ജെറുസലേം: സുരക്ഷാ കാരണങ്ങൾ മുൻനിർത്തി ഇസ്രയേൽ പ്രതിരോധ സേന മുതിർന്ന ഉദ്യോഗസ്ഥർക്ക് ആൻഡ്രോയിഡ് ഫോണുകൾ പൂർണ്ണമായും നിരോധിച്ചു. ലെഫ്റ്റനന്റ് കേണൽ റാങ്ക് മുതലുള്ള എല്ലാ മുതിർന്ന ഉദ്യോഗസ്ഥരും ഇനി ഔദ്യോഗിക ആശയവിനിമയങ്ങൾക്കായി ഐഫോണുകൾ മാത്രമേ ഉപയോഗിക്കാൻ പാടുള്ളൂ. അടുത്തിടെ സൈന്യത്തിനുള്ളിൽ ഡിജിറ്റൽ ലംഘനങ്ങളും സൈബർ ചാരവൃത്തിയും വർധിച്ചതിന്റെ പശ്ചാത്തലത്തിലാണ് ഈ കർശന തീരുമാനം.(Israel Defense Forces urges iPhone users to use only iPhones)
ആൻഡ്രോയിഡ് ഉപകരണങ്ങളിൽ സൈബർ നുഴഞ്ഞുകയറ്റത്തിന് സാധ്യത കൂടുതലാണ് എന്ന് ഇസ്രയേൽ കണക്കാക്കുന്നതായി ആർമി റേഡിയോ റിപ്പോർട്ട് ചെയ്തതായി റിപ്പോർട്ട് ചെയ്യുന്നു. സമീപ വർഷങ്ങളിൽ, സൈനികരെയും ഉദ്യോഗസ്ഥരെയും ലക്ഷ്യമിട്ടുള്ള നിരവധി 'ഹണിപോട്ട്' ആക്രമണങ്ങൾ ഇസ്രയേലിൽ റിപ്പോർട്ട് ചെയ്തിരുന്നു. വ്യാജ പ്രൊഫൈലുകൾ ഉപയോഗിച്ച് ഫോണുകളിലേക്ക് മാൽവെയറുകൾ കടത്തിവിട്ട് സെൻസിറ്റീവ് ഡാറ്റയും സ്ഥലവിവരങ്ങളും ചോർത്തി.
പുതിയ മാർഗ്ഗനിർദ്ദേശങ്ങൾ പ്രകാരം, പ്രവർത്തനപരമോ കമാൻഡ് സംബന്ധമായതോ ആയ ആവശ്യങ്ങൾക്ക് ആൻഡ്രോയിഡ് ഫോണുകൾ അനുവദിക്കില്ല. ഈ സൈനിക ഉദ്യോഗസ്ഥർക്ക് ആൻഡ്രോയിഡ് ഉപകരണങ്ങൾ വ്യക്തിഗത ഉപയോഗത്തിന് മാത്രമേ അനുവദിക്കൂ. ഏറ്റവും സുരക്ഷിതമായ സ്മാർട്ട്ഫോണുകൾ ആൻഡ്രോയിഡ് ആണെന്ന് ഗൂഗിൾ ശക്തമായി പ്രചാരണം നടത്തുന്നതിനിടെയാണ് ഇസ്രയേൽ സൈന്യം ഐഫോണുകൾക്ക് മുൻഗണന നൽകുന്നത് എന്നത് ശ്രദ്ധേയമാണ്. യുഎസ് പ്രതിരോധ വകുപ്പിന്റെ സുരക്ഷാ പട്ടികയിൽ പിക്സൽ സ്മാർട്ട്ഫോൺ ഉൾപ്പെടുത്തിയെന്ന് ഗൂഗിൾ അവകാശപ്പെട്ടതിന് തൊട്ടുപിന്നാലെയാണ് ഐഡിഎഫിന്റെ ഈ തീരുമാനം.