2000 ഡിസംബർ 30. കൃത്യം ഇരുപത്തിയഞ്ച് വർഷങ്ങൾക്ക് മുൻപ്. ടോക്കിയോ നഗരം പുതുവർഷത്തെ വരവേൽക്കാനുള്ള ഒരുക്കത്തിലായിരുന്നു. എന്നാൽ ഒരു രാജ്യത്തിന്റെ ഉറക്കം കെടുത്തിയ നാളെയിലേക്കാണ് ജപ്പാൻ കണ്ണ് തുറന്നത്. ടോക്കിയോയിലെ സെറ്റഗായ പട്ടണത്തിൽ, ഒരു കുടുംബത്തിലെ നാലു പേരെ മരിച്ച നിലയിൽ കണ്ടെത്തി. ഭാര്യയെയും ഭർത്താവിനെയും രണ്ടു പിഞ്ചു കുഞ്ഞുങ്ങളെയും ആരോ അതിക്രൂരമായി കൊലപ്പെടുത്തിയിരിക്കുന്നു. നല്ല നാളയുടെ പ്രതീക്ഷയിൽ നിദ്രയിലാണ്ട ആ കൊച്ചു കുടുംബം ഏതോ ഒരു കൊലയാളിയുടെ നീചകൃത്യങ്ങൾക്ക് ഇരയായി. ഈ വാർത്ത കേട്ടവർക്ക് ആർക്കും തങ്ങളുടെ കാതുകളെ വിശ്വസിക്കാൻ കഴിഞ്ഞില്ല. തങ്ങൾ കേട്ടതൊക്കെയും ദുഃസ്വപ്നം മാത്രമായിരിക്കണം എന്ന് കരുതിയവരും ഏറെയാണ്. ആരാണ് ആ കൊലയാളി? അയാൾ എന്തിനു വേണ്ടി ഒരു കുടുംബത്തെ ഇല്ലാതെയാക്കി? സന്തുഷ്ടമായി കഴിഞ്ഞ ആ കുടുംബത്തെ ഇല്ലാതാക്കിയതിലൂടെ ആ കൊലയാളിക്ക് എന്ത് ലഭിച്ചു? ഇങ്ങനെ സെറ്റഗായ കൂട്ടക്കൊല മുന്നോട്ടുവയ്ക്കുന്നു ചോദ്യങ്ങൾ ഏറെയാണ്. (Setagaya Family Murder)
മിയാസാവ കുടുംബം
മിക്കിയോ മിയാസാവയും കുടുംബവും ആ നാട്ടുകാർക്ക് ഏറെ പ്രിയപ്പെട്ടവരായിരുന്നു. 44 വയസ്സുകാരനായ മിക്കിയോ ഒരു പ്രമുഖ ബ്രിട്ടീഷ് കൺസൾട്ടിംഗ് സ്ഥാപനത്തിലായിരുന്നു ജോലി ചെയ്തിരുന്നത്. അദ്ദേഹത്തിന്റെ ഭാര്യയായ യസുകോയാകട്ടെ വീടിനടുത്ത് തന്നെ ഒരു ട്യൂഷൻ സെന്റർ നടത്തിവരികയായിരുന്നു. അവരുടെ ലോകം എട്ടു വയസ്സുകാരിയായ നീനയിലും ആറു വയസ്സുകാരനായ റെയിയുമായിരുന്നു. നീന മിടുക്കിയായ ഒരു വിദ്യാർത്ഥിനിയും റെയി നഴ്സറിയിൽ പഠിക്കുന്ന നിഷ്കളങ്കനായ ഒരു ബാലനുമായിരുന്നു. സെറ്റഗായയിലെ ആ വീട് എപ്പോഴും ആ കുട്ടികളുടെ ചിരിയും കളികളും കൊണ്ട് മുഖരിതമായിരുന്നു. അത്രമേൽ സ്നേഹത്തോടെയും സന്തോഷത്തോടെയും കഴിഞ്ഞിരുന്ന അവർക്ക് ശത്രുക്കളുണ്ടാകുമെന്ന് അയൽവാസികൾക്ക് പോലും ചിന്തിക്കാൻ കഴിയുമായിരുന്നില്ല.
എന്നാൽ ആ സമാധാനപരമായ ജീവിതത്തിന് വിള്ളൽ വീഴ്ത്തിയത് സമീപത്തുണ്ടായിരുന്ന ഒരു പാർക്കിനെ ചൊല്ലിയുള്ള തർക്കങ്ങളാണെന്ന് ചിലർ കരുതുന്നു. മിയാസാവ കുടുംബം താമസിച്ചിരുന്ന വീടിന് തൊട്ടടുത്തുള്ള പാർക്ക് വികസിപ്പിക്കുന്നതിന്റെ ഭാഗമായി അവിടുത്തെ പല വീടുകളും ഒഴിഞ്ഞുപോയിരുന്നു. ഏറ്റവും ഒടുവിൽ അവിടെ അവശേഷിച്ച ചുരുക്കം കുടുംബങ്ങളിൽ ഒന്നായിരുന്നു മിയാസാവയുടേത്. താമസം മാറാനുള്ള തയ്യാറെടുപ്പുകൾക്കിടയിലാണ് വിധി ആ കുടുംബത്തെ കൊലയാളിയുടെ രൂപത്തിൽ തേടിയെത്തിയത്. ആരെയും ദ്രോഹിക്കാത്ത, സ്വന്തം ലോകത്ത് ഒതുങ്ങിക്കഴിഞ്ഞിരുന്ന ആ കുടുംബത്തോട് ഇത്രയും വലിയ പക തീർക്കാൻ മാത്രം ആർക്കാണ് സാധിക്കുക എന്നത് ഇന്നും ഉത്തരം കിട്ടാത്ത ചോദ്യമായി അവശേഷിക്കുന്നു.
ആ കറുത്ത രാത്രി
ഡിസംബർ 30-ന് രാത്രി പതിനൊന്നു മണി കഴിഞ്ഞു കാണും. വീടിന്റെ രണ്ടാം നിലയിലെ കുളിമുറിയുടെ ജനാലയിലൂടെ കറുത്ത വസ്ത്രം ധരിച്ച ഒരാൾ അകത്തുകടക്കുന്നു. ആ കൊലയാളി ആദ്യം ലക്ഷ്യം വെച്ചത് ഉറങ്ങിക്കിടക്കുകയായിരുന്ന ആറു വയസ്സുകാരൻ റെയിയെ ആയിരുന്നു. ആ പിഞ്ചുകുഞ്ഞിനെ ശ്വാസം മുട്ടിച്ചു കൊന്ന ശേഷം, താഴത്തെ നിലയിൽ ജോലിയിലായിരുന്ന മിക്കിയോയെ കൊലയാളി ആക്രമിച്ചു. തന്റെ കുടുംബത്തെ രക്ഷിക്കാൻ മിക്കിയോ ആ കൊലയാളിയോട് ധീരമായി പൊരുതിയെങ്കിലും അക്രമിയുടെ കഠാരയ്ക്ക് മുന്നിൽ ആ മനുഷ്യന് കീഴടങ്ങേണ്ടി വന്നു. കൊലയാളി മിക്കിയോയുടെ തലയിലും കഴുത്തിലും നെഞ്ചിലും കൈകളിലും കാലുകളിലും കുത്തി ഗുരുതരമായി മുറിവേൽപ്പിച്ചു. ശേഷം, വീട്ടിലെ മുകൾനിലയിൽ ഒളിച്ചിരുന്ന യസുകോയെയും മകൾ നീനയെയും ക്രൂരമായി കുത്തിക്കൊലപ്പെടുത്തി. ഡിസംബർ 31-ന് രാവിലെ മകൾ യസുകോയെ ഫോണിൽ വിളിച്ചിട്ട് കിട്ടാതെ വന്നപ്പോൾ തൊട്ടടുത്ത വീട്ടിൽ താമസിച്ചിരുന്ന മാതാവ് നേരിട്ടെത്തിയപ്പോഴാണ് ചോരയിൽ കുളിച്ചു കിടക്കുന്ന ആ നാല് മൃതദേഹങ്ങൾ കാണുന്നത്. പുതുവർഷത്തെ വരവേൽക്കാൻ ഒരുങ്ങിയ ലോകത്തിന് മുന്നിലേക്ക് ആ വൃദ്ധയ്ക്ക് വിളിച്ചു പറയേണ്ടി വന്നത് സ്വന്തം കുടുംബത്തിന്റെ മരണ വാർത്തയായിരുന്നു. വിവരം അറിഞ്ഞ് ഉടൻ വലിയൊരു പോലീസ് സംഘം തന്നെ അവിടേക്ക് എത്തുന്നു.
അസാധാരണ കൊലയാളി
ഈ കേസിനെ ലോകമെമ്പാടുമുള്ള കുറ്റാന്വേഷകരെ അമ്പരപ്പിക്കുന്നത് കൊലപാതകത്തിന് ശേഷം പ്രതി ആ വീട്ടിൽ പുലർത്തിയ അസാധാരണമായ പെരുമാറ്റമാണ്. കൃത്യം നടത്തിയ ശേഷം സംഭവസ്ഥലത്ത് നിന്നും രക്ഷപ്പെടുന്നതിന് പകരം, ഏകദേശം പത്തു മണിക്കൂറോളം അയാൾ ആ വീട്ടിനുള്ളിൽ ചിലവഴിച്ചു. ഫ്രിഡ്ജിലിരുന്ന ഐസ്ക്രീമും പഴങ്ങളും കഴിച്ചും, മിക്കിയോയുടെ കമ്പ്യൂട്ടറിൽ ഇന്റർനെറ്റ് ഉപയോഗിച്ചും അയാൾ അവിടെ സമയം തള്ളിനീക്കി. കൊലപാതകത്തിനിടയിൽ തന്റെ കൈയ്യിലുണ്ടായ മുറിവുകൾ ആ വീട്ടിലെ ഫസ്റ്റ് എയ്ഡ് കിറ്റ് ഉപയോഗിച്ച് അയാൾ സ്വയം ചികിത്സിച്ചു. ധരിച്ചിരുന്ന വസ്ത്രങ്ങളും ബാഗും കത്തിയും അവിടെ ഉപേക്ഷിച്ചാണ് കൊലയാളി ഒടുവിൽ കടന്നുകളഞ്ഞത്. ഇത്രയധികം തെളിവുകൾ ഒരിടത്ത് അവശേഷിപ്പിച്ചിട്ടും അയാൾ ആരാണെന്ന് കണ്ടെത്താൻ പോലീസിന് കഴിഞ്ഞില്ല എന്നത് ഇന്നും ഒരു ചോദ്യമായി അവശേഷിക്കുന്നു.
കഴിഞ്ഞ 25 വർഷത്തിനിടയിൽ ഏകദേശം മൂന്ന് ലക്ഷത്തോളം പോലീസുകാരാണ് ഈ കേസിനു വേണ്ടി പ്രവർത്തിച്ചത്. ആധുനികമായ ഡിഎൻഎ പരിശോധനയിലൂടെ കൊലയാളി ഒരു ഏഷ്യൻ-യൂറോപ്യൻ വംശജനാണെന്ന് തിരിച്ചറിഞ്ഞിട്ടുണ്ട്. പ്രതി ഉപേക്ഷിച്ചുപോയ ബാഗിൽ നിന്ന് കണ്ടെത്തിയ മണൽത്തരികൾക്ക് അമേരിക്കയിലെ കാലിഫോർണിയയിലുള്ള ഒരു സൈനിക താവളത്തിലെ മണ്ണുമായി സാമ്യമുള്ളതായി കണ്ടെത്തി. 2025-ലും ജപ്പാൻ പോലീസ് ഈ കേസ് അവസാനിപ്പിച്ചിട്ടില്ല, പ്രതിയെ പിടികൂടാൻ സഹായിക്കുന്നവർക്ക് ഏകദേശം 20 മില്യൺ യെൻ പ്രതിഫലമാണ് സർക്കാർ പ്രഖ്യാപിച്ചിരിക്കുന്നത്. സാങ്കേതികവിദ്യ ഇത്രയേറെ പുരോഗമിച്ച ഈ കാലഘട്ടത്തിലും, ആ കൊലയാളി ഒരു നിഴലായി ഇന്നും എവിടെയോ ഒളിച്ചിരിക്കുന്നു. നീതി ലഭിക്കാത്ത മിയാസാവ കുടുംബത്തിന്റെ ഓർമ്മകൾക്ക് മുന്നിൽ സെറ്റഗായയിലെ ആ വീട് ഇന്നും ഒരു ചോദ്യചിഹ്നമായി നിലകൊള്ളുന്നു.
The Setagaya Family Murder remains Japan's most haunting cold case, where a family of four was brutally killed in their home on December 30, 2000. Despite leaving behind an unprecedented amount of physical evidence—including DNA, clothing, and digital footprints—the killer stayed in the house for hours and managed to vanish without a trace. As of late 2025, modern forensic advancements suggest the perpetrator has mixed international heritage, yet the mystery remains unsolved even after 25 years of investigation.