ബീജിംഗ്: ചൈനയിലെ ഒരു ട്രേഡിംഗ് പ്ലാറ്റ്‌ഫോം റീഫണ്ട് നൽകുന്നതിന് ആവശ്യപ്പെട്ട വിചിത്രവും അക്രമാസക്തവുമായ നിബന്ധന ചൈനീസ് സാമൂഹിക മാധ്യമങ്ങളിൽ വലിയ പ്രതിഷേധത്തിന് ഇടയാക്കി. പണം തിരികെ ലഭിക്കുന്നതിനായി, അമ്മ സ്വന്തം കുട്ടിയെ അടിക്കുന്ന ദൃശ്യം റെക്കോർഡ് ചെയ്യണം എന്നതായിരുന്നു ഈ നിബന്ധന. ചിയാൻഡാവോ എന്ന ട്രേഡിംഗ് പ്ലാറ്റ്‌ഫോമിലാണ് വിവാദപരമായ ഈ സംഭവം അരങ്ങേറിയത്.
സംഭവത്തിൻ്റെ തുടക്കം
ലി യുൻ എന്ന സ്ത്രീയുടെ 11 വയസ്സുള്ള മകൾ, രഹസ്യമായി ചിയാൻഡാവോ ആപ്പ് വഴി 500 യുവാന് (ഏകദേശം 6,152 രൂപ) മുകളിൽ വിലയുള്ള ട്രേഡിംഗ് കാർഡുകൾ വാങ്ങിയതോടെയാണ് വിവാദങ്ങളുടെ തുടക്കം. സാധനം വാങ്ങി രണ്ട് മണിക്കൂറിനുള്ളിൽ ലി യുൻ വിൽപനക്കാരനെ സമീപിച്ച് റീഫണ്ട് ആവശ്യപ്പെട്ടു. എന്നാൽ സാധാരണ റീഫണ്ട് നടപടിക്രമങ്ങൾക്ക് പകരം, വിൽപനക്കാരൻ യുവതിക്ക് നൽകിയ റീഫണ്ട് നോട്ടീസിലെ വ്യവസ്ഥകൾ അമ്പരപ്പിക്കുന്നതായിരുന്നു:
റീഫണ്ട് അംഗീകരിക്കണമെങ്കിൽ, അമ്മ കുട്ടിയെ തുടർച്ചയായി അഞ്ച് മിനിറ്റ് അടിക്കുന്ന വീഡിയോ സമർപ്പിക്കണം. അടിക്കുന്ന ശബ്ദം വ്യക്തമായി കേൾക്കണം.ഇതിനുപുറമെ, കുട്ടിയെ മൂന്ന് മിനിറ്റ് ശകാരിക്കുന്ന ഒരു ക്ലിപ്പും നൽകണം.കുറഞ്ഞത് 1,000 ചൈനീസ് അക്ഷരങ്ങളുള്ള ക്ഷമാപണ കത്ത് കുട്ടി കൈകൊണ്ട് എഴുതി ഒപ്പിട്ട് വിരലടയാളം പതിപ്പിച്ചശേഷം, അമ്മയുടെ അരികിൽ വെച്ച് വായിക്കുന്ന ദൃശ്യവും ആവശ്യപ്പെട്ടു.
കമ്പനിയുടെ പ്രതികരണവും പ്രതിഷേധവും
ചിയാൻഡാവോയുടെ കസ്റ്റമർ കെയർ ടീമിനെ ലി യുൻ സമീപിച്ചപ്പോൾ, പ്ലാറ്റ്‌ഫോമിന് നടപടിയെടുക്കാൻ കഴിയില്ലെന്നും വിൽപനക്കാരനുമായി നേരിട്ട് ചർച്ച ചെയ്യണമെന്നും മറുപടി ലഭിച്ചു.വിമർശനം ശക്തമായതോടെ ഒക്ടോബർ 20-ന് കമ്പനി ഒരു പ്രസ്താവന പുറത്തിറക്കി. ഈ റീഫണ്ട് നോട്ടീസ് വിൽപനക്കാരൻ വ്യക്തിപരമായി നൽകിയതാണെന്നും, ഇത് പ്ലാറ്റ്‌ഫോം അംഗീകരിച്ച ഔദ്യോഗിക നയമല്ലെന്നും അവർ വ്യക്തമാക്കി.എങ്കിലും, ഉപഭോക്തൃ സേവനത്തിലെ വീഴ്ചയുടെ പേരിലും കുട്ടികൾക്കെതിരായ അക്രമത്തെ പ്രോത്സാഹിപ്പിച്ചതിൻ്റെ പേരിലും ട്രേഡിങ് കമ്പനിക്കെതിരെ ചൈനീസ് സാമൂഹിക മാധ്യമങ്ങളിൽ വലിയ വിമർശനവും പ്രതിഷേധവുമാണ് ഉയരുന്നത്.