ന്യൂയോർക്ക്: ജെഫ്രി എപ്‌സ്റ്റീന്റെ ലൈംഗിക കുറ്റകൃത്യങ്ങളുമായി ബന്ധപ്പെട്ട് അമേരിക്കൻ പ്രസിഡന്റ് ഡൊണാൾഡ് ട്രംപിന് കുരുക്കാകുന്ന പുതിയ രേഖകൾ പുറത്തുവന്നു. എപ്‌സ്റ്റീന്റെ ലൈംഗിക ചൂഷണങ്ങളെക്കുറിച്ച് ട്രംപിന് അറിവുണ്ടായിരുന്നുവെന്ന് സൂചിപ്പിക്കുന്ന ഇമെയിലുകളും കുറിപ്പുകളുമാണ് ഇപ്പോൾ പുറത്തുവന്നിരിക്കുന്നത്. ജനപ്രതിനിധി സഭയിലെ ഡെമോക്രാറ്റുകളാണ് ഈ നിർണായക വിവരങ്ങൾ പുറത്തുവിട്ടത്.(Jeffrey Epstein case, Trump in trouble; crucial emails and documents released)
ഹൗസ് ഓവർസൈറ്റ് കമ്മിറ്റിയിലെ ഡെമോക്രാറ്റുകളാണ് ഈമെയിലുകൾ പുറത്തുവിട്ടത്. കഴിഞ്ഞ 15 വർഷത്തിനിടെ എപ്‌സ്റ്റീൻ തൻ്റെ സഹപ്രവർത്തക ഗിസ്ലൈൻ മാക്‌സ്‌വെല്ലിനും എഴുത്തുകാരൻ മൈക്കിൾ വൂൾഫിനുമായി നടത്തിയ സ്വകാര്യ കത്തിടപാടുകളിലാണ് ട്രംപിന്റെ പേര് പലതവണ പരാമർശിക്കപ്പെട്ടിട്ടുള്ളത്.
ലൈംഗിക കടത്തിന് ഇരയായ ഒരു സ്ത്രീയുമായി ഡോണൾഡ് ട്രംപ് മണിക്കൂറുകളോളം സമയം ചെലവഴിച്ചുവെന്ന് ഒരു ഇമെയിലിലെ കുറിപ്പിൽ വ്യക്തമാക്കുന്നുണ്ട്. ട്രംപ് ജോലി ചെയ്തിരുന്ന ക്ലബ്ബിലെ യുവതികളെ ചൂഷണം ചെയ്യാൻ ശ്രമിച്ചതിനെ തുടർന്ന് ട്രംപിനെ പുറത്താക്കിയെന്ന വിവരങ്ങളും ഈ ഇമെയിലുകളിലുണ്ട്.
ഈ തെളിവുകളെല്ലാം ട്രംപ് പ്രസിഡന്റ് ആകുന്നതിന് മുൻപുള്ളതാണെങ്കിലും, ഇരകളായ പെൺകുട്ടികളെക്കുറിച്ച് ട്രംപിന് അറിയാമായിരുന്നുവെന്ന് എപ്‌സ്റ്റീൻ സൂചിപ്പിക്കുന്നത് ഗുരുതരമാണെന്നാണ് ഡെമോക്രാറ്റുകൾ ചൂണ്ടിക്കാട്ടുന്നത്.
എന്നാൽ, പുതിയ ആരോപണങ്ങൾ വൈറ്റ് ഹൗസ് പൂർണ്ണമായും നിഷേധിച്ചു. പ്രസിഡന്റിനെ കരിതേച്ച് കാണിക്കാനുള്ള ശ്രമങ്ങളാണ് ഡെമോക്രാറ്റുകൾ നടത്തുന്നതെന്നാണ് വൈറ്റ് ഹൗസിൻ്റെ പ്രതികരണം. എപ്‌സ്റ്റീനുമായോ മാക്‌സ്‌വെല്ലുമായോ ബന്ധപ്പെട്ട് ട്രംപിനെതിരെ ക്രിമിനൽ കുറ്റങ്ങൾ ഒന്നും ചുമത്തിയിട്ടില്ലെന്നും വൈറ്റ് ഹൗസ് കൂട്ടിച്ചേർത്തു.