വെടിനിർത്തലിന് ശേഷവും ഗാസയിലെ ഭക്ഷണശാലകളിൽ മാംസവും ശുദ്ധമായ പച്ചക്കറികളും കിട്ടാക്കനി; 20 ലക്ഷത്തിലധികം മനുഷ്യർ ദുരിതത്തിൽ | Gaza

ഗാസ സിറ്റി: ഇസ്രായേൽ വെടിനിർത്തൽ പ്രഖ്യാപിച്ചതിന് ആറ് ആഴ്ചകൾക്ക് ഇപ്പുറവും, ഗാസയിലെ (Gaza) സമൂഹ അടുക്കളകളിൽ ഭക്ഷ്യക്ഷാമം രൂക്ഷമായി തുടരുന്നു. മാംസം, കോഴിയിറച്ചി തുടങ്ങിയ അവശ്യമായ പ്രോട്ടീൻ സ്രോതസുകൾ ശുദ്ധമായ പച്ചക്കറികളും ഗാസയിൽ ലഭ്യമല്ല. അമേരിക്കയുടെ മാനുഷിക സംഘടനയായ അമേരിക്കൻ നിയർ ഈസ്റ്റ് റെഫ്യൂജി എയ്ഡ് പോലുള്ള ഏജൻസികൾ ദിവസവും ഇരുപതിനായിരത്തിലധികം ആളുകൾക്ക് നല്ല ഭക്ഷണം നൽകുന്നുണ്ടെങ്കിലും, ഭക്ഷണത്തിൻ്റെ പോഷകമൂല്യം ഉയർത്താൻ ആവശ്യമായ ഘടകങ്ങൾ ഇപ്പോഴും ലഭ്യമല്ല. പോഷകമൂല്യമുള്ള ഭക്ഷ്യവസ്തുക്കൾ വിതരണത്തിന് അനുവദിക്കുന്നില്ല എന്നതാണ് സത്യം.

നിയർ ഈസ്റ്റ് റെഫ്യൂജി ഐയ്ഡിന്റെ അടുക്കളകളിൽ പ്രധാനമായും അരി, പാസ്ത, പയർവർഗ്ഗങ്ങൾ എന്നിവയാണ് പാചകം ചെയ്യുന്നത്. മാംസവും കോഴിയിറച്ചിയും പോലുള്ള പ്രോട്ടീൻ സ്രോതസ്സുകൾ സഹായവിതരണത്തിനായി ഗാസയിലേക്ക് പ്രവേശിപ്പിക്കാൻ ഇപ്പോഴും ഇസ്രായേൽ അനുവദിക്കുന്നില്ല. 2023 ഒക്ടോബറിൽ യുദ്ധം ആരംഭിച്ചത് മുതൽ ഇസ്രായേൽ നിയന്ത്രണങ്ങൾ ഏർപ്പെടുത്തിയത് ഗാസയിലുടനീളം കടുത്ത മാനുഷിക പ്രതിസന്ധിക്ക് കാരണമായി തീർന്നു. ഗാസ സിറ്റിയിലും പട്ടിണി രൂക്ഷമാണ്. അടിസ്ഥാന സാധനങ്ങളുടെ വില ഇടിഞ്ഞിട്ടുണ്ടെങ്കിലും, യുദ്ധത്തിന് മുമ്പുള്ളതിനേക്കാൾ വില ഇപ്പോഴും കൂടുതലാണ്.

യുഎൻ്റെ വേൾഡ് ഫുഡ് പ്രോഗ്രാം റിപ്പോർട്ട് അനുസരിച്ച്, ഗാസയിലെ കാൽഭാഗം വീടുകളിലും ഒരു ദിവസം ഒറ്റനേരം മാത്രമാണ് ഭക്ഷണം കഴിക്കാൻ സാധിക്കുന്നത്. പണത്തിൻ്റെ അഭാവമാണ് പലർക്കും ഭക്ഷണം വാങ്ങാൻ തടസ്സമാകുന്നത്. അടുത്തിടെ അടുക്കളകൾ വഴി വിതരണം ചെയ്യുന്ന ഭക്ഷണം പ്രതിദിനം 1.4 ദശലക്ഷമായി ഉയർന്നിട്ടുണ്ട്. എന്നാൽ 20 ലക്ഷത്തിലധികം മനുഷ്യർ വസിക്കുന്ന ഗാസയിൽ ഇത് തികയുന്നില്ല.

എല്ലാ അഞ്ച് ക്രോസിംഗ് പോയിൻ്റുകളും തുറക്കാനും, വിതരണത്തിനുള്ള നിയന്ത്രണങ്ങൾ ലഘൂകരിക്കാനും സഹായ ഏജൻസികൾ ഇസ്രായേലിനോട് ആവശ്യപ്പെടുന്നുണ്ട്. "തുടർച്ചയായ രക്തച്ചൊരിച്ചിൽ നിന്നുള്ള ആശ്വാസം മാത്രമാണ് വെടിനിർത്തൽ നൽകിയ ഏക സന്തോഷം. മറ്റൊരു മാറ്റവും ഉണ്ടായിട്ടില്ല എന്ന് ഗാസയിലെ മനുഷ്യർ പറയുന്നു.