കുവൈത്ത് സിറ്റി: കാലാവസ്ഥാ വ്യതിയാനത്തെത്തുടർന്ന് രാജ്യത്ത് തണുപ്പ് വർധിക്കുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കണമെന്ന് അധികൃതർ നിർദേശിച്ചു. വടക്ക്–പടിഞ്ഞാറ് ഭാഗങ്ങളിൽ രൂപംകൊണ്ട ഉയർന്ന മർദ്ദ സംവിധാനമാണ് നിലവിലെ കാലാവസ്ഥയ്ക്ക് കാരണമെന്ന് കാലാവസ്ഥാ വകുപ്പ് ആക്ടിങ് ഡയറക്ടർ ദിരാർ അൽ അലി പറഞ്ഞു. മണിക്കൂറിൽ 60 കിലോമീറ്ററിലധികം വേഗത്തിൽ കാറ്റ് വീശാൻ സാധ്യതയുണ്ട്. ഇത് പൊടിപടലങ്ങൾ ഉയരുന്നതിനും ദൃശ്യപരത (Visibility) കുറയുന്നതിനും കാരണമാകുന്നു.
ഹൈവേകളിലൂടെയും തുറന്ന പ്രദേശങ്ങളിലൂടെയും യാത്ര ചെയ്യുന്നവർ പ്രത്യേകം ശ്രദ്ധിക്കണം. മൂടൽമഞ്ഞും പൊടിയും കാരണം കാഴ്ച പരിധി കുറയാൻ സാധ്യതയുണ്ട്. ശൈത്യകാലത്തെ ഏറ്റവും തണുപ്പേറിയ 'മുറബ്ബാനിയ്യ' സീസണിന്റെ അവസാനഘട്ടത്തിലാണ് രാജ്യം. ജനുവരി, ഫെബ്രുവരി മാസങ്ങളിലും കടുത്ത തണുപ്പ് തുടരുമെന്നാണ് സൂചന.
വരും ദിവസങ്ങളിൽ രാജ്യത്തിന്റെ ചില ഭാഗങ്ങളിൽ ഒറ്റപ്പെട്ട മഴയ്ക്ക് സാധ്യതയുണ്ടെന്നും കാലാവസ്ഥാ നിരീക്ഷകർ അറിയിച്ചു.
പൊതുജനങ്ങൾക്കുള്ള നിർദേശങ്ങൾ:
പുറത്തിറങ്ങുന്നവർ തണുപ്പിനെ പ്രതിരോധിക്കാൻ ആവശ്യമായ ശൈത്യകാല വസ്ത്രങ്ങൾ ധരിക്കുക.
ശ്വാസകോശ സംബന്ധമായ അസുഖമുള്ളവർ പൊടിപടലങ്ങൾ ഉയരുന്ന സാഹചര്യത്തിൽ ജാഗ്രത പുലർത്തുക.
കടലിൽ പോകുന്നവരും വിനോദസഞ്ചാരികളും കാലാവസ്ഥാ അപ്ഡേറ്റുകൾ ശ്രദ്ധിക്കുക.
കഴിഞ്ഞ വർഷം ഫെബ്രുവരിയിലേതിന് സമാനമായ അസാധാരണ ശൈത്യം ഇത്തവണയും ആവർത്തിക്കാൻ സാധ്യതയുള്ളതിനാൽ അധികൃതർ സ്ഥിതിഗതികൾ നിരീക്ഷിച്ചുവരികയാണ്.