കോപ്പൻഹേഗൻ: ഗ്രീൻലൻഡ് പിടിച്ചെടുക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണിക്ക് കടുത്ത ഭാഷയിൽ തിരിച്ചടി നൽകി ഡെന്മാർക്ക്. യുഎസ് സൈന്യം ഗ്രീൻലൻഡിലേക്ക് അതിക്രമിച്ചു കയറാൻ ശ്രമിച്ചാൽ, മുകളിൽ നിന്നുള്ള ഉത്തരവിനായി കാത്തുനിൽക്കാതെ "ആദ്യം വെടിവെക്കുക" എന്ന നയം സ്വീകരിക്കുമെന്ന് ഡാനിഷ് പ്രതിരോധ മന്ത്രാലയം വ്യക്തമാക്കി.(Shoot first, questions later, Denmark to Trump)
രാജ്യം അധിനിവേശ ഭീഷണി നേരിട്ടാൽ സൈനികർക്ക് നേരിട്ട് തിരിച്ചടിക്കാമെന്ന് വ്യവസ്ഥ ചെയ്യുന്ന 1952-ലെ നിയമം ഇപ്പോഴും പ്രാബല്യത്തിലുണ്ടെന്ന് ഡാനിഷ് സർക്കാർ ഓർമ്മിപ്പിച്ചു. അധിനിവേശമുണ്ടായാൽ മറുപടി വെടിയുണ്ടകൾ കൊണ്ടായിരിക്കുമെന്ന് ഡാനിഷ് പത്രമായ ബെർലിങ്സ്കെ മുഖേന മന്ത്രാലയം മുന്നറിയിപ്പ് നൽകി.
ഗ്രീൻലൻഡ് വിൽപ്പനയ്ക്കുള്ളതല്ലെന്നും ഡെന്മാർക്കിന്റെ അവിഭാജ്യ ഘടകമാണെന്നും പ്രധാനമന്ത്രി മെറ്റെ ഫ്രെഡറിക്സൺ ആവർത്തിച്ചു. യുഎസിന്റെ ഭാഗത്തുനിന്ന് ഏതെങ്കിലും തരത്തിലുള്ള സൈനിക നീക്കം ഉണ്ടായാൽ അത് നാറ്റോ സഖ്യത്തിന്റെ തകർച്ചയ്ക്ക് കാരണമാകുമെന്നും അവർ കൂട്ടിച്ചേർത്തു.
ആർട്ടിക് മേഖലയിലെ ഭൗമരാഷ്ട്രീയ പ്രാധാന്യമാണ് ട്രംപിനെ ഗ്രീൻലൻഡിലേക്ക് ആകർഷിക്കുന്നത്. ആർട്ടിക് മേഖലയിൽ റഷ്യയുടെയും ചൈനയുടെയും സ്വാധീനം വർദ്ധിക്കുന്നത് തടയാൻ ഗ്രീൻലൻഡിന്റെ നിയന്ത്രണം യുഎസിന് അത്യാവശ്യമാണെന്ന് ട്രംപ് കരുതുന്നു. ഗ്രീൻലൻഡ് പിടിച്ചെടുക്കാൻ സൈനിക ശക്തി ഉപയോഗിക്കുന്നത് പരിഗണനയിലാണെന്ന് വൈറ്റ് ഹൗസ് വക്താവ് കരോലിൻ ലീവിറ്റും സ്ഥിരീകരിച്ചിട്ടുണ്ട്.