മിനിയാപൊളിസ്: അമേരിക്കയിലെ മിനിയാപൊളിസിൽ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് ഉദ്യോഗസ്ഥന്റെ വെടിയേറ്റ് മുപ്പത്തിയേഴുകാരിയായ റെനീ ഗുഡ് കൊല്ലപ്പെട്ട സംഭവത്തിൽ മിനിയാപൊളിസിൽ പതിനായിരങ്ങൾ അണിനിരന്ന വൻ പ്രതിഷേധ റാലി നടന്നു (Minneapolis ICE Shooting). രാജ്യവ്യാപകമായി ആയിരത്തിലധികം ഇടങ്ങളിൽ സംഘടിപ്പിച്ച 'ഐസിഇ ഔട്ട്' പ്രതിഷേധങ്ങളുടെ ഭാഗമായാണ് മിനസോട്ടയിലും ജനങ്ങൾ തെരുവിലിറങ്ങിയത്.
കഴിഞ്ഞ ബുധനാഴ്ചയാണ് അമേരിക്കൻ പൗരത്വമുള്ള റെനീ ഗുഡ് സ്വന്തം കാറിനുള്ളിൽ വെച്ച് വെടിയേറ്റ് കൊല്ലപ്പെട്ടത്. ഐസിഇ ഉദ്യോഗസ്ഥരുടെ പ്രവർത്തനം നിരീക്ഷിക്കുന്ന സന്നദ്ധപ്രവർത്തകയായിരുന്നു അവർ. റെനീ ഉദ്യോഗസ്ഥരെ വാഹനമിടിപ്പിക്കാൻ ശ്രമിച്ചെന്നും ആത്മരക്ഷാർത്ഥമാണ് വെടിവെച്ചതെന്നും ഫെഡറൽ ഏജൻസികൾ അവകാശപ്പെടുമ്പോൾ, അവർ കാർ തിരിച്ച് മാറ്റാൻ ശ്രമിക്കുന്നതിനിടെയാണ് വെടിവെപ്പുണ്ടായതെന്ന് ദൃക്സാക്ഷികളും വീഡിയോ ദൃശ്യങ്ങളും വ്യക്തമാക്കുന്നു
കൊടുംതണുപ്പിനെ അവഗണിച്ചാണ് പതിനായിരങ്ങൾ മിനിയാപൊളിസ് നഗരത്തിലൂടെ മാർച്ച് ചെയ്തത്. "നീതിയില്ലെങ്കിൽ സമാധാനമില്ല" എന്ന മുദ്രാവാക്യങ്ങളുമായി പ്രതിഷേധക്കാർ റെനീ കൊല്ലപ്പെട്ട സ്ഥലത്ത് ഒത്തുകൂടി. സംഭവത്തെ 'ആഭ്യന്തര ഭീകരവാദം' എന്ന് വിശേഷിപ്പിച്ച ട്രംപ് ഭരണകൂടത്തിന്റെ നിലപാടിനെതിരെ മിനസോട്ടയിലെ ഡെമോക്രാറ്റിക് നേതാക്കൾ രംഗത്തെത്തി. ഐസിഇ കേന്ദ്രങ്ങൾ സന്ദർശിക്കാൻ ശ്രമിച്ച ഇൽഹാൻ ഒമർ ഉൾപ്പെടെയുള്ള പ്രതിനിധികളെ തടഞ്ഞത് വലിയ വിവാദത്തിന് കാരണമായിട്ടുണ്ട്. ഫിലാഡൽഫിയ, മാൻഹട്ടൻ, പോർട്ട്ലാൻഡ് തുടങ്ങി പ്രധാന അമേരിക്കൻ നഗരങ്ങളിലെല്ലാം ഇമിഗ്രേഷൻ ഉദ്യോഗസ്ഥരുടെ അധികാര ദുർവിനിയോഗത്തിനെതിരെ പ്രതിഷേധം ശക്തമായി.
മിനിയാപൊളിസ് മേയർ ജേക്കബ് ഫ്രേ സമാധാനം പാലിക്കാൻ അഭ്യർത്ഥിച്ചിട്ടുണ്ടെങ്കിലും, ഫെഡറൽ ഏജൻസികളുടെ ഭാഗത്തുനിന്നുണ്ടാകുന്ന തുടർച്ചയായ വെടിവെപ്പുകൾ രാജ്യത്ത് വലിയ സാമൂഹിക പ്രക്ഷോഭത്തിന് തിരികൊളുത്തിയിരിക്കുകയാണ്.
Tens of thousands of protesters marched through Minneapolis and major U.S. cities following the fatal shooting of 37-year-old Renee Good by an ICE agent. The massive demonstration, part of over 1,000 "ICE Out For Good" rallies, highlights the deep divide between the Trump administration and local leaders over immigration enforcement tactics. While federal officials claim the shooting was in self-defense, witness videos and local officials have characterized the incident as an unjustified use of lethal force.