ദുബായ്: ഇറാൻ-ഇസ്രായേൽ യുദ്ധം ഗൾഫ് മേഖലയിലാകെ പടരുന്നതിനിടെ യുഎഇ തലസ്ഥാനമായ ദുബായിൽ ശക്തമായ സ്ഫോടനങ്ങൾ ഉണ്ടായതായി റിപ്പോർട്ട് (Loud Bangs Dubai Palm Island). ദുബായിലെ പ്രശസ്തമായ പാം ഐലൻഡ് പരിസരത്ത് സ്ഫോടനത്തെത്തുടർന്ന് തീഗോളവും പുകയും ഉയർന്നതായി ദൃക്സാക്ഷികളെ ഉദ്ധരിച്ച് റോയിട്ടേഴ്സ് വാർത്താ ഏജൻസി റിപ്പോർട്ട് ചെയ്തു. സ്ഫോടനശബ്ദം നഗരത്തിന്റെ പല ഭാഗങ്ങളിലും കേട്ടതായും മുൻകരുതൽ നടപടിയായി ലോകത്തെ ഏറ്റവും ഉയരം കൂടിയ കെട്ടിടമായ ബുർജ് ഖലീഫയിൽ നിന്ന് ആളുകളെ പൂർണ്ണമായും ഒഴിപ്പിച്ചതായും സൂചനയുണ്ട്.
ഇറാൻ റെവല്യൂഷണറി ഗാർഡ് (IRGC) ഗൾഫ് മേഖലയിലുടനീളമുള്ള അമേരിക്കൻ സൈനിക താവളങ്ങൾക്ക് നേരെ മിസൈൽ ആക്രമണം പ്രഖ്യാപിച്ചതിന് പിന്നാലെയാണ് ദുബായിൽ സ്ഫോടനങ്ങൾ നടന്നത്. അബുദാബിയിലെ അൽ ദാഫ്ര എയർ ബേസിനും ദുബായിലെ തന്ത്രപ്രധാന കേന്ദ്രങ്ങൾക്കും നേരെ ഇറാൻ മിസൈലുകൾ പ്രയോഗിച്ചതായി സ്ഥിരീകരിക്കാത്ത വിവരങ്ങളുണ്ട്. പാം ഐലൻഡിലെ സ്ഫോടനം ഡ്രോൺ ആക്രമണമാണോ അതോ മിസൈൽ പതിച്ചതാണോ എന്ന കാര്യത്തിൽ യുഎഇ അധികൃതർ ഔദ്യോഗിക സ്ഥിരീകരണം നൽകിയിട്ടില്ല. എങ്കിലും ദുബായ് വിമാനത്താവളം താൽക്കാലികമായി അടയ്ക്കുകയും വിമാന സർവീസുകൾ നിർത്തിവെക്കുകയും ചെയ്തു.
ദുബായിലും അബുദാബിയിലുമുള്ള ലക്ഷക്കണക്കിന് മലയാളി പ്രവാസികൾ ഇതോടെ വലിയ പരിഭ്രാന്തിയിലായിരിക്കുകയാണ്. കെർമാൻഷാ, ടെഹ്റാൻ എന്നിവിടങ്ങളിൽ ഇസ്രായേൽ നടത്തിയ ആക്രമണങ്ങൾക്ക് പകരമായി ഗൾഫ് രാജ്യങ്ങളിലെ യുഎസ് സാന്നിധ്യമുള്ള ഇടങ്ങളെല്ലാം തങ്ങൾ ലക്ഷ്യം വെക്കുമെന്ന് ഇറാൻ മുന്നറിയിപ്പ് നൽകിയിരുന്നു. ദുബായിലെയും റിയാദിലെയും സ്ഫോടനങ്ങൾ മേഖലയിലെ സുരക്ഷാ സാഹചര്യം അതീവ ഗുരുതരമാക്കിയിരിക്കുകയാണ്. പ്രവാസികൾ അത്യാവശ്യമില്ലാതെ വീടിന് പുറത്തിറങ്ങരുതെന്നും ലോക്കൽ പോലീസിന്റെയും ഇന്ത്യൻ എംബസിയുടെയും നിർദ്ദേശങ്ങൾ കർശനമായി പാലിക്കണമെന്നും വിദേശകാര്യ മന്ത്രാലയം അറിയിച്ചു.
