തറാവ : ലോകത്ത് ആദ്യമായി പുതുവർഷം വരവേറ്റ് പസഫിക് സമുദ്രത്തിലെ ദ്വീപ് രാഷ്ട്രമായ കിരീബാസ്. ഇന്ത്യൻ സമയം ഇന്ന് ഉച്ചയ്ക്ക് ശേഷം 3:30-ഓടെയാണ് ഇവിടെ 2026 പിറന്നത്. ലോകത്ത് ഏറ്റവും ആദ്യമേ സൂര്യോദയം കാണാൻ കഴിയുന്ന ഭൂഭാഗങ്ങളിൽ ഒന്നാണിത്.(Kiribati becomes the first country to see in the new year)
ഹവായിക്ക് തെക്കായും ഓസ്ട്രേലിയയുടെ വടക്കുകിഴക്കുമായാണ് ഈ രാജ്യം സ്ഥിതി ചെയ്യുന്നത്. കിഴക്ക് നിന്ന് പടിഞ്ഞാറോട്ട് ഏകദേശം 4,000 കിലോമീറ്റർ നീളത്തിൽ വ്യാപിച്ചുകിടക്കുന്ന ഈ ദ്വീപ് സമൂഹം വളയത്തിന്റെ ആകൃതിയിലുള്ള പവിഴപ്പുറ്റുകൾ (Atolls) ചേർന്നതാണ്. ദക്ഷിണ പസഫിക്കിലെ ഏറ്റവും വലിയ സമുദ്ര സംരക്ഷണ കേന്ദ്രം കൂടിയാണിത്.
'കിരിബാസ്' എന്നും അറിയപ്പെടുന്ന ഈ രാജ്യം 1979-ലാണ് യുണൈറ്റഡ് കിംഗ്ഡത്തിൽ നിന്ന് സ്വതന്ത്രമായത്. ഏകദേശം 1,16,000 പേരാണ് ഇവിടെ വസിക്കുന്നത്. സമുദ്രനിരപ്പിൽ നിന്ന് വളരെ താഴ്ന്ന പ്രദേശമായതിനാൽ, ആഗോളതാപനം മൂലം സമുദ്രനിരപ്പ് ഉയരുന്നത് ഈ ദ്വീപ് സമൂഹത്തിന് നിലവിൽ വലിയ ഭീഷണി ഉയർത്തുന്നുണ്ട്.
കിരീബാസിന് പിന്നാലെ ഇന്ത്യൻ സമയം വൈകുന്നേരം 4:30-ഓടെ ന്യൂസിലാന്റിലും (ഓക്ലൻഡ്), 6:30-ഓടെ ഓസ്ട്രേലിയയിലും (സിഡ്നി) പുതുവർഷം പിറക്കും. ഇന്ത്യയിൽ അർദ്ധരാത്രി 12 മണിക്കാണ് 2026-നെ വരവേൽക്കുന്നത്.