ലണ്ടൻ: യു കെയിലെ ജയിലുകളിൽ കഴിയുന്ന പാലസ്തീൻ അനുകൂല പ്രവർത്തകരായ ഹെബ മുറൈസിയും കമ്രാൻ അഹമ്മദും മരണാസന്നമായ നിലയിലും തങ്ങളുടെ നിരാഹാര സമരം തുടരുകയാണ് (Palestine Action hunger strike). ഹെബ മുറൈസി 67 ദിവസവും കമ്രാൻ അഹമ്മദ് 60 ദിവസവുമാണ് ഭക്ഷണം വെടിഞ്ഞ് പ്രതിഷേധിക്കുന്നത്. ഇസ്രായേലി പ്രതിരോധ കമ്പനിയായ 'എൽബിറ്റ് സിസ്റ്റംസിന്റെ' ഫാക്ടറികളിൽ അതിക്രമിച്ചു കയറിയെന്നാരോപിച്ച് വിചാരണ കൂടാതെയുള്ള തടങ്കലിനെതിരെയാണ് ഇവരുടെ സമരം.
ആരോഗ്യനില അതീവ ഗുരുതരമായതിനെത്തുടർന്ന് ഹെബ മുറൈസിയെ ഇതിനോടകം മൂന്ന് തവണയും കമ്രാൻ അഹമ്മദിനെ ആറ് തവണയും ആശുപത്രിയിൽ പ്രവേശിപ്പിച്ചു. പേശിവലിവും ശ്വാസതടസ്സവും ഓർമ്മക്കുറവും ഹെബയെ അലട്ടുമ്പോൾ, ഹൃദയമിടിപ്പ് കുറയുന്നതും കേൾവിശക്തി നഷ്ടപ്പെടുന്നതും കമ്രാന്റെ നില വഷളാക്കുന്നു. ടൈപ്പ് 1 പ്രമേഹബാധിതനായ ലൂയി ചിരമെല്ലോ എന്ന മറ്റൊരു യുവാവും ഇടവിട്ട ദിവസങ്ങളിൽ നിരാഹാരം അനുഷ്ഠിക്കുന്നുണ്ട്. നിരാഹാരമിരിക്കുന്ന തടവുകാരെ ആശുപത്രിയിൽ വെച്ച് ചങ്ങലയ്ക്കിടുന്നുവെന്നും ക്രൂരമായി പെരുമാറുന്നുവെന്നും അവരുടെ ബന്ധുക്കൾ ആരോപിക്കുന്നു.
പാലസ്തീൻ ആക്ഷൻ എന്ന സംഘടനയെ 'ഭീകര സംഘടന'യായി പ്രഖ്യാപിച്ച നടപടി പിൻവലിക്കുക, തടവിലാക്കിയവർക്ക് ജാമ്യം അനുവദിക്കുക, എൽബിറ്റ് സിസ്റ്റംസിന്റെ എല്ലാ യൂണിറ്റുകളും യുകെയിൽ അടച്ചുപൂട്ടുക എന്നിവയാണ് ഇവരുടെ പ്രധാന ആവശ്യങ്ങൾ. എന്നാൽ നിരാഹാര സമരങ്ങളെ പ്രോത്സാഹിപ്പിക്കില്ലെന്ന നിലപാടിൽ ഉറച്ചുനിൽക്കുന്ന ബ്രിട്ടീഷ് സർക്കാർ ഇവരുടെ പ്രതിനിധികളുമായി ചർച്ചയ്ക്ക് തയ്യാറായിട്ടില്ല. ഐക്യരാഷ്ട്രസഭയിലെ വിദഗ്ധരും ഡോക്ടർമാരും ഇവരുടെ ജീവന്റെ കാര്യത്തിൽ ആശങ്ക പ്രകടിപ്പിച്ചിട്ടും സർക്കാർ വിട്ടുവീഴ്ച ചെയ്യാത്തത് വലിയ പ്രതിഷേധത്തിന് ഇടയാക്കിയിട്ടുണ്ട്.
Heba Muraisi and Kamran Ahmed, British activists linked to Palestine Action, are in critical condition as their prison hunger strike in the UK passes the 60-day mark. Despite suffering from severe symptoms like muscle spasms and heart complications, they remain intent on continuing their protest against Elbit Systems and their prolonged pre-trial detention. While international experts and families warn of imminent death, the UK government has refused to negotiate, leading to comparisons with historical hunger strikes like that of Bobby Sands in 1981.