വാഷിംഗ്ടൺ: അമേരിക്കൻ പ്രസിഡന്റിന്റെ ഔദ്യോഗിക വസതിയായ വൈറ്റ് ഹൗസിന് സമീപമുണ്ടായ വെടിവയ്പിൽ നാഷണൽ ഗാർഡ്സ് അംഗങ്ങളായ രണ്ട് സൈനികർക്ക് ഗുരുതരമായി പരിക്കേറ്റു. തലയ്ക്ക് വെടിയേറ്റ ഇരുവരെയും ഉടൻ തന്നെ ആശുപത്രിയിലേക്ക് മാറ്റി. വെടിവയ്പിനെ തുടർന്ന് വൈറ്റ് ഹൗസ് അടച്ചുപൂട്ടുകയും പ്രദേശത്ത് സുരക്ഷ ശക്തമാക്കുകയും ചെയ്തിട്ടുണ്ട്. ആക്രമിയെന്ന് സംശയിക്കുന്നയാളെ പോലീസ് കസ്റ്റഡിയിലെടുത്തു. ഇയാൾക്കും പരിക്കുകളുണ്ട്.(Shooting near the White House, 2 soldiers seriously injured)
വൈറ്റ് ഹൗസിൽ നിന്ന് അധികം അകലെയല്ലാത്ത ഒരു മെട്രോ സ്റ്റോപ്പിന് സമീപത്ത് വെച്ചാണ് സംഭവം നടന്നത്. അക്രമി നേരിട്ട് എത്തി വെടിയുതിർക്കുകയായിരുന്നു. ഇയാൾ 10 മുതൽ 15 തവണ വെടിയുതിർത്തതായി റിപ്പോർട്ടുണ്ട്. പരിക്കേറ്റ സൈനികരിൽ ഒരാൾ സ്ത്രീയാണ്. ഇരുവരും വെസ്റ്റ് വെർജീനിയ സ്വദേശികളാണ്.
പോലീസ് വിലയിരുത്തുന്നതനുസരിച്ച്, സംഭവം സൈനികരെ ലക്ഷ്യമിട്ടുള്ള ആക്രമണമാണ്. ആക്രമിയെ കസ്റ്റഡിയിൽ എടുത്തതായി എഫ്.ബി.ഐ. ഡയറക്ടർ കാഷ് പട്ടേൽ സ്ഥിരീകരിച്ചു. അക്രമിയെന്ന് സംശയിക്കുന്ന വ്യക്തി 2021-ൽ അമേരിക്കയിൽ എത്തിയ 29 വയസ്സുള്ള അഫ്ഗാൻ പൗരനാണ് എന്നാണ് അമേരിക്കൻ മാധ്യമങ്ങൾ റിപ്പോർട്ട് ചെയ്യുന്നത്. ഇയാൾ ഒറ്റയ്ക്കാണ് പ്രവർത്തിച്ചതെന്നാണ് പ്രാഥമിക വിലയിരുത്തൽ.
വെടിവയ്പ്പ് ഒരു ഭീകരാക്രമണമായി അന്വേഷിക്കുകയാണെന്ന് നീതിന്യായ വകുപ്പിലെ ഉദ്യോഗസ്ഥരെ ഉദ്ധരിച്ച് റിപ്പോർട്ടുകളുണ്ട്. സംഭവം നടക്കുമ്പോൾ പ്രസിഡന്റ് ഡൊണാൾഡ് ട്രംപ് വൈറ്റ് ഹൗസിൽ ഉണ്ടായിരുന്നില്ല. അതേസമയം, വൈറ്റ് ഹൗസ് പരിസരത്തേക്ക് 500 നാഷണൽ ഗാർഡിനെ അയക്കണമെന്ന് ഡൊണാൾഡ് ട്രംപ് നിർദ്ദേശിച്ചതായി ഡിഫൻസ് സെക്രട്ടറി പീറ്റെ ഹെഗ്സേത്ത് വിശദമാക്കി.
പരിക്കേറ്റ സൈനികർ കൊല്ലപ്പെട്ടതായി വെസ്റ്റ് വെർജീനിയ ഗവർണർ പാട്രിക് മോറിസെ നേരത്തെ പ്രതികരിച്ചിരുന്നെങ്കിലും, നിലവിൽ ഇരുവരും ഗുരുതര പരിക്കുകളോടെ ചികിത്സയിലാണെന്നാണ് ഔദ്യോഗിക വിവരങ്ങൾ.