മ്യൂണിക്ക്: അസാമാന്യമായ ശാരീരിക കരുത്തുകൊണ്ട് ലോകത്തെ അമ്പരപ്പിച്ചിരിക്കുകയാണ് ജർമ്മൻ സ്ട്രോങ്ങ് വുമൺ സീന റുപ്പന്തൽ (Sina Ruppenthal). 10 പുരുഷന്മാരെ വെറും 37.44 സെക്കൻഡുകൾക്കുള്ളിൽ ഉയർത്തി താഴെയിട്ടാണ് സീന പുതിയ ഗിന്നസ് ലോക റെക്കോർഡ് സ്ഥാപിച്ചത് (Sina Ruppenthal Guinness World Record). സോഷ്യൽ മീഡിയയിൽ വൈറലായ ഈ വീഡിയോ കായിക പ്രേമികൾക്കിടയിൽ വലിയ ചർച്ചയായിരിക്കുകയാണ്.
മ്യൂണിക്കിൽ നടന്ന ‘ഡൈ ഗ്രോസ് ഷോ ഡെർ വെൽറ്റ് റെക്കോർഡ്’ (Die große Show der Weltrekorde) എന്ന പരിപാടിക്കിടെയാണ് ഈ പ്രകടനം നടന്നത്. ഓരോ പുരുഷനെയും തോളിലേറ്റി വേഗത്തിൽ മറുവശത്തേക്ക് എറിയുന്നതായിരുന്നു വെല്ലുവിളി. ശാരീരിക കരുത്തിന് പുറമെ മികച്ച ഏകോപനവും വേഗതയും ആവശ്യമുള്ള ഈ കടമ്പ സെക്കൻഡുകളുടെ വ്യത്യാസത്തിലാണ് സീന പൂർത്തിയാക്കിയത്. ഗിന്നസ് വേൾഡ് റെക്കോർഡ്സിന്റെ ഔദ്യോഗിക ഇൻസ്റ്റാഗ്രാം പേജിലൂടെയാണ് ഈ വീഡിയോ പുറത്തുവിട്ടത്.
ആരാണ് സീന റുപ്പന്തൽ?
ജർമ്മനിയിൽ നിന്നുള്ള പ്രമുഖ സ്ട്രോങ്ങ് വുമൺ അത്ലറ്റും സ്പോർട്സ് സയന്റിസ്റ്റുമാണ് സീന. ലോകത്തിലെ ഏറ്റവും കരുത്തരായ നാലാമത്തെ ‘നാച്ചുറൽ വുമൺ’ എന്ന പദവിയും സീനയ്ക്കുണ്ട്. ജർമ്മനിയിൽ കരുത്തുറ്റ കായിക ഇനങ്ങളിൽ നിരവധി റെക്കോർഡുകൾ ഇവരുടെ പേരിലുണ്ട്. ‘സ്ട്രോങ്ങ് വുമൺ ജർമ്മനി’ എന്ന സംഘടനയുടെ സ്ഥാപക അംഗം കൂടിയാണ് സീന.
സോഷ്യൽ മീഡിയയിൽ വീഡിയോയ്ക്ക് വൻ പ്രതികരണമാണ് ലഭിക്കുന്നത്. പുരുഷന്മാരെ ഇത്ര ലാഘവത്തോടെ ഉയർത്തി എറിയുന്ന സീനയുടെ കരുത്തിനെയും നിശ്ചയദാർഢ്യത്തെയും പലരും പ്രശംസിച്ചു. നർമ്മം കലർന്ന കമന്റുകളുമായി നിരവധി പേർ രംഗത്തെത്തിയിട്ടുണ്ട്.
