ടെർനോപിൽ: റഷ്യൻ ഡ്രോൺ, മിസൈൽ ആക്രമണങ്ങളിൽ യുക്രെയ്‌നിലുടനീളം (Ukraine) കുറഞ്ഞത് ഒമ്പത് പേർ കൊല്ലപ്പെടുകയും ഒട്ടനവധി പേർക്ക് പരിക്കേൽക്കുകയും ചെയ്തതായി യുക്രെയ്ൻ പ്രസിഡൻ്റ് വോളോഡിമിർ സെലെൻസ്കി അറിയിച്ചു. ബുധനാഴ്ച രാത്രിയിലുണ്ടായ ആക്രമണത്തിൽ 470-ൽ അധികം ഡ്രോണുകളും 48 മിസൈലുകളും റഷ്യ ഉപയോഗിച്ചതായി സെലെൻസ്കി വ്യക്തമാക്കി. ടെർനോപിലിൽ ഒരു ബഹുനില കെട്ടിടം തകർന്നതിനെത്തുടർന്ന് ആളുകൾ അവശിഷ്ടങ്ങൾക്കിടയിൽ കുടുങ്ങിക്കിടക്കാൻ സാധ്യതയുണ്ടെന്ന് അദ്ദേഹം കൂട്ടിച്ചേർത്തു.
ആക്രമണത്തെത്തുടർന്ന് ഉക്രെയ്‌നിലുടനീളം വ്യോമാക്രമണങ്ങളും പടിഞ്ഞാറൻ നഗരങ്ങളായ ലിവിവിലും ടെർനോപിലിലും സ്‌ഫോടനങ്ങളും ഉണ്ടായി. റഷ്യയ്‌ക്കെതിരായ സമ്മർദ്ദം അപര്യാപ്തമാണെന്നും സഖ്യകക്ഷികളോട് വ്യോമ പ്രതിരോധ മിസൈൽ പിന്തുണ അഭ്യർത്ഥിച്ചുവെന്നും സെലെൻസ്കി പറഞ്ഞു. ആക്രമണങ്ങൾ നിരവധി പ്രദേശങ്ങളിൽ വൈദ്യുതി തടസ്സങ്ങൾക്ക് കാരണമായതായി ഉക്രെയ്‌നിന്റെ ഊർജ്ജ മന്ത്രാലയം അറിയിച്ചു. ലിവിവ് മേഖലയിലെ ഒരു പവർ പ്ലാന്റും ഒരു വ്യാവസായിക സമുച്ചയവും തകർന്നു.
അതിനിടെ, യുക്രെയ്ൻ സൈന്യം റഷ്യയുടെ തെക്കൻ നഗരമായ വോറോനെഷിലെ സാധാരണക്കാരെ ലക്ഷ്യമിട്ട് യുഎസ് നിർമ്മിത നാല് ATACMS മിസൈലുകൾ പ്രയോഗിക്കാൻ ശ്രമിച്ചതായി റഷ്യയുടെ പ്രതിരോധ മന്ത്രാലയം ആരോപിച്ചു. എന്നാൽ, റഷ്യൻ S-400 എയർ ഡിഫൻസ് ക്രൂകളും പാന്റ്‌സിർ മിസൈൽ സംവിധാനങ്ങളും എല്ലാ ATACMS മിസൈലുകളും വെടിവെച്ചിട്ടതായി റഷ്യ അറിയിച്ചു.
മിസൈൽ അവശിഷ്ടങ്ങൾ വോറോനെഷിലെ ഒരു വൃദ്ധസദനത്തിൻ്റെയും അനാഥാലയത്തിൻ്റെയും മേൽക്കൂരകൾക്കും ഒരു വീടിനും കേടുപാടുകൾ വരുത്തി, എന്നാൽ സാധാരണക്കാർക്ക് ആർക്കും പരിക്കേറ്റിട്ടില്ലെന്നും റഷ്യൻ മന്ത്രാലയം അവകാശപ്പെട്ടു. അടുത്തിടെ യുക്രെയ്ൻ തങ്ങളുടെ ഊർജ്ജ അടിസ്ഥാന സൗകര്യങ്ങളെ ലക്ഷ്യമിട്ടുള്ള റഷ്യൻ ആക്രമണങ്ങളെ ചെറുക്കാൻ കൂടുതൽ എയർ ഡിഫൻസ് സംവിധാനങ്ങൾ നേടാനുള്ള ശ്രമത്തിലാണ്. സമീപ രാജ്യമായ പോളണ്ടും റഷ്യൻ ആക്രമണങ്ങളുടെ പശ്ചാത്തലത്തിൽ തങ്ങളുടെ അതിർത്തിയിൽ എയർ ഡിഫൻസ് ശക്തിപ്പെടുത്തുകയും വിമാനങ്ങൾ അടിയന്തരമായി പറത്തുകയും ചെയ്തിരുന്നു.
Russian drone and missile attacks across Ukraine killed at least nine people and wounded dozens, prompting President Volodymyr Zelenskyy to appeal to allies for more air defense missile aid.