ധാക്ക: 1971-ലെ യുദ്ധത്തിന് ശേഷം ആദ്യമായി പാകിസ്താൻ നാവികസേനയുടെ യുദ്ധക്കപ്പൽ ബംഗ്ലാദേശ് തീരത്ത് നങ്കൂരമിട്ടു. പാകിസ്താൻ-ബംഗ്ലാദേശ് പ്രതിരോധ ബന്ധം ശക്തിപ്പെടുത്തുന്നതിന്റെ സൂചനയാണിത്. പാക് നാവിക കപ്പലായ പിഎൻഎസ് എസ്എഐഎഫ് ആണ് നാല് ദിവസത്തെ സൗഹൃദ സന്ദർശനത്തിനായി ബംഗ്ലാദേശിലെ പ്രധാന തുറമുഖത്ത് നങ്കൂരമിട്ടത്.(Pakistan warship approaches Bangladesh coast for the first time since 1971, India observes)
കപ്പൽ നങ്കൂരമിട്ടതിന് പിന്നാലെ പാകിസ്താൻ നാവികസേനാ മേധാവി അഡ്മിറൽ നവീദ് അഷ്‌റഫ് ബംഗ്ലാദേശ് സന്ദർശിക്കുകയും ചെയ്തു. അദ്ദേഹം ബംഗ്ലാദേശ് സൈനിക മേധാവി ജനറൽ വക്കർ-ഉസ്-സമാൻ, നാവിക സേനാ മേധാവി അഡ്മിറൽ എം. നസ്മുൾ ഹസ്സൻ എന്നിവരുമായി കൂടിക്കാഴ്ച നടത്തി.
ബംഗ്ലാദേശുമായുള്ള ദീർഘകാല ബന്ധം ശക്തിപ്പെടുത്തുന്നതിനും സമുദ്ര സഹകരണം മെച്ചപ്പെടുത്തുന്നതിനുമുള്ള പാകിസ്താന്റെ പ്രതിബദ്ധതയാണ് ഈ സന്ദർശനം അടിവരയിടുന്നതെന്ന് പാകിസ്താൻ നാവികസേന വ്യക്തമാക്കി. ഉഭയകക്ഷി പ്രതിരോധ സഹകരണവും സൈനിക ശേഷിയും ശക്തിപ്പെടുത്തുന്നതിനുള്ള വഴികളെക്കുറിച്ച് അഷ്‌റഫും സമാനും ചർച്ച ചെയ്തു.
ഉഭയകക്ഷി പരിശീലനം, സെമിനാറുകൾ, സന്ദർശനങ്ങൾ എന്നിവയിലൂടെ സൈനിക സഹകരണം വികസിപ്പിക്കുന്നതിനുള്ള സാധ്യതകളും തേടിയെന്ന് പാക് പ്രതിരോധ മന്ത്രാലയത്തിന്റെ ഇന്റർ സർവീസ് പബ്ലിക് റിലേഷൻസ് (ഐ.എസ്.പി.ആർ.) ഡയറക്ടറേറ്റ് മീഡിയ വിഭാഗം പ്രസ്താവനയിൽ അറിയിച്ചു.
രണ്ടാഴ്ച മുമ്പ് പാകിസ്താൻ ജോയിന്റ് ചീഫ്‌സ് ഓഫ് സ്റ്റാഫ് കമ്മിറ്റി (സി.ജെ.സി.എസ്.സി.) ചെയർമാൻ ജനറൽ സാഹിർ ഷംഷാദ് മിർസ ബംഗ്ലാദേശ് സന്ദർശിച്ചതിന് തൊട്ടുപിന്നാലെയാണ് നാവിക മേധാവിയുടെ സന്ദർശനം.
പാകിസ്താനും ബംഗ്ലാദേശിനും ഇടയിൽ പതിറ്റാണ്ടുകളായുള്ള ശത്രുതയുടെ മഞ്ഞുരുകലാണ് യുദ്ധക്കപ്പലിന്റെ വരവ്. ബംഗാൾ ഉൾക്കടലിലേക്കുള്ള പാകിസ്താന്റെ പുനഃപ്രവേശനം മേഖലയിലെ നാവിക സാന്നിധ്യം വീണ്ടും ഉറപ്പിക്കാനുള്ള ശ്രമത്തിന്റെ ഭാഗമാണ്. പാക്-ബംഗ്ലാ കൂട്ടുകെട്ടിനെ സംശയത്തോടെയാണ് ഇന്ത്യ നോക്കിക്കാണുന്നത്. ബംഗാൾ ഉൾക്കടലിലെ ഈ നീക്കം കിഴക്കൻ കടൽത്തീരത്ത് ഇന്ത്യയുടെ സുരക്ഷാ ശക്തി വർധിപ്പിക്കേണ്ട സാഹചര്യത്തിലേക്ക് നയിച്ചേക്കാം.
ഈ വർഷം ആദ്യം പാകിസ്താൻ ചാര ഏജൻസിയായ ഐ.എസ്.ഐ.യുടെ ഉദ്യോഗസ്ഥരും ധാക്ക സന്ദർശിച്ചിരുന്നു. ഇസ്‌ലാമാബാദും ധാക്കയും തമ്മിലുള്ള നയതന്ത്ര നീക്കങ്ങൾ വർധിച്ചു വരുന്നതിന്റെ സൂചനകളായാണ് ഇതിനെല്ലാം വിദഗ്ദ്ധർ കാണുന്നത്.