മിനിയാപൊളിസ്: മിനിയാപൊളിസിൽ അമേരിക്കൻ ഇമിഗ്രേഷൻ ഏജന്റിന്റെ വെടിയേറ്റ് മുപ്പത്തിയേഴുകാരിയായ റെനെ നിക്കോൾ ഗുഡ് കൊല്ലപ്പെട്ട സംഭവത്തിൽ പ്രതിഷേധം കത്തുന്നു (Minneapolis Shooting ). ട്രംപ് ഭരണകൂടത്തിന്റെ വിവാദമായ കുടിയേറ്റ വിരുദ്ധ നയങ്ങൾക്കെതിരെ ശനിയാഴ്ച അമേരിക്കയിലുടനീളം ആയിരത്തിലധികം പ്രതിഷേധ പ്രകടനങ്ങൾക്ക് പൗരാവകാശ സംഘടനകൾ ആഹ്വാനം ചെയ്തു. മൂന്ന് കുട്ടികളുടെ അമ്മയായ റെനെയുടെ മരണം ജോർജ്ജ് ഫ്ലോയിഡ് വധത്തിന് സമാനമായ രീതിയിൽ വലിയൊരു രാഷ്ട്രീയ പ്രക്ഷോഭത്തിന് തിരികൊളുത്തിയിരിക്കുകയാണ്.
മിനിയാപൊളിസിലെ ഒരു പാർപ്പിട മേഖലയിൽ വെച്ച് കഴിഞ്ഞ ബുധനാഴ്ചയാണ് റെനെ കൊല്ലപ്പെട്ടത്. തന്റെ ആറ് വയസ്സുകാരനായ മകനെ സ്കൂളിൽ വിട്ട് മടങ്ങുകയായിരുന്ന റെനെയുടെ വാഹനം ഐസിഇ ഏജന്റുമാർ തടയുകയായിരുന്നു. ഏജന്റുമാർ റെനെയെ കാറിൽ നിന്ന് വലിച്ചിറക്കാൻ ശ്രമിക്കുന്നതിനിടെ, വാഹനം മുന്നോട്ട് എടുത്ത് രക്ഷപ്പെടാൻ ശ്രമിച്ച റെനെയ്ക്ക് നേരെ ഏജന്റ് വെടിയുതിർക്കുകയായിരുന്നു. സംഭവത്തിന് തൊട്ടുമുമ്പ് റെനെ ഏജന്റിനോട് "എനിക്ക് നിങ്ങളോട് ദേഷ്യമൊന്നുമില്ല" എന്ന് ശാന്തമായി സംസാരിക്കുന്നത് വീഡിയോയിൽ വ്യക്തമാണ്.
റെനെയുടേത് ഒരു "ഭീകരാക്രമണമായിരുന്നു" എന്നും ഏജന്റ് സ്വയംരക്ഷാർത്ഥമാണ് വെടിവെച്ചതെന്നുമാണ് ട്രംപ് ഭരണകൂടത്തിന്റെ വാദം. ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോം, റെനെയെ ഒരു 'ആഭ്യന്തര ഭീകരവാദി' എന്ന് വിശേഷിപ്പിച്ചു. എന്നാൽ, പുറത്തുവന്ന ദൃക്സാക്ഷി വീഡിയോകൾ ഈ വാദത്തെ തള്ളിക്കളയുന്നു. ഏജന്റ് വണ്ടിക്ക് വശത്തുനിന്നാണ് വെടിവെച്ചതെന്നും, ഏജന്റിനെ വണ്ടിയിടിപ്പിക്കാൻ റെനെ ശ്രമിച്ചിട്ടില്ലെന്നും വീഡിയോകൾ സൂചിപ്പിക്കുന്നു. മിനിയാപൊളിസ് മേയറും മിനസോട്ട ഗവർണറും ഫെഡറൽ ഭരണകൂടത്തിന്റെ ഈ വിശദീകരണത്തെ രൂക്ഷമായി വിമർശിച്ചു.
എഫ്ബിഐ ഈ കേസ് ഏറ്റെടുത്തെങ്കിലും, മിനസോട്ട സംസ്ഥാന ഭരണകൂടം സമാന്തരമായി മറ്റൊരു ക്രിമിനൽ അന്വേഷണം കൂടി പ്രഖ്യാപിച്ചിട്ടുണ്ട്. കേന്ദ്ര ഏജൻസികൾ തെളിവുകൾ പങ്കുവെക്കാൻ തയ്യാറാകാത്തത് സംസ്ഥാന-കേന്ദ്ര ഭരണകൂടങ്ങൾ തമ്മിലുള്ള കടുത്ത പോരാട്ടത്തിന് വഴിയൊരുക്കിയിട്ടുണ്ട്. നിലവിൽ മിനസോട്ടയിൽ നാഷണൽ ഗാർഡിനെ ജാഗ്രതയ്ക്കായി വിന്യസിച്ചിരിക്കുകയാണ്.
The fatal shooting of 37-year-old mother Renee Good by an ICE agent in Minneapolis has sparked a massive wave of nationwide protests under the banner "ICE Out For Good." While the Trump administration labels the incident as self-defense against "domestic terrorism," leaked videos and local officials contest this narrative, citing a lack of justification for lethal force. The incident has led to a tense standoff between the federal government and Minnesota state authorities, who have launched an independent criminal inquiry.