മനില: ഫിലിപ്പീൻസിലെ സെബു സിറ്റിയിലുള്ള ബിനാലിവ് മാലിന്യ സംസ്കരണ കേന്ദ്രത്തിലുണ്ടായ വൻ മാലിന്യമലയിടിച്ചിലിൽ നാല് പേർ കൊല്ലപ്പെടുകയും മുപ്പതിലധികം പേരെ കാണാതാവുകയും ചെയ്തു (Philippines Landfill Collapse). വ്യാഴാഴ്ച ഉച്ചയോടെ അപ്രതീക്ഷിതമായി ഉണ്ടായ ഈ ദുരന്തത്തിൽ ഓഫീസുകളും വിശ്രമമുറികളും ഉൾപ്പെടെയുള്ള കെട്ടിടങ്ങൾ മാലിന്യക്കൂമ്പാരത്തിനടിയിലായി. നിലവിൽ പരിക്കേറ്റ നിലയിൽ 12 പേരെ രക്ഷപ്പെടുത്തിയിട്ടുണ്ട്. മരിച്ചവരിൽ ഒരു എഞ്ചിനീയറും ഒരു വനിതാ ജീവനക്കാരിയും ഉൾപ്പെടുന്നുവെന്ന് അധികൃതർ സ്ഥിരീകരിച്ചു.
ദുരന്തം നടന്ന് രണ്ട് ദിവസത്തിന് ശേഷം അവശിഷ്ടങ്ങൾക്കിടയിൽ നിന്ന് ജീവന്റെ ലക്ഷണങ്ങൾ കണ്ടെത്തിയത് രക്ഷാപ്രവർത്തകർക്ക് വലിയ പ്രതീക്ഷ നൽകിയിട്ടുണ്ട്. ഇതേത്തുടർന്ന് 50 ടൺ ഭാരമുള്ള ക്രെയിനുകൾ ഉൾപ്പെടെയുള്ള അത്യാധുനിക സജ്ജീകരണങ്ങളുമായി തിരച്ചിൽ ഊർജ്ജിതമാക്കിയിരിക്കുകയാണ്. എന്നാൽ, മാലിന്യമലയിലെ അസ്ഥിരമായ അവശിഷ്ടങ്ങളും മീഥെയ്ൻ പോലുള്ള വാതകങ്ങൾ കത്താനുള്ള സാധ്യതയും രക്ഷാപ്രവർത്തനത്തിന് വലിയ വെല്ലുവിളി ഉയർത്തുന്നുണ്ട്. സുരക്ഷാ മുൻകരുതലിന്റെ ഭാഗമായി പ്രദേശത്ത് കർശന നിയന്ത്രണങ്ങൾ ഏർപ്പെടുത്തിയിട്ടുണ്ട്.
ഏകദേശം നാല് നിലയോളം ഉയരത്തിൽ കുന്നുകൂട്ടിയ മാലിന്യങ്ങൾ ഇടിഞ്ഞുവീഴുകയായിരുന്നുവെന്ന് രക്ഷപ്പെട്ട ജീവനക്കാർ സാക്ഷ്യപ്പെടുത്തുന്നു. കഴിഞ്ഞ ദിവസങ്ങളിലുണ്ടായ കനത്ത മഴ മാലിന്യമലയുടെ അടിത്തറ ദുർബലമാക്കിയതാകാമെന്നാണ് പ്രാഥമിക നിഗമനം. പ്രതിദിനം ആയിരത്തിലധികം ടൺ മാലിന്യം എത്തുന്ന ഈ കേന്ദ്രത്തിലെ അമിതഭാരവും ദുരന്തത്തിന് കാരണമായിട്ടുണ്ടാകാമെന്ന് ചൂണ്ടിക്കാണിക്കപ്പെടുന്നു. 2000-ൽ മനിലയിലുണ്ടായ പയാറ്റാസ് ദുരന്തത്തിന് ശേഷം ഫിലിപ്പീൻസിനെ നടുക്കിയ ഏറ്റവും വലിയ മാലിന്യമലയിടിച്ചിലാണിത്.
Rescuers in Cebu City, Philippines, are racing against time after detecting signs of life beneath a massive garbage avalanche that has claimed four lives and left over 30 missing. The collapse at the Binaliw landfill buried office buildings and staff housing, injuring 12 workers who have since been rescued. Authorities are deploying heavy machinery to navigate unstable debris, while the incident reignites national concerns over the safety and management of the country's aging landfill infrastructures.