കുവൈറ്റ് സിറ്റി: അമേരിക്ക-ഇസ്രായേൽ സഖ്യവും ഇറാനും തമ്മിലുള്ള യുദ്ധം 35-ാം ദിവസത്തിലേക്ക് കടക്കുമ്പോൾ ഗൾഫ് രാജ്യങ്ങളിൽ ആക്രമണം കടുക്കുന്നു (Kuwait Oil Refinery Attack). കുവൈറ്റിലെ പ്രധാന എണ്ണശുദ്ധീകരണശാലയ്ക്കും ശുദ്ധജല പ്ലാന്റിനും നേരെ ഇറാന്റെ ഡ്രോൺ-മിസൈൽ ആക്രമണമുണ്ടായി. വെള്ളിയാഴ്ച ഉച്ചയോടെയാണ് കുവൈറ്റിലെ വൈദ്യുതി-ശുദ്ധജല പ്ലാന്റിന് നേരെ ആക്രമണം നടന്നതെന്ന് അധികൃതർ സ്ഥിരീകരിച്ചു. നാശനഷ്ടങ്ങളുടെ വ്യാപ്തി വ്യക്തമല്ല.
നേരത്തെ, കുവൈറ്റിലെ പ്രമുഖ എണ്ണശുദ്ധീകരണശാലയായ മിന അൽ അഹമ്മദിക്ക് നേരെയും ഡ്രോൺ ആക്രമണം നടന്നിരുന്നു. ആക്രമണത്തെത്തുടർന്ന് ചില യൂണിറ്റുകളിൽ തീപിടുത്തമുണ്ടായെങ്കിലും ജീവനക്കാർക്ക് പരിക്കേറ്റിട്ടില്ലെന്ന് കുവൈറ്റ് വാർത്താ ഏജൻസിയായ കുന റിപ്പോർട്ട് ചെയ്തു. റേഡിയേഷൻ ചോർച്ചയുണ്ടായെന്ന വാർത്തകൾ അധികൃതർ നിഷേധിച്ചു. മിഡിൽ ഈസ്റ്റിലെ തന്നെ വലിയ ശുദ്ധീകരണശാലകളിൽ ഒന്നായ മിന അൽ അഹമ്മദിക്ക് നേരെ നടക്കുന്ന മൂന്നാമത്തെ ആക്രമണമാണിത്.
യുഎഇയിലെ ഹബ്ഷാൻ ഗ്യാസ് പ്ലാന്റിന് നേരെയും മിസൈൽ ആക്രമണമുണ്ടായി. വെടിവെച്ചിട്ട മിസൈലിന്റെ അവശിഷ്ടങ്ങൾ വീണ് പ്ലാന്റിൽ തീപിടുത്തമുണ്ടായതിനെത്തുടർന്ന് പ്രവർത്തനം താൽക്കാലികമായി നിർത്തിവെച്ചു. വ്യാഴാഴ്ച മാത്രം 19 ബാലിസ്റ്റിക് മിസൈലുകളും 26 ഡ്രോണുകളുമാണ് യുഎഇ വ്യോമസേന തകർത്തത്. യുഎഇയിൽ ഇതുവരെ രണ്ട് സൈനികർ കൊല്ലപ്പെടുകയും 191 പേർക്ക് പരിക്കേൽക്കുകയും ചെയ്തതായാണ് വിവരം.
അതേസമയം, അമേരിക്കൻ സാങ്കേതികവിദ്യാ കമ്പനികളെ ലക്ഷ്യമിട്ടും ഇറാൻ നീക്കം തുടങ്ങി. ദുബായിലെ ഒറാക്കിൾ ഡാറ്റാ സെന്ററിന് നേരെ ആക്രമണം നടത്തിയതായി ഇറാൻ അവകാശപ്പെട്ടെങ്കിലും ദുബായ് മീഡിയ ഓഫീസ് ഇത് നിഷേധിച്ചു. എന്നാൽ, യുഎഇയിലെ തങ്ങളുടെ രണ്ട് ഡാറ്റാ സെന്ററുകൾക്ക് നേരെ ആക്രമണമുണ്ടായതായും ബഹ്റൈനിലെ ഒരെണ്ണത്തിന് നാശനഷ്ടം സംഭവിച്ചതായും ആമസോൺ വെബ് സർവീസസ് (AWS) സ്ഥിരീകരിച്ചു. മേഖലയിലെ ഊർജ്ജ-വിനിമയ കേന്ദ്രങ്ങൾ ഇനിയും ലക്ഷ്യമിടുമെന്ന് ഇറാന്റെ സൈനിക വക്താവ് മുന്നറിയിപ്പ് നൽകിയിട്ടുണ്ട്.
Summary: On the 35th day of the US-Israel war against Iran, major infrastructure in the Gulf has come under attack. Kuwait’s Mina al-Ahmadi oil refinery and a key desalination plant were hit by Iranian drones and missiles on Friday. In the UAE, the Habshan gas facility faced fire following a missile interception, and Amazon Web Services (AWS) confirmed direct strikes on its data centers.
