ബെയ്റൂട്ട്: ലബനനും സിറിയയും തമ്മിലുള്ള അതിർത്തിയിലെ നാല് പ്രധാന പാതകളിൽ ഇസ്രായേൽ വ്യോമാക്രമണം നടത്തി (Israel-Lebanon Ceasefire Violations). ഹിസ്ബുള്ള ആയുധങ്ങൾ കടത്താൻ ഈ പാതകൾ ഉപയോഗിക്കുന്നു എന്ന് ആരോപിച്ചായിരുന്നു ആക്രമണം. ഇതിന് പിന്നാലെ ദക്ഷിണ ലബനനിൽ നടന്ന ആക്രമണങ്ങളിൽ രണ്ട് പേർ കൊല്ലപ്പെടുകയും ഇരുപതോളം പേർക്ക് പരിക്കേൽക്കുകയും ചെയ്തു. ലബനൻ പ്രസിഡന്റ് ജോസഫ് ഔൺ ഇസ്രായേലിന്റെ ഈ നടപടിയെ അതിശക്തമായി അപലപിച്ചു.
ഇസ്രായേൽ ആസൂത്രിതമായ അധിനിവേശ നയമാണ് പിന്തുടരുന്നതെന്നും ജനവാസമുള്ള ഗ്രാമങ്ങളെ നേരിട്ട് ലക്ഷ്യമിടുന്നത് അപകടകരമായ പ്രവണതയാണെന്നും പ്രസിഡന്റ് ഔൺ പ്രസ്താവനയിൽ പറഞ്ഞു. 2024 നവംബറിൽ അമേരിക്കയുടെ മധ്യസ്ഥതയിൽ ഉണ്ടാക്കിയ വെടിനിർത്തൽ കരാറിനെ ഇസ്രായേൽ തുടർച്ചയായി ലംഘിക്കുകയാണെന്നും അദ്ദേഹം കുറ്റപ്പെടുത്തി. ദക്ഷിണ ലബനനിലെ കനാരിത്ത് എന്ന സ്ഥലത്തുണ്ടായ ആക്രമണത്തിൽ പത്തൊൻപതോളം പേർക്ക് പരിക്കേറ്റതായാണ് ലബനൻ ആരോഗ്യ മന്ത്രാലയം നൽകുന്ന വിവരം.
സിദോൻ, ടൈർ എന്നിവിടങ്ങളിലെ വാഹനങ്ങൾക്ക് നേരെയും ഇസ്രായേൽ ആക്രമണം നടത്തി. ഇതിൽ ഓരോ വ്യക്തികൾ വീതം കൊല്ലപ്പെട്ടു. സിദോനിൽ നടന്ന ആക്രമണത്തിൽ ഹിസ്ബുള്ളയുടെ പ്രധാന ആയുധക്കടത്തുകാരനെ വധിച്ചതായി ഇസ്രായേൽ സൈന്യം അവകാശപ്പെട്ടു. എന്നാൽ സാധാരണക്കാരുടെ വീടുകൾക്ക് നേരെയും സിവിലിയൻ കെട്ടിടങ്ങൾക്ക് നേരെയും നടക്കുന്ന ഈ ആക്രമണങ്ങൾ ലബനന്റെ പരമാധികാരത്തിന്മേലുള്ള കടന്നുകയറ്റമാണെന്ന് ലബനൻ സൈന്യം പ്രതികരിച്ചു. വെടിനിർത്തൽ കരാറിന് ശേഷം മാത്രം ഇസ്രായേൽ നടത്തിയ ആക്രമണങ്ങളിൽ ലബനനിൽ 350-ലധികം പേർ കൊല്ലപ്പെട്ടതായാണ് റിപ്പോർട്ടുകൾ.
Israel has bombed four border crossings between Syria and Lebanon, claiming they were used by Hezbollah for weapon smuggling. The strikes, which occurred despite a US-brokered ceasefire from late 2024, resulted in at least two deaths and nearly 20 injuries in southern Lebanon. Lebanese President Joseph Aoun condemned the attacks as a "policy of systematic aggression" targeting civilians. While Israel claims to have eliminated a key weapons smuggler, the Lebanese military stated that these violations of sovereignty hinder disarmament efforts and have caused over 350 deaths since the ceasefire was signed.