ഇസ്ലാമാബാദ് : ഗാസ മുനമ്പിന്റെ യുദ്ധാനന്തരമുള്ള പുനർനിർമ്മാണത്തിന് സുരക്ഷയൊരുക്കാനായി ഇരുപതിനായിരം സൈനികരെ അയയ്ക്കാൻ പാകിസ്ഥാൻ തയ്യാറെടുക്കുന്നതായി റിപ്പോർട്ട്. ഈ നീക്കം പാകിസ്ഥാന്റെ വിദേശനയത്തിൽ ഒരു സുപ്രധാന 'നിലപാട് മാറ്റ'ത്തിന് വഴിയൊരുക്കുമെന്നാണ് വിലയിരുത്തൽ.(Pakistan prepares to send 20,000 troops to Gaza)
ഇസ്രായേൽ ചാരസംഘടനയായ മൊസാദ്, യു.എസ്. രഹസ്യാന്വേഷണ ഏജൻസിയായ സി.ഐ.എ. എന്നിവയുടെ ഉന്നത ഉദ്യോഗസ്ഥരുമായി പാകിസ്ഥാൻ കരസേനാ മേധാവി ജനറൽ അസിം മുനീർ ഈജിപ്തിൽ നടത്തിയ രഹസ്യ ചർച്ചകൾക്ക് ശേഷമാണ് ഈ തീരുമാനം. ഗാസയുടെ പുനർനിർമ്മാണ പ്രവർത്തനങ്ങൾക്കിടെ ഇസ്രായേലിനും പലസ്തീനും ഇടയിൽ ഒരു സംരക്ഷണ സേനയായി പാക് സൈനികർ പ്രവർത്തിക്കും. ഇതിന് പകരമായി പാകിസ്ഥാന് വലിയ സാമ്പത്തിക പാക്കേജുകളും വായ്പകളും ലഭിക്കുമെന്നാണ് ദേശീയ മാധ്യമങ്ങൾ സൂചിപ്പിക്കുന്നത്.
ഇസ്രായേലിനെ ഇതുവരെ അംഗീകരിക്കാതെ പലസ്തീന് വേണ്ടി നിലകൊണ്ട രാജ്യമാണ് പാകിസ്ഥാൻ. എന്നാൽ, പുതിയ നീക്കം പാകിസ്ഥാൻ തങ്ങളുടെ ദീർഘകാല നയത്തിൽ വരുത്തുന്ന സുപ്രധാനമായ മാറ്റമായാണ് വിലയിരുത്തപ്പെടുന്നത്.
ഈ 'മനംമാറ്റം' അറബ് രാഷ്ട്രങ്ങളെ വഞ്ചിക്കുന്നതിന് തുല്യമാണെന്ന് വിമർശനം ഉയർന്നു കഴിഞ്ഞു. തുർക്കി, ഇറാൻ, ഖത്തർ തുടങ്ങിയ രാജ്യങ്ങൾ പാകിസ്ഥാന്റെ ഈ നീക്കത്തിൽ ശക്തമായ എതിർപ്പ് അറിയിച്ചതായും റിപ്പോർട്ടുകളുണ്ട്.
യുദ്ധാനന്തരം ഗാസയിൽ ഇസ്രായേലിന്റെ സുരക്ഷയ്ക്ക് ഭീഷണിയാകാത്ത ഒരു നിഷ്പക്ഷ സൈനിക സേനയെ വിന്യസിക്കാനുള്ള സാധ്യതകൾ നിലനിൽക്കുന്നുണ്ട്. ഈ പശ്ചാത്തലത്തിലാണ് ഇസ്രായേലുമായി ഔദ്യോഗികമായി നയതന്ത്രബന്ധമില്ലാത്ത പാകിസ്ഥാന്റെ 20,000 സൈനികരെ വിന്യസിക്കാനുള്ള നീക്കം ശ്രദ്ധേയമാകുന്നത്.
പാകിസ്ഥാന്റെ വിദേശനയത്തിൽ കാര്യമായ മാറ്റം വരുത്തുന്ന ഒരു നിർണായക തീരുമാനമായാണ് ഈ നീക്കത്തെ നിരീക്ഷകർ വിലയിരുത്തുന്നത്. വിഷയത്തിൽ ഔദ്യോഗിക സ്ഥിരീകരണം ഇനിയും വന്നിട്ടില്ലെങ്കിലും, ഗാസയുടെ ഭാവി നിർണ്ണയിക്കുന്നതിൽ ഈ സൈനിക വിന്യാസം ഒരു നിർണായക പങ്ക് വഹിക്കാൻ സാധ്യതയുണ്ട്.