കീവ്: യുക്രെയ്നിൽ യുദ്ധം അവസാനിപ്പിക്കാനുള്ള നയതന്ത്ര നീക്കങ്ങൾ സജീവമാകുന്നതിനിടെ, തലസ്ഥാനമായ കീവിൽ റഷ്യയുടെ ശക്തമായ മിസൈൽ ആക്രമണം. ശനിയാഴ്ച പുലർച്ചെയുണ്ടായ ആക്രമണത്തിൽ രണ്ട് പേർ കൊല്ലപ്പെടുകയും 32 പേർക്ക് പരിക്കേൽക്കുകയും ചെയ്തു. മണിക്കൂറുകളോളം നീണ്ടുനിന്ന സ്ഫോടനങ്ങളിൽ നഗരത്തിലെ ജനജീവിതം സ്തംഭിച്ചു.
യുക്രെയ്ൻ പ്രസിഡന്റ് വൊളോദിമിർ സെലൻസ്കിയും അമേരിക്കൻ പ്രസിഡന്റ് ഡൊണാൾഡ് ട്രംപും തമ്മിലുള്ള നിർണ്ണായക കൂടിക്കാഴ്ച ഞായറാഴ്ച നടക്കാനിരിക്കെയാണ് ഈ പ്രകോപനം എന്നതും ശ്രദ്ധേയമാണ്.
ആക്രമണത്തിന് പിന്നാലെ റഷ്യക്കെതിരെ രൂക്ഷവിമർശനവുമായി സെലൻസ്കി രംഗത്തെത്തി. റഷ്യയ്ക്ക് യുദ്ധം അവസാനിപ്പിക്കാൻ യഥാർത്ഥത്തിൽ താല്പര്യമില്ലെന്നതിന്റെ തെളിവാണ് സമാധാന ചർച്ചകൾക്കിടയിലെ ഈ ആക്രമണമെന്ന് അദ്ദേഹം ആരോപിച്ചു. മിസൈൽ ആക്രമണങ്ങളെ പ്രതിരോധിക്കാൻ കൂടുതൽ ആയുധസഹായം വേണമെന്ന ആവശ്യം ട്രംപുമായുള്ള കൂടിക്കാഴ്ചയിൽ സെലൻസ്കി ഉന്നയിക്കുമെന്നാണ് റിപ്പോർട്ടുകൾ.
അമേരിക്കയിൽ ഭരണം മാറുന്ന പശ്ചാത്തലത്തിൽ, യുക്രെയ്ൻ യുദ്ധത്തിൽ ട്രംപ് സ്വീകരിക്കുന്ന നിലപാട് ലോകം ഉറ്റുനോക്കുകയാണ്. യുദ്ധം ഉടനടി അവസാനിപ്പിക്കണമെന്ന നിലപാടാണ് ട്രംപിനുള്ളത്. എന്നാൽ, റഷ്യൻ അധിനിവേശം തുടരുന്ന സാഹചര്യത്തിൽ യുക്രെയ്ൻ എങ്ങനെ പ്രതികരിക്കുമെന്നതും ഈ കൂടിക്കാഴ്ചയിൽ വ്യക്തമാകും. സമാധാന ചർച്ചകൾ പുരോഗമിക്കുമ്പോഴും റഷ്യ ആക്രമണം കടുപ്പിക്കുന്നത് ചർച്ചകളുടെ ഭാവിയെ ആശങ്കയിലാക്കുന്നുണ്ട്.