അഹമ്മദാബാദ്: പത്രസമ്മേളനത്തിനിടെ മാധ്യമപ്രവർത്തകയുടെ ചോദ്യത്തോട് പാകിസ്ഥാൻ സൈനിക വക്താവ് പ്രതികരിച്ചത് കണ്ണിറുക്കിക്കൊണ്ടായിരുന്നു. മുതിർന്ന ഉദ്യോഗസ്ഥനായ പാക് ലെഫ്റ്റനന്റ് ജനറൽ അഹമ്മദ് ഷെരീഫ് ചൗധരിയുടെ ഈ പ്രവൃത്തി വലിയ വിമർശനങ്ങൾക്ക് വഴിവെക്കുകയും സമൂഹ മാധ്യമങ്ങളിൽ ചർച്ചയാവുകയും ചെയ്തു.(Pakistani military official winks at Pakistani journalist during press conference)
പത്രപ്രവർത്തകയായ അബ്സ കോമന് നേരെയാണ് കഴിഞ്ഞ ദിവസം നടന്ന പത്രസമ്മേളനത്തിനിടെ സൈനിക വക്താവ് കണ്ണിറുക്കിയത്. തടവിൽ കഴിയുന്ന മുൻ പ്രധാനമന്ത്രി ഇമ്രാൻ ഖാനെക്കുറിച്ചുള്ള ചോദ്യത്തിന് മറുപടി നൽകിയ ശേഷമായിരുന്നു ഈ വിവാദ പെരുമാറ്റം. ഇമ്രാൻ ഖാനെതിരെ പാക് സർക്കാരും സൈന്യവും ഉന്നയിച്ച ഗുരുതര ആരോപണങ്ങളെക്കുറിച്ചായിരുന്നു മാധ്യമപ്രവർത്തകയുടെ ചോദ്യം.
മറുപടി നൽകവെ, "ഇമ്രാൻ ഖാൻ ഒരു മാനസിക രോഗിയാണ് എന്ന വാക്ക് കൂടി കൂട്ടിച്ചേർക്കുക" എന്നായിരുന്നു മുതിർന്ന ഉദ്യോഗസ്ഥന്റെ പ്രതികരണം. ഈ മറുപടി പറഞ്ഞ ശേഷം അദ്ദേഹം ചിരിക്കുകയും ചോദ്യം ചോദിച്ച മാധ്യമപ്രവർത്തകയ്ക്ക് നേരെ പരസ്യമായി കണ്ണിറുക്കുകയും ചെയ്തു.