്പാനിലെ ക്യോഡോ ന്യൂസിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്.
തങ്ങളുടെ ആവശ്യകതയുടെ 90 ശതമാനത്തിലധികം ക്രൂഡ് ഓയിൽ ഇറക്കുമതിക്കായി പശ്ചിമേഷ്യയെ ആശ്രയിക്കുന്ന ജപ്പാനെ സംബന്ധിച്ചിടത്തോളം ഈ തീരുമാനം ഏറെ നിർണ്ണായകമാണ്. ഫെബ്രുവരി 28-ന് അമേരിക്കയും ഇസ്രായേലും ഇറാനെ ആക്രമിച്ചതിനെത്തുടർന്ന് ഹോർമുസ് കടലിടുക്ക് പ്രായോഗികമായി അടഞ്ഞുകിടക്കുകയായിരുന്നു. എന്നാൽ കഴിഞ്ഞ കുറച്ചുദിവസങ്ങളായി ചൈന, ഇന്ത്യ, പാകിസ്ഥാൻ എന്നീ രാജ്യങ്ങളിലെ കപ്പലുകൾക്ക് ഇറാൻ യാത്രാനുമതി നൽകിയിരുന്നു. ഈ പട്ടികയിലേക്കാണ് ഇപ്പോൾ ജപ്പാനും ഉൾപ്പെടുന്നത്.
സുരക്ഷിതമായ യാത്രയ്ക്കായി ജപ്പാൻ ഇറാനുമായി നേരിട്ട് ബന്ധപ്പെടണമെന്നും റൂട്ട് സംബന്ധിച്ച ചർച്ചകൾക്ക് രാജ്യം തയ്യാറാണെന്നും അരാഗ്ചി പറഞ്ഞു. ഇറാന്റെ തീരത്തോട് ചേർന്ന് ഒരു ‘സുരക്ഷിത ഇടനാഴി’ രൂപപ്പെട്ടുവരികയാണെന്ന് കപ്പൽ ഗതാഗത വിവരങ്ങൾ നൽകുന്ന ലോയ്ഡ്സ് ലിസ്റ്റ് റിപ്പോർട്ട് ചെയ്യുന്നു. ഇതിനോടകം പത്തോളം കപ്പലുകൾ ഈ പാതയിലൂടെ സഞ്ചരിച്ചു കഴിഞ്ഞു. ഫ്രാൻസ്, ജർമ്മനി, ഇറ്റലി ഉൾപ്പെടെയുള്ള മറ്റ് രാജ്യങ്ങളും തങ്ങളുടെ കപ്പലുകൾക്ക് സുരക്ഷിത പാത ഒരുക്കുന്നതിനായി ഇറാനുമായി ചർച്ചകൾ നടത്തിവരികയാണ്.
Summary: Iran has announced that Japanese ships will be allowed to transit the strategic Strait of Hormuz, clarifying that the waterway is only closed to its “enemies.” This selective blockade comes as Japan, which relies on the Middle East for 90% of its crude oil, seeks safe passage amid the ongoing US-Israel conflict with Iran.
