സോൾ : നിർമിത ബുദ്ധി (AI) മേഖലയിൽ സമഗ്രമായ നിയമങ്ങൾ നടപ്പാക്കാൻ ഒരുങ്ങി ദക്ഷിണ കൊറിയ. 2026 ജനുവരി 22 മുതൽ നിയമം പ്രാബല്യത്തിൽ വരുന്നതോടെ, സമഗ്രമായ ഒരു എ ഐ നിയന്ത്രണ ചട്ടക്കൂട് നിലവിൽ വരുന്ന ലോകത്തിലെ ആദ്യത്തെ രാജ്യമായി ദക്ഷിണ കൊറിയ മാറും. യൂറോപ്യൻ യൂണിയൻ നിയമനിർമ്മാണം പാസ്സാക്കിയെങ്കിലും അത് ഓഗസ്റ്റിൽ മാത്രമേ നിലവിൽ വരൂ.(South Korea prepares for comprehensive legislation in AI)
എ ഐ ഫ്രെയിംവർക്ക് ആക്ട് എന്ന് അറിയപ്പെടുന്ന ഈ നിയമത്തിൽ ഉൾപ്പെടുന്ന പ്രധാന വ്യവസ്ഥകൾ ദേശീയ AI കമ്മിറ്റി രൂപീകരിക്കുക, അടുത്ത മൂന്ന് വർഷത്തേക്കുള്ള അടിസ്ഥാന AI പ്ലാനുകൾ തയ്യാറാക്കുക, AI സംവിധാനങ്ങളുടെ സുരക്ഷയും സുതാര്യതയും സംബന്ധിച്ച ആവശ്യകതകൾ നിർബന്ധമാക്കുക എന്നിവയാണ്.
വ്യവസായ മേഖലയുടെ ആശങ്ക
എ ഐ നിയമനിർമ്മാണത്തെ ബിസിനസ് മേഖല വലിയ ആശങ്കയോടെയാണ് നോക്കിക്കാണുന്നത്. കർശനമായ നിയന്ത്രണങ്ങൾ വ്യവസായ വളർച്ചയെ തടസ്സപ്പെടുത്തുമെന്നും, പ്രത്യേകിച്ചും ചെറുകിട സ്ഥാപനങ്ങളെയും സ്റ്റാർട്ടപ്പുകളെയും പ്രതികൂലമായി ബാധിക്കുമെന്നുമാണ് ഇവരുടെ ഭയം. നിയമം പ്രാബല്യത്തിൽ വരുമ്പോൾ ചില കമ്പനികൾക്ക് അവരുടെ നിലവിലെ സേവനങ്ങൾ നിർത്തിവെക്കുകയോ വലിയ മാറ്റങ്ങൾ വരുത്തുകയോ ചെയ്യേണ്ടതായി വരും.
സ്റ്റാർട്ടപ്പ് അലയൻസ് അടുത്തിടെ നടത്തിയ സർവേ അനുസരിച്ച്, സ്ഥിതി ആശങ്കാജനകമാണ്. സർവേയിൽ പങ്കെടുത്ത 101 പ്രാദേശിക എ ഐ സ്റ്റാർട്ടപ്പുകളിൽ 98 ശതമാനവും പുതിയ നിയമം പാലിക്കുന്നതിൽ സജ്ജരല്ല. 48.5 ശതമാനം ആളുകൾക്ക് നിയമത്തെക്കുറിച്ച് വ്യക്തമായ ധാരണ പോലുമില്ല. നിയമങ്ങൾ കർശനമാവുകയാണെങ്കിൽ, വ്യവസായങ്ങൾക്ക് സ്വദേശത്തേക്കാൾ കൂടുതൽ അവസരങ്ങൾ വിദേശ രാജ്യങ്ങളിൽ ഒരുങ്ങുമെന്നാണ് സാങ്കേതിക വിദഗ്ധർ മുന്നറിയിപ്പ് നൽകുന്നത്.