പ്യോങ്യാങ്: ഉത്തരകൊറിയയുടെ സാമ്പത്തിക പുരോഗതി വിളിച്ചോതുന്ന പുതിയ ടൂറിസ്റ്റ് ഹോട്ടലുകൾ ഭരണാധികാരി കിം ജോങ് ഉൻ (Kim Jong Un) ഉദ്ഘാടനം ചെയ്തു. ചൈനീസ് അതിർത്തിയോട് ചേർന്നുള്ള സംജിയോൺ വിനോദസഞ്ചാര മേഖലയിലാണ് അത്യാധുനിക സൗകര്യങ്ങളോടു കൂടിയ അഞ്ച് ഹോട്ടലുകൾ പ്രവർത്തനമാരംഭിച്ചത്. മകൾ ജു എയോടൊപ്പമാണ് കിം ഹോട്ടലുകളിൽ സന്ദർശനം നടത്തിയത്.
അടുത്ത വർഷം ആദ്യം നടക്കാനിരിക്കുന്ന പ്രധാന പാർട്ടികോൺഗ്രസിന് മുന്നോടിയായി രാജ്യത്തെ വികസന നേട്ടങ്ങൾ ലോകത്തിന് മുന്നിൽ പ്രദർശിപ്പിക്കാനാണ് കിം ജോങ് ഉൻ ഈ സന്ദർശനത്തിലൂടെ ലക്ഷ്യമിടുന്നത്. ഹോട്ടലുകളിലെ ബാർബിക്യൂ റെസ്റ്റോറന്റുകളും ഹോട്ട് ടബ്ബുകളും ഉൾപ്പെടെയുള്ള സൗകര്യങ്ങൾ അദ്ദേഹം നേരിട്ട് പരിശോധിച്ചു. "നമ്മുടെ രാജ്യത്തിന്റെ വികസന സാധ്യതകളുടെയും ജനങ്ങളുടെ ഉയരുന്ന ജീവിതനിലവാരത്തിന്റെയും തെളിവാണ് ഈ ഹോട്ടലുകൾ" എന്ന് കിം വിശേഷിപ്പിച്ചു.
അടുത്തകാലത്തായി കിം ജോങ് ഉൻ പങ്കെടുക്കുന്ന മിക്കവാറും എല്ലാ പൊതുപരിപാടികളിലും മകൾ ജു എയുടെ സാന്നിധ്യം ശ്രദ്ധേയമാണ്. ഉത്തരകൊറിയയുടെ അടുത്ത ഭരണാധികാരിയായി ജു എയെ ഉയർത്തിക്കൊണ്ടുവരുന്നതിന്റെ ഭാഗമായാണ് ഇതെന്നാണ് അന്താരാഷ്ട്ര നിരീക്ഷകരുടെ വിലയിരുത്തൽ. കഴിഞ്ഞ ആഴ്ചകളിൽ മാത്രം മൂന്ന് ഫാക്ടറികളുടെ ഉദ്ഘാടനത്തിലും ഇവർ പങ്കെടുത്തു. 2026-ന്റെ തുടക്കത്തിൽ നടക്കുന്ന പാർട്ടികോൺഗ്രസിൽ രാജ്യത്തിന്റെ അടുത്ത അഞ്ചുവർഷത്തേക്കുള്ള സാമ്പത്തിക വികസന പദ്ധതികൾ പ്രഖ്യാപിക്കുമെന്നാണ് കരുതപ്പെടുന്നത്.
North Korean leader Kim Jong Un, accompanied by his daughter Ju Ae, inaugurated five luxury hotels in the Samjiyon tourist zone near the Chinese border. Highlighting the country’s economic potential ahead of a major party congress in early 2026, Kim toured lavish facilities including BBQ restaurants and leisure spaces. Analysts believe the increasing public appearances of Ju Ae at such high-profile events signal her potential future role as the successor to the North Korean leadership.