പാരിസ്: 2025-ൽ ലോകത്ത് മാധ്യമപ്രവർത്തകർക്ക് ഏറ്റവും കൂടുതൽ ജീവഹാനി സംഭവിച്ച ഇടമായി പലസ്തീൻ മാറിയെന്ന് ഇന്റർനാഷണൽ ഫെഡറേഷൻ ഓഫ് ജേണലിസ്റ്റ്സ് (IFJ) പുറത്തുവിട്ട റിപ്പോർട്ടിൽ പറയുന്നു (Journalist Deaths 2025). കഴിഞ്ഞ വർഷം ആഗോളതലത്തിൽ കൊല്ലപ്പെട്ട 128 മാധ്യമപ്രവർത്തകരിൽ 56 പേരും പലസ്തീനികളാണ്. ഗാസയിൽ ഇസ്രായേൽ നടത്തുന്ന യുദ്ധം റിപ്പോർട്ട് ചെയ്യുന്നതിനിടയിലാണ് ഇവർക്ക് ജീവൻ നഷ്ടമായത്.
അറബ് മേഖലയിൽ മൊത്തം 74 മാധ്യമപ്രവർത്തകർ കൊല്ലപ്പെട്ടു. ഇതിൽ പലസ്തീന് പിന്നാലെ യെമൻ (13), ഉക്രെയ്ൻ (8), സുഡാൻ (6) എന്നീ രാജ്യങ്ങളാണ് ഉള്ളത്. കൊല്ലപ്പെട്ടവരിൽ 10 പേർ വനിതകളാണ്. അൽ ജസീറ മാധ്യമപ്രവർത്തകൻ അനസ് അൽ ഷരീഫ് ഉൾപ്പെടെയുള്ളവരുടെ മരണം അന്താരാഷ്ട്ര തലത്തിൽ വലിയ പ്രതിഷേധത്തിന് കാരണമായിരുന്നു. ഗാസയിലെ അൽ-ഷിഫ ആശുപത്രിക്ക് പുറത്തുള്ള മാധ്യമ ടെന്റിന് നേരെ നടന്ന ആക്രമണത്തിലാണ് അനസ് അൽ ഷരീഫ് കൊല്ലപ്പെട്ടത്.
മാധ്യമപ്രവർത്തകർ വ്യാപകമായി തടവിലാക്കപ്പെടുന്ന സാഹചര്യവും റിപ്പോർട്ട് ചൂണ്ടിക്കാട്ടുന്നു. ചൈനയിലും ഹോങ്കോങ്ങിലുമായി 143 പേരും, മ്യാൻമറിൽ 49 പേരും തടവിലാണ്. അസർബൈജാൻ, റഷ്യ എന്നിവിടങ്ങളിൽ മാധ്യമപ്രവർത്തകർക്കെതിരെയുള്ള അടിച്ചമർത്തൽ വർദ്ധിച്ചതോടെ യൂറോപ്പിലും സ്ഥിതി ഗുരുതരമായി തുടരുകയാണെന്ന് ഐഎഫ്ജെ ജനറൽ സെക്രട്ടറി ആന്റണി ബെലാഞ്ചർ പറഞ്ഞു.
Palestine was the deadliest place for journalists in 2025, according to a report by the International Federation of Journalists (IFJ). Out of 128 journalists killed globally last year, 56 were Palestinian, mostly while covering the war in Gaza. The Middle East remains the most dangerous region for media professionals, while China and Hong Kong lead in the number of imprisoned journalists.