കീവ്: യുക്രെയ്നിലെ ഏറ്റവും വലിയ ഡാന്യൂബ് നദി തുറമുഖമായ ഇസ്മായിലിന് നേരെ റഷ്യയുടെ ഡ്രോൺ ആക്രമണം. ബുധനാഴ്ച പുലർച്ചെ നടന്ന ആക്രമണത്തിൽ തുറമുഖത്തെ പ്രധാന ലോജിസ്റ്റിക് സംവിധാനങ്ങൾക്കും കെട്ടിടങ്ങൾക്കും നാശനഷ്ടങ്ങൾ സംഭവിച്ചതായി യുക്രെയ്ൻ പ്രാദേശിക വികസന മന്ത്രാലയം അറിയിച്ചു (Russian Drone Attack Izmail Port). യുക്രെയ്നിന്റെ ചരക്ക് നീക്കങ്ങളെ തടസ്സപ്പെടുത്താൻ റഷ്യ ലക്ഷ്യമിടുന്നതായും മന്ത്രാലയം ടെലിഗ്രാമിലൂടെ വ്യക്തമാക്കി.
ആക്രമണത്തെത്തുടർന്ന് തുറമുഖത്തെ ഗോഡൗണുകളിൽ തീപിടുത്തമുണ്ടായെങ്കിലും അടിയന്തര വിഭാഗം എത്തി തീ നിയന്ത്രണവിധേയമാക്കി. സംഭവത്തിൽ ആർക്കും പരിക്കേറ്റതായി റിപ്പോർട്ടില്ല. യുക്രെയ്നിന്റെ തെക്കുപടിഞ്ഞാറൻ അതിർത്തിയിൽ റൊമാനിയയ്ക്ക് അഭിമുഖമായാണ് ഇസ്മായിൽ തുറമുഖം സ്ഥിതി ചെയ്യുന്നത്. റഷ്യൻ ആക്രമണം ശക്തമായതോടെ യുക്രെയ്നിന്റെ പ്രധാന ചരക്ക് നീക്കങ്ങൾ ഈ വഴിയിലായിരുന്നു.
2022-ൽ ഒഡേസ ഉൾപ്പെടെയുള്ള യുക്രെയ്നിന്റെ കരിങ്കടൽ തുറമുഖങ്ങൾ റഷ്യ ഉപരോധിച്ചപ്പോൾ ഇസ്മായിൽ പോലുള്ള ഡാന്യൂബ് തുറമുഖങ്ങൾ യുക്രെയ്നിന്റെ ഏക ജലപാതയായി മാറിയിരുന്നു. 2023-ൽ ഉപരോധം നീങ്ങിയതോടെ ഈ തുറമുഖങ്ങളുടെ പ്രാധാന്യം അല്പം കുറഞ്ഞെങ്കിലും, ഇന്ധനം, സ്ഫോടകവസ്തുക്കൾ തുടങ്ങിയ തന്ത്രപ്രധാനമായ ചരക്കുകൾ ഇപ്പോഴും ഈ പാതയിലൂടെയാണ് യുക്രെയ്നിലേക്ക് എത്തുന്നത്. ഇതിനാലാണ് ഇസ്മായിൽ തുറമുഖത്തെ റഷ്യ തുടർച്ചയായി ലക്ഷ്യമിടുന്നത്.
Summary: A Russian overnight drone attack targeted Izmail, Ukraine’s largest port on the Danube River, damaging logistics and port infrastructure. According to Ukraine’s regional development ministry, the strike caused fires in warehouses, which were later extinguished with no casualties reported. Strategically located near the Romanian border, Izmail has remained a critical hub for fuel and essential imports since Russia’s 2022 blockade of Black Sea ports.
