ഇസ്ലാമാബാദ്: പ്രളയക്കെടുതി നേരിടുന്ന ശ്രീലങ്കയിലേക്ക് കാലാവധി കഴിഞ്ഞ ഉത്പന്നങ്ങൾ ഉൾപ്പെട്ട ദുരിതാശ്വാസ പാക്കേജുകൾ അയച്ച പാകിസ്താന്റെ നടപടി വ്യാപക വിമർശനങ്ങൾക്ക് വഴിവെച്ചു. പാകിസ്താൻ ഹൈക്കമ്മീഷൻ എക്സിൽ പങ്കുവെച്ച ചിത്രങ്ങളിലൂടെയാണ് ഗുരുതരമായ ഈ വീഴ്ച പൊതുജന ശ്രദ്ധയിൽപ്പെട്ടത്.(Pakistan sends expired products to flood-hit Sri Lanka)
നവംബർ 30-നാണ് പാകിസ്താൻ ഹൈക്കമ്മീഷൻ ദുരിതാശ്വാസ പാക്കേജുമായി ബന്ധപ്പെട്ട പോസ്റ്റ് എക്സിൽ പങ്കുവെച്ചത്. ഈ ചിത്രങ്ങളിൽ, 2024 ഒക്ടോബറിൽ കാലാവധി കഴിഞ്ഞ ഉത്പന്നങ്ങൾ ദുരിതാശ്വാസ പാക്കേജുകളിൽ ഉൾപ്പെടുത്തിയിരിക്കുന്നത് വ്യക്തമായിരുന്നു.
ഏറ്റവും വലിയ പ്രളയ പ്രതിസന്ധികളിലൊന്ന് നേരിടുന്ന രാജ്യത്തേക്ക് കാലാവധി കഴിഞ്ഞ ഉത്പന്നങ്ങൾ അയച്ചത് ദുരന്തബാധിതരെ അപമാനിക്കുന്നതിന് തുല്യമാണെന്നാണ് സാമൂഹിക മാധ്യമങ്ങളിലെ വിമർശനം. ലേബലുകൾ പരിശോധിക്കാതെ അയച്ചതും, അതിന്റെ ചിത്രങ്ങൾ ഹൈക്കമ്മീഷൻ തന്നെ പോസ്റ്റ് ചെയ്തതും ഗുരുതരമായ വീഴ്ചയായി ഉപഭോക്താക്കൾ ചൂണ്ടിക്കാട്ടി.
"എല്ലായ്പ്പോഴും ഒരുമിച്ച്, പാകിസ്താൻ ഇന്നും എന്നും ശ്രീലങ്കയ്ക്കൊപ്പം നിലകൊള്ളുന്നു," എന്ന കുറിപ്പിനൊപ്പമായിരുന്നു പോസ്റ്റ്. എന്നാൽ വിമർശനങ്ങൾ അതിരൂക്ഷമായതിനെ തുടർന്ന് പാകിസ്താൻ ഹൈക്കമ്മീഷൻ ഈ പോസ്റ്റ് പിൻവലിച്ചു. വിഷയത്തിൽ ഇതുവരെ ഔദ്യോഗിക വിശദീകരണം ഉണ്ടായിട്ടില്ല.
അതേസമയം, ഇന്ത്യ 'ഓപ്പറേഷൻ സാഗർ ബന്ധു'വിന് കീഴിൽ ശ്രീലങ്കയിൽ ശക്തമായ ദുരിതാശ്വാസ പ്രവർത്തനങ്ങൾ നടത്തുന്നുണ്ട്. നവംബർ 28 മുതൽ 53 ടൺ ദുരിതാശ്വാസ സാമഗ്രികളാണ് ഇന്ത്യ വ്യോമ, സമുദ്ര മാർഗങ്ങളിലൂടെ ശ്രീലങ്കയിൽ എത്തിച്ചത്. ഐ.എൻ.എസ്. വിക്രാന്ത്, ഐ.എൻ.എസ്. ഉദയഗിരി, ഐ.എൻ.എസ്. സുകന്യ എന്നിവയുൾപ്പെടെ ഇന്ത്യൻ വ്യോമസേനയുടെ വിമാനങ്ങളിലും നാവികസേനയുടെ കപ്പലുകളിലുമായിട്ടാണ് സാമഗ്രികൾ അയച്ചത്. സമീപകാലത്തെ ഏറ്റവും വലിയ ദുരന്തത്തിനാണ് ശ്രീലങ്ക ഇപ്പോൾ സാക്ഷിയായിക്കൊണ്ടിരിക്കുന്നത്. ദുരിതാശ്വാസ പ്രവർത്തനങ്ങൾ രാജ്യത്ത് പുരോഗമിക്കുകയാണ്.