ടെൽ അവീവ്: ഒരാഴ്ചത്തെ ഇടവേളയ്ക്ക് ശേഷം ഗാസ മുനമ്പ് വീണ്ടും കലുഷിതമാകുന്നു. വെടിനിർത്തൽ കരാർ ലംഘിച്ചുവെന്ന് ആരോപിച്ച് ഹമാസിനെതിരെ കർശന നടപടി സ്വീകരിക്കാൻ ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു സൈന്യത്തിന് (ഐ.ഡി.എഫ്.) നിർദ്ദേശം നൽകി. ഇസ്രയേൽ നിയന്ത്രിത പ്രദേശത്തേക്ക് ഹമാസ് വെടിയുതിർത്തുവെന്ന് ആരോപിച്ചാണ് റാഫ ഉൾപ്പെടെ ഗാസയിലെ പലയിടങ്ങളിലും ഇസ്രയേൽ സൈന്യം ആക്രമണം നടത്തിയത്. ഒരാഴ്ച മുൻപ് നിലവിൽ വന്ന വെടിനിർത്തൽ കരാറിന് ശേഷം നടക്കുന്ന ആദ്യത്തെ വലിയ ആക്രമണമാണിത്.
ഹമാസ് തുരങ്കങ്ങൾ ലക്ഷ്യം
നെതന്യാഹുവിന്റെ നിർദ്ദേശത്തിന് പിന്നാലെ, തെക്കൻ ഗാസയിൽ വീണ്ടും വ്യോമാക്രമണം ആരംഭിച്ചതായി ഐ.ഡി.എഫ്. (ഇസ്രയേൽ പ്രതിരോധ സേന) സ്ഥിരീകരിച്ചു. ഹമാസിന്റെ തുരങ്കങ്ങളെ ലക്ഷ്യം വെച്ചാണ് ആക്രമണമെന്നാണ് ഇസ്രയേലി മാധ്യമങ്ങൾ റിപ്പോർട്ട് ചെയ്യുന്നത്. പുതിയ ആക്രമണങ്ങളുടെ പശ്ചാത്തലത്തിൽ, ഇസ്രയേലി പ്രധാനമന്ത്രി ബെഞ്ചമിൻ നെതന്യാഹു സുരക്ഷയുമായി ബന്ധപ്പെട്ട് അടിയന്തര യോഗം വിളിച്ചു ചേർത്തിട്ടുണ്ട്.
മരണം 9; മധ്യസ്ഥ ശ്രമങ്ങൾ സജീവം
ഇസ്രയേലി ആക്രമണത്തിൽ ഒൻപത് പലസ്തീനികൾ കൊല്ലപ്പെട്ടതായി ഹമാസിന്റെ നിയന്ത്രണത്തിലുള്ള ഗാസയിലെ ആരോഗ്യ മന്ത്രാലയം അറിയിച്ചു. അതിനിടെ, മേഖലയിലെ സ്ഥിതിഗതികൾ വീണ്ടും വഷളായതോടെ, സംഘർഷം ലഘൂകരിക്കുന്നതിനായി മധ്യസ്ഥ ശ്രമങ്ങൾ സജീവമായി നടക്കുന്നുണ്ട്. "രാവും പകലും" ചർച്ചകൾ നടന്നുവരികയാണെന്ന് വെടിനിർത്തൽ ചർച്ചകളിൽ പങ്കെടുത്ത മുതിർന്ന ഈജിപ്ഷ്യൻ ഉദ്യോഗസ്ഥനെ ഉദ്ധരിച്ച് വാർത്താ ഏജൻസിയായ എ.എഫ്.പി. റിപ്പോർട്ട് ചെയ്തു.