ഇന്ന് ഹാലോവീൻ: മരണപ്പെട്ടവരുടെ ആത്മാക്കൾ വീടുകൾ സന്ദർശിക്കാൻ എത്തുന്ന, ആത്മാക്കളുടെ ദിനം | Halloween

മിന്നാമിനുങ്ങുകൾക്ക് പകരം മത്തങ്ങവിളക്കുകൾ കത്തിയുണരുന്ന, സാധാരണ വസ്ത്രങ്ങൾക്കു പകരം പ്രേതവേഷങ്ങളും മന്ത്രവാദിനികളുടെ മുഖങ്ങളും നിറയുന്ന, വർഷത്തിലെ ഏറെ നിഗൂഢമായ രാത്രിയാണ് ഹാലോവീൻ (Halloween). ഇത് വെറുമൊരു ആഘോഷം മാത്രമല്ല നൂറ്റാണ്ടുക്കൾ പഴക്കമുള്ള പ്രാചീന പാരമ്പര്യവും സംസ്കാരവുമായിരുന്നു. ഇന്ന് ഒക്ടോബർ 31, പാശ്ചാത്യ രാജ്യങ്ങൾക്ക് ഇന്ന് ഹാലോവീൻ. പേടിപ്പെടുത്തുന്ന വേഷങ്ങൾ, വീടുകൾക്ക് ചുറ്റും മത്തങ്ങ വിളക്കുകൾ, മിഠായികൾക്കായി വീടുവീടാന്തരം കയറിയിറങ്ങുന്ന പ്രേതവേഷങ്ങൾ അണിഞ്ഞ കുട്ടികൾ, ഇതെല്ലാം ഈ രാത്രിയെ സവിശേഷമാക്കി തീർക്കുന്നു. ജീവിച്ചിരിക്കുന്നവരുടെയും മരിച്ചവരുടെയും ലോകങ്ങൾക്കിടയിലെ അതിർവരമ്പ് നേർക്കുന്നതായി കരുതപ്പെടുന്ന ഈ "ആത്മാക്കളുടെ ദിനത്തിന്" നൂറ്റാണ്ടുകളുടെ പഴക്കമുണ്ട്.

ഹാലോവീൻ: ഒരു പുരാതന കെൽറ്റിക് ചരിത്രം

ഹാലോവീൻ ആഘോഷത്തിന്റെ വേരുകൾ 2000 വർഷം പഴക്കമുള്ള പുരാതന കെൽറ്റിക് ഉത്സവമായ സംഹൈനിലേക്കുമായി ബന്ധപ്പെട്ടിരിക്കുന്നു. അയർലൻഡ്, യുകെ, വടക്കൻ ഫ്രാൻസ് തുടങ്ങിയ പ്രദേശങ്ങളിൽ താമസിച്ചിരുന്ന സെൽറ്റുകളാണ് ഈ ആഘോഷം ആഘോഷം തുടങ്ങിവെച്ചത്. സെൽറ്റുകൾ നവംബർ 1 ശൈത്യകാലത്തിന്റെ തുടക്കമായി കണക്കാക്കി. ഒക്ടോബർ 31 വിളവെടുപ്പ് കാലത്തിന്റെ അവസാനവും ഇരുണ്ട ശൈത്യകാലത്തിന്റെ തുടക്കവുമായി അടയാളപ്പെടുത്തി. ഈ രാത്രിയിലാണ് സംഹൈൻ ആഘോഷിച്ചിരുന്നത്.

ഈ പ്രത്യേക രാത്രിയിൽ, ജീവിച്ചിരിക്കുന്നവരുടെയും മരിച്ചവരുടെയും ലോകങ്ങൾ തമ്മിലുള്ള അതിർത്തി മങ്ങുമെന്നും, മരിച്ചവരുടെ ആത്മാക്കൾക്ക് ഭൂമിയിലേക്ക് മടങ്ങാൻ കഴിയുമെന്നും സെൽറ്റുകൾ വിശ്വസിച്ചു. ഈ ആത്മാക്കൾ തങ്ങളുടെ വിളകൾ നശിപ്പിക്കുകയും രോഗങ്ങൾ വരുത്തുകയും ചെയ്യുമെന്ന് അവർ ഭയപ്പെട്ടു. ആത്മാക്കളെ തിരിച്ചറിയാതിരിക്കാനും അവയിൽ നിന്ന് സ്വയം സംരക്ഷിക്കാനും, സെൽറ്റുകൾ മൃഗങ്ങളുടെയും രാക്ഷസന്മാരുടെയും ഭയപ്പെടുത്തുന്ന വസ്ത്രങ്ങൾ ധരിക്കാൻ തുടങ്ങിയത്.

പിന്നീട്, എട്ടാം നൂറ്റാണ്ടിൽ മാർപ്പാപ്പ ഗ്രിഗറി മൂന്നാമൻ നവംബർ 1 എല്ലാ വിശുദ്ധരെയും ബഹുമാനിക്കുന്ന 'ഓൾ സെയിന്റ്സ് ഡേ' ആയി പ്രഖ്യാപിച്ചു. ഇതിന്റെ തലേന്നായ ഒക്ടോബർ 31, 'ഓൾ ഹാലോസ് ഈവ്' എന്നറിയപ്പെടുകയും, ഇത് പരിണമിച്ചാണ് ഇന്നത്തെ ഹാലോവീൻ ആയതും

ഇന്നത്തെ ഹാലോവീൻ ആഘോഷങ്ങൾ

ആധുനിക ഹാലോവീൻ, അതിന്റെ ഭയാനകമായ പശ്ചാത്തലം നിലനിർത്തിക്കൊണ്ടുതന്നെ, ലോകമെമ്പാടുമുള്ള കുട്ടികളും മുതിർന്നവരും ഒരുപോലെ ആസ്വദിക്കുന്ന ഒരു ഉത്സവമായി മാറിയിരിക്കുന്നു. ഹാലോവീൻ എന്ന വാക്ക് കേൾക്കുമ്പോൾ, ആദ്യം മനസ്സിൽ വരുന്നത് മത്തങ്ങകളിൽ കൊത്തിയെടുത്ത ഭയാനകമായ രൂപങ്ങളാണ്. വിളക്കുകൾ കൊണ്ട് അലങ്കരിക്കുക എന്നതാണ് ഈ ദിവസത്തെ പ്രധാന ആചാരം. ഐറിഷ് നാടോടിക്കഥകളിലെ 'സ്റ്റിങ്കി ജാക്ക്' എന്ന കഥാപാത്രവുമായി ഈ ആചാരം ബന്ധപ്പെട്ടിരിക്കുന്നു. ജാക്ക് പിശാചിനെ കബളിപ്പിച്ച് സ്വർഗത്തിലോ നരകത്തിലോ പ്രവേശിക്കാൻ വിസമ്മതിച്ചു. അതിനുശേഷം, തന്റെ വഴി കാണാൻ കനലെടുത്ത് ഒരു മുള്ളങ്കിയിൽ വെച്ച് അലഞ്ഞുതിരിയേണ്ടി വന്നു. പിന്നീട് അമേരിക്കയിൽ കുടിയേറ്റം നടന്നപ്പോൾ, അവിടെ സുലഭമായിരുന്ന മത്തങ്ങ ഉപയോഗിച്ച് വിളക്കുണ്ടാക്കുന്ന രീതി പ്രചാരത്തിലായി.

ട്രിക്ക് ഓർ ട്രീറ്റ്

കുട്ടികൾ പ്രേതങ്ങളുടെയും മറ്റ് ഭയാനക കഥാപാത്രങ്ങളുടെയും വേഷം ധരിച്ച് വീടുതോറും പോയി മിഠായി ശേഖരിക്കുന്ന ഒരു ആചാരമാണിത്. മിഠായി നൽകിയില്ലെങ്കിൽ കുസൃതി കാണിക്കുമെന്നുള്ള ഭീഷണിയും ഇതിലുണ്ട്.

വിചിത്രമായ വസ്ത്രങ്ങൾ

ഹാലോവീൻ രാത്രിയിലെ ഒരു പ്രധാന ആകർഷണമാണ് രാക്ഷസന്മാർ, പ്രേതങ്ങൾ, മന്ത്രവാദിനികൾ, വാമ്പയർമാർ, അല്ലെങ്കിൽ ജനപ്രിയ കഥാപാത്രങ്ങൾ എന്നിവരുടെ വേഷവിധാനങ്ങൾ ധരിച്ച് പാർട്ടി നടത്തുകയും പാർട്ടികളിലും പരേഡുകളിലും പങ്കെടുക്കുകയും ചെയ്യുന്നത്.

കേരളത്തിലെ ഹാലോവീൻ

കേരളത്തിൽ ഹാലോവീൻ ഒരു പരമ്പരാഗത ആഘോഷമല്ലെങ്കിലും, ആഗോള സംസ്കാരത്തിന്റെ ഭാഗമായി കൊച്ചി, ബാംഗ്ലൂർ, ചെന്നൈ തുടങ്ങിയ നഗരങ്ങളിലെ കഫേകളിലും ക്ലബ്ബുകളിലും ഇപ്പോൾ ഹാലോവീൻ പാർട്ടികൾ സംഘടിപ്പിക്കപ്പെടുന്നു. മലയാളികളുടെ യുവതലമുറ ഇപ്പോൾ ഈ പാശ്ചാത്യ ആഘോഷത്തെ കൗതുകത്തോടെ സ്വീകരിക്കുന്നു. ഭയവും മരണവും ആഘോഷത്തിന്റെ ഭാഗമായി കാണുന്ന ഈ രാത്രി, ലോകമെമ്പാടുമുള്ള പുരാതന പാരമ്പര്യങ്ങളുടെയും ആധുനിക വിനോദങ്ങളുടെയും മിശ്രിതമാണ്.