റിയാദ്: സൗദി അറേബ്യയിൽ സംഘടിത ഭിക്ഷാടനത്തിലും കുറ്റകൃത്യങ്ങളിലും ഏർപ്പെട്ട 24,000 പാകിസ്ഥാൻ പൗരന്മാരെ അധികൃതർ നാടുകടത്തി. ടൂറിസ്റ്റ് വിസകൾ ദുരുപയോഗം ചെയ്ത് രാജ്യത്തെത്തുന്നവർ ഭിക്ഷാടന മാഫിയയുടെ ഭാഗമാകുന്നത് വർദ്ധിച്ച സാഹചര്യത്തിലാണ് സൗദിയുടെ കർശന നടപടി. സൗദിക്ക് പിന്നാലെ യുഎഇ ഉൾപ്പെടെയുള്ള മറ്റ് ഗൾഫ് രാജ്യങ്ങളും പാക് പൗരന്മാർക്കെതിരെയുള്ള പരിശോധനയും വിസ നിയന്ത്രണങ്ങളും കർശനമാക്കിയിട്ടുണ്ട്.(Saudi Arabia deports 24,000 Pakistani citizens)
രാജ്യത്തെത്തുന്ന വിദേശികൾ സംഘടിത കുറ്റകൃത്യങ്ങളിൽ ഏർപ്പെടുന്നത് സുരക്ഷാ ഭീഷണിയാണെന്ന് സൗദി അധികൃതർ വിലയിരുത്തുന്നു. കഴിഞ്ഞ വർഷം തന്നെ ഈ വിഷയത്തിൽ പാകിസ്ഥാന് സൗദി മുന്നറിയിപ്പ് നൽകിയിരുന്നു. ഈ വർഷം മാത്രം 24,000 പാകിസ്ഥാനികളെ സൗദിയിൽ നിന്ന് നാടുകടത്തി. യുഎഇ ഏകദേശം 6,000 പേരെ നാടുകടത്തുകയും പുതിയ വിസകൾക്ക് കർശന നിയന്ത്രണം ഏർപ്പെടുത്തുകയും ചെയ്തു. അസർബൈജാൻ 2,500 പാക് പൗരന്മാരെ ഭിക്ഷാടനക്കുറ്റത്തിന് പുറത്താക്കി.
വിദേശരാജ്യങ്ങളിൽ പാക് പൗരന്മാർ നടത്തുന്ന ഇത്തരം പ്രവൃത്തികൾ രാജ്യത്തിന്റെ പ്രതിച്ഛായയെ സാരമായി ബാധിക്കുന്നുവെന്ന് പാക് അധികൃതർ സമ്മതിച്ചു. അനധികൃത ഭിക്ഷാടന സംഘങ്ങൾ പാകിസ്ഥാന്റെ അന്തസ്സിന് കോട്ടം വരുത്തുന്നുവെന്ന് പാക് ഫെഡറൽ ഇൻവെസ്റ്റിഗേഷൻ ഏജൻസി (എഫ്ഐഎ) ഡയറക്ടർ ജനറൽ റിഫാത്ത് മുഖ്താർ വ്യക്തമാക്കി.