ബോട്ട് ആക്രമണങ്ങൾക്ക് പിന്നാലെ അടുത്ത ലക്ഷ്യം മെക്സിക്കൻ മയക്കുമരുന്ന് കാർട്ടലുകൾ; ആക്രമണം നടത്താൻ മടിക്കില്ലെന്ന് ട്രംപ് സൈനിക ഇടപെടലിന് സാധ്യത | Mexican drug cartels

വാഷിംഗ്ടൺ: ലാറ്റിനമേരിക്കൻ മയക്കുമരുന്ന് സംഘങ്ങൾക്കെതിരെ താൻ ആരംഭിച്ച അപ്രതീക്ഷിത ആക്രമണങ്ങൾ മെക്സിക്കോയിലേക്കും വ്യാപിക്കുമെന്ന് യുഎസ് പ്രസിഡന്റ് ഡൊണാൾഡ് ട്രംപ് സൂചന നൽകി. മെക്സിക്കോയുമായി സൈനിക ഇടപെടലിനുള്ള സാധ്യതയെക്കുറിച്ച് മാധ്യമങ്ങളോട് പ്രതികരിക്കുകയായിരുന്നു ട്രംപ്.

"മയക്കുമരുന്ന് തടയാൻ മെക്സിക്കോയിൽ ഞാൻ ആക്രമണം നടത്തുമോ? എനിക്കതിൽ പ്രശ്നമില്ല. ഞാൻ മെക്സിക്കോയുമായി സംസാരിക്കുന്നുണ്ട്. എൻ്റെ നിലപാട് അവർക്കറിയാം," തിങ്കളാഴ്ച ഓവൽ ഓഫീസിൽ വെച്ച് ട്രംപ് റിപ്പോർട്ടർമാരോട് പറഞ്ഞു. "മയക്കുമരുന്ന് കാരണം ലക്ഷക്കണക്കിന് ആളുകളെയാണ് നമുക്ക് നഷ്ടമാകുന്നത്. ഞങ്ങൾ ജലപാതകൾ തടഞ്ഞുകഴിഞ്ഞു, പക്ഷേ ഓരോ വഴിയും ഞങ്ങൾക്കറിയാം."

ആക്രമണം എങ്ങനെ, എപ്പോൾ നടക്കുമെന്നതിനെക്കുറിച്ച് ട്രംപ് ഇതുവരെ വിശദീകരണം നൽകിയിട്ടില്ല. എന്നാൽ മെക്സിക്കൻ പ്രസിഡൻ്റ് ക്ലൗഡിയ ഷെയിൻബൗം തൻ്റെ രാജ്യത്ത് ഇത്തരമൊരു സൈനിക നീക്കത്തെ എതിർത്തിരുന്നു. അധികാരമേറ്റതിനുശേഷം, കോൺഗ്രസിന്റെ അംഗീകാരമില്ലാതെ മയക്കുമരുന്ന് കാർട്ടലുകൾക്കെതിരായ സൈനിക നടപടിയെ ന്യായീകരിക്കാൻ ട്രംപ് എക്സിക്യൂട്ടീവ് ഉത്തരവുകളും നിയമപരമായ പഴുതുകളും കണ്ടെത്തിയിരുന്നു.

ആറ് മയക്കുമരുന്ന് കാർട്ടലുകളെ 'വിദേശ ഭീകര സംഘടനകൾ' ആയി പ്രഖ്യാപിച്ചത് ഇതിൽ ഉൾപ്പെടുന്നു. ദേശീയ സുരക്ഷയുടെ പേരിലുള്ള സൈനിക ആക്രമണത്തിന് ഇത് വൈറ്റ് ഹൗസിന് അധികാരം നൽകുന്നു. സെപ്തംബർ മുതൽ കരീബിയനിലും പസഫിക്കിലുമായി മയക്കുമരുന്ന് കടത്തിക്കൊണ്ടുപോയെന്ന് ആരോപിക്കപ്പെടുന്ന ബോട്ടുകൾക്ക് നേരെ 20-ൽ അധികം ആക്രമണങ്ങൾ വൈറ്റ് ഹൗസ് നടത്തി. എന്നാൽ വെനസ്വേലയുടെ 'ട്രെൻ ഡി അറാഗ്വ' പോലുള്ള കാർട്ടലുകളുമായുള്ള ഇവയുടെ ബന്ധം തെളിയിക്കുന്ന പൊതുതെളിവുകൾ ഇതുവരെ ഹാജരാക്കിയിട്ടില്ല. കാർട്ടലുകളെ 'നാർക്കോ ടെററിസ്റ്റുകൾ' എന്ന് വിളിച്ച ട്രംപ് ഭരണകൂടം, ഈ ആക്രമണങ്ങളെ 'നോൺ-ഇൻ്റർനാഷണൽ ആംഡ് കോൺഫ്ലിക്റ്റ്' എന്നാണ് വിശേഷിപ്പിക്കുന്നത്.