കാഠ്മണ്ഡു/ഭദ്രാപൂർ: നേപ്പാളിലെ ഭദ്രാപൂർ വിമാനത്താവളത്തിൽ ലാൻഡ് ചെയ്യുന്നതിനിടെ വിമാനം റൺവേയിൽ നിന്ന് തെന്നിമാറി (Skidded off). ബുദ്ധ എയറിന്റെ (Buddha Air) ടർബോപ്രോപ്പ് വിമാനമാണ് അപകടത്തിൽപ്പെട്ടത്. വിമാനത്തിലുണ്ടായിരുന്ന 51 യാത്രക്കാരും 4 ജീവനക്കാരും അത്ഭുതകരമായി പരിക്കേൽക്കാതെ രക്ഷപ്പെട്ടു.
പ്രാദേശിക സമയം വെള്ളിയാഴ്ച രാത്രി 9:08 ഓടെയായിരുന്നു അപകടം. കാഠ്മണ്ഡുവിൽ നിന്ന് ഭദ്രാപൂരിലേക്ക് വന്ന ബുദ്ധ എയർ വിമാനം (9N-AMF) ലാൻഡ് ചെയ്യുന്നതിനിടെ റൺവേയിൽ നിന്ന് ഏകദേശം 200 മീറ്ററോളം തെന്നിമാറി സമീപത്തെ പുൽമേട്ടിൽ ചെന്ന് നിൽക്കുകയായിരുന്നു.
ഉടൻ തന്നെ നേപ്പാൾ പോലീസും അധികൃതരും ചേർന്ന് വിമാനത്തിലുണ്ടായിരുന്ന എല്ലാവരെയും സുരക്ഷിതമായി പുറത്തെത്തിച്ചു. വിമാനത്തിന് ചെറിയ രീതിയിലുള്ള കേടുപാടുകൾ സംഭവിച്ചിട്ടുണ്ട്.
പൈലറ്റ് ശൈലേഷ് ലിംബുവിന്റെ നേതൃത്വത്തിലുള്ള സംഘമാണ് വിമാനം നിയന്ത്രിച്ചിരുന്നത്. സാങ്കേതിക തകരാറാണോ അതോ റൺവേയിലെ കാലാവസ്ഥയാണോ അപകടകാരണമെന്ന് കണ്ടെത്താൻ കാഠ്മണ്ഡുവിൽ നിന്ന് വിദഗ്ധ സംഘം ഭദ്രാപൂരിലെത്തിയിട്ടുണ്ട്. വിമാനം മാറ്റുന്നതുവരെ വിമാനത്താവളത്തിലെ പ്രവർത്തനങ്ങൾ ഭാഗികമായി തടസ്സപ്പെട്ടു.