വെല്ലിംഗ്ടൺ : ന്യൂസിലൻഡിൽ ബസിൽ യാത്ര ചെയ്യുന്നതിനിടെ രണ്ട് വയസുകാരിയെ ബാഗേജിൽ കണ്ടെത്തിയ സംഭവത്തിൽ യുവതി അറസ്റ്റിൽ. ലഗേജ് കമ്പാർട്ടുമെൻ്റിലേക്ക് ഒരു യാത്രക്കാരൻ പ്രവേശനം ആവശ്യപ്പെട്ടതിനെത്തുടർന്ന് ഞായറാഴ്ച രാജ്യത്തിൻ്റെ വടക്ക് ഭാഗത്തുള്ള ഒരു ചെറിയ പട്ടണമായ കൈവാകയിലെ ബസ് സ്റ്റോപ്പിലേക്ക് ഉദ്യോഗസ്ഥരെ വിളിച്ചുവരുത്തിയതായി പോലീസ് പറഞ്ഞു.(New Zealand woman arrested after two-year-old found in luggage)
ബാഗ് നീങ്ങുന്നത് ശ്രദ്ധയിൽപ്പെട്ടപ്പോൾ ഡ്രൈവർ ആശങ്കയിലായി. ഡ്രൈവർ സ്യൂട്ട്കേസ് തുറന്നപ്പോൾ രണ്ട് വയസ്സുള്ള പെൺകുട്ടിയെ കണ്ടെത്തി. ന്യൂസിലൻഡ് പോലീസ് ആണ് പ്രസ്താവനയിൽ ഇക്കാര്യം അറിയിച്ചത്. 27 കാരിയായ സ്ത്രീയെ അറസ്റ്റ് ചെയ്തു. കുട്ടിയോട് മോശമായി പെരുമാറിയതിന് കുറ്റം ചുമത്തുകയും ചെയ്തിട്ടുണ്ട്.
കുട്ടിയെ ആശുപത്രിയിൽ എത്തിച്ചു. യുവതിയും കുട്ടിയും തമ്മിലുള്ള ബന്ധം വെളിപ്പെടുത്തിയിട്ടില്ല. തിങ്കളാഴ്ച നോർത്ത് ഷോർ ജില്ലാ കോടതിയിൽ യുവതിയെ ഹാജരാക്കണം.