മാഡ്രിഡ്: ദക്ഷിണ സ്പെയിനിൽ രണ്ട് അതിവേഗ ട്രെയിനുകൾ കൂട്ടിയിടിച്ചുണ്ടായ ദാരുണമായ അപകടത്തിൽ മരിച്ചവരുടെ എണ്ണം 39 ആയി ഉയർന്നതായി സ്പാനിഷ് മാധ്യമങ്ങൾ റിപ്പോർട്ട് ചെയ്തു (Spain Train Crash). ഞായറാഴ്ച വൈകുന്നേരം പ്രാദേശിക സമയം 7:45-ഓടെ കോർഡോബ പ്രവിശ്യയിലെ ആദമുസിന് സമീപമാണ് അപകടം നടന്നത്. പാളം തെറ്റിയ ഒരു അതിവേഗ ട്രെയിനിലേക്ക് എതിരെ വന്ന മറ്റൊരു ട്രെയിൻ ഇടിച്ചു കയറുകയായിരുന്നുവെന്നാണ് പ്രാഥമിക വിവരം. അപകടത്തിൽ 152 പേർക്ക് പരിക്കേറ്റിട്ടുണ്ട്, ഇതിൽ പലരുടെയും നില ഗുരുതരമാണ്.
അപകടസമയത്ത് രണ്ട് ട്രെയിനുകളിലുമായി ഏകദേശം 400-ഓളം യാത്രക്കാരുണ്ടായിരുന്നു. വാരാന്ത്യ അവധി കഴിഞ്ഞ് മടങ്ങുന്നവരാണ് യാത്രക്കാരിൽ ഭൂരിഭാഗവും. അപകടത്തെത്തുടർന്ന് തകർന്ന കോച്ചുകൾക്കിടയിൽ കുടുങ്ങിക്കിടന്നവരെ വെളിച്ച സംവിധാനങ്ങൾ ഉപയോഗിച്ച് രാത്രി വൈകിയും രക്ഷാപ്രവർത്തകർ പുറത്തെടുത്തു. തകർന്ന ജനാലകളിലൂടെ പുറത്തുകടന്ന യാത്രക്കാരുടെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. സ്പെയിൻ പ്രധാനമന്ത്രി പെഡ്രോ സാഞ്ചസ് തന്റെ ഔദ്യോഗിക പരിപാടികളെല്ലാം റദ്ദാക്കി അപകടസ്ഥലത്തേക്ക് തിരിച്ചു.
ദുരന്തത്തെത്തുടർന്ന് സ്പെയിനിലെ റെയിൽ ഗതാഗതം താറുമാറായിരിക്കുകയാണ്. മാഡ്രിഡിൽ നിന്ന് സെവില്ലെ, ഗ്രനാഡ തുടങ്ങി തെക്കൻ ആൻഡലൂഷ്യ മേഖലയിലേക്കുള്ള ഇരുന്നൂറിലധികം ട്രെയിൻ സർവീസുകൾ തിങ്കളാഴ്ച റദ്ദാക്കി. അപകടത്തിന്റെ കൃത്യമായ കാരണം ഇതുവരെ കണ്ടെത്താനായിട്ടില്ലെന്ന് ഗതാഗത മന്ത്രി ഓസ്കാർ പുവെന്റെ അറിയിച്ചു. സംഭവത്തിൽ ഉന്നതതല അന്വേഷണത്തിന് സർക്കാർ ഉത്തരവിട്ടു. സ്പെയിൻ സമീപകാലത്ത് കണ്ട ഏറ്റവും വലിയ ട്രെയിൻ അപകടങ്ങളിൽ ഒന്നാണിത്.
The death toll from a high-speed train collision near Adamuz in southern Spain has risen to 39, with 152 others injured. The disaster occurred when a derailing train collided with an oncoming one, leading to the cancellation of over 200 train services between Madrid and the Andalusia region. Prime Minister Pedro Sanchez has cleared his schedule to manage the crisis, while authorities launch a comprehensive investigation into the cause of the crash.