ദുബായ്: അമേരിക്കയും ഇറാനും തമ്മിലുള്ള മറ്റൊരു സൈനിക ഏറ്റുമുട്ടൽ മധ്യേഷ്യൻ മേഖലയ്ക്ക് ഒട്ടും അഭികാമ്യമല്ലെന്ന് യുഎഇ പ്രസിഡന്റിന്റെ നയതന്ത്ര ഉപദേഷ്ടാവ് അൻവർ ഗർഗാഷ് (Middle East Geopolitics). ദുബായിൽ നടന്ന ലോക ഗവൺമെന്റ് ഉച്ചകോടിയിൽ (World Governments Summit) സംസാരിക്കുകയായിരുന്നു അദ്ദേഹം. ഇറാൻ ആണവ പദ്ധതിയുമായി ബന്ധപ്പെട്ട് വാഷിംഗ്ടണും ടെഹ്റാനും തമ്മിൽ ദീർഘകാലാടിസ്ഥാനത്തിലുള്ള ഒരു ധാരണയിൽ എത്തേണ്ടത് അനിവാര്യമാണെന്നും മേഖലയിലെ സംഘർഷാവസ്ഥ ഒഴിവാക്കാൻ ഇരുരാജ്യങ്ങളും നേരിട്ട് ചർച്ചകൾ നടത്തണമെന്നും അദ്ദേഹം ആവർത്തിച്ചു.
ഇറാനും അമേരിക്കയും തമ്മിലുള്ള ആണവ ചർച്ചകൾ വെള്ളിയാഴ്ച തുർക്കിയിൽ പുനരാരംഭിക്കാനിരിക്കെയാണ് യുഎഇയുടെ ഈ നിർണ്ണായക ഇടപെടൽ. ആണവ കരാറിൽ മാറ്റങ്ങൾ വരുത്താൻ തയ്യാറായില്ലെങ്കിൽ ഇറാൻ കടുത്ത പ്രത്യാഘാതങ്ങൾ നേരിടേണ്ടി വരുമെന്ന് യുഎസ് പ്രസിഡന്റ് ഡൊണാൾഡ് ട്രംപ് മുന്നറിയിപ്പ് നൽകിയിരുന്നു. ഇറാന്റെ തീരത്തേക്ക് യുഎസ് യുദ്ധക്കപ്പലുകൾ അയച്ചതും കഴിഞ്ഞ മാസം ഇറാനിലുണ്ടായ ആഭ്യന്തര പ്രക്ഷോഭങ്ങളും മേഖലയിൽ യുദ്ധഭീതി വർദ്ധിപ്പിച്ചിട്ടുണ്ട്. ഈ സാഹചര്യത്തിൽ സൗദി അറേബ്യയും ഈജിപ്തും ഉൾപ്പെടെയുള്ള രാജ്യങ്ങളുടെ പങ്കാളിത്തത്തോടെ ഇസ്താംബൂളിൽ നടക്കുന്ന ചർച്ചകൾക്ക് വലിയ പ്രാധാന്യമാണുള്ളത്.
അതേസമയം, യമനിലെയും സുഡാനിലെയും ആഭ്യന്തര പ്രശ്നങ്ങളിൽ യുഎഇയുടെ പങ്കിനെതിരെ ഉയരുന്ന വിമർശനങ്ങളെ അൻവർ ഗർഗാഷ് തള്ളി. സമൂഹമാധ്യമങ്ങളിലൂടെ യുഎഇക്കെതിരെ ബോധപൂർവ്വമായ കുപ്രചാരണങ്ങൾ നടക്കുന്നുണ്ടെന്നും യാഥാർത്ഥ്യവുമായി ഇതിന് ബന്ധമില്ലെന്നും അദ്ദേഹം പറഞ്ഞു. സുഡാൻ വിഷയത്തിൽ യുഎഇയെ ലക്ഷ്യം വെച്ച് പതിനായിരക്കണക്കിന് വ്യാജ സന്ദേശങ്ങളാണ് പ്രചരിക്കുന്നതെന്നും, പ്രാദേശിക തർക്കങ്ങളെ നയതന്ത്രത്തിലൂടെ പരിഹരിക്കാനാണ് യുഎഇ എന്നും ശ്രമിച്ചിട്ടുള്ളതെന്നും അദ്ദേഹം വ്യക്തമാക്കി.
Summary: UAE’s diplomatic advisor Anwar Gargash emphasized that the Middle East cannot afford another US-Iran conflict and urged for a sustainable nuclear deal through direct negotiations.
